Украина: Псков аэропортуна чабуул Орусиянын аймагынан болгон
30-августта Псков аэропортуна болгон чабуул Орусиянын аймагынан жасалган. Бул тууралуу украин чалгын кызматынын башчысы Кирилл Буданов The War Zone долбооруна билдирди.
Буданов деталдарды тактоодон баш тартты. Анын айтымында, соккудан улам эки учак жок кылынып, дагы экөө талкаланган. The War Zone спутниктен тартылган сүрөттөрдү анализдегенден кийин бул билдирүүнү ырастады. Космостон тартылган сүрөттөрдө Ил-76 "Кандид" жүк ташуучу учагынын калдыктарын жана фюзеляжынын үстүңкү жагы талкаланган ушундай эле эки учакты көрүүгө болот.
Долбоор мындан тышкары украин чалгын кызматынан дрондун инфракызыл камерасына тартылган видеонун скриншотун алышкан. Сүрөттө талкаланган учактарга урулган соккунун жыйынтыгы тартылган.
"Сүрөттө дрон бомба таштагандай көрүнөт", - деп белгилеген The War Zone. Долбоор дрондорду аэропорттон алыс эмес жерде турган адам башкарышы мүмкүн деп боолгогон.
Орусия менен Түркиянын президенттери 4-сентябрда Сочиде жолугарын Кремлдин маалымат кызматы билдирди.
Апта башында Түркиянын "Адилеттик жана өнүгүү партиясы" Владимир Путин менен Режеп Тайып Эрдогандын жолугушуусу жакын арада болорун билдирген.
Президенттер жолугушууда Украинага Кара деңиз аркылуу экспорттоого жол берген келишимди жандантуу же башка альтернативдүү макулдашуу түзүүнү сүйлөшөрү күтүлүүдө.
Бул дан келишими аяктаган июль айынан берки эки лидердин алгачкы жолугушуусу.
Москва июль айынын соңунда Украинадан Кара деңиз аркылуу дан экспорттоого жол берген келишимден чыгып кеткен.
Орусия Украинага согуш ачкандан бир нече ай өткөндөн кийин Кара деңиз аркылуу дан экспорттоо токтоп калган. Бул жагдай дүйнөдө азык-түлүктүн кымбатташына алып келген.
Киев менен Москва Түркия жана БУУнун ортомчулугу алдында дан экспортун кайра жандантуу келишимине былтыр 22-июлда Стамбулда кол коюшкан. Келишимдин мөөнөтү улам узартылып, 17-июлда токтоду. Бул аралыкта Украинадан 30 миллион тонна буудай жана башка айыл чарба азыктары экспорттолгон.
The Wall Street Journal басылмасы Кремлдин дан келишимин узартуудан баш тартышынын дагы бир себеби катары Түркия Украинага “Азов” полкунун башчыларын кайтарганын белгилеген. Мариуполдогу салгылашууда “Азовсталдын” коргоочулары туткунга түшүп, алмашуу жолу менен Стамбулга жеткирилген. Алмашуунун шарты боюнча алар согуш бүткөнгө чейин Түркиянын аймагында калышы керек эле.
Украин күчтөрү Запрожьеде чабуулга өтүп, Орехов шаарынын түштүгүндөгү Токмак шаарын көздөй жылып, орусиялык күчтөрдүн логистикалык борборуна жакындап калды.
Орусиялык күчтөрдүн негизги пункту болгон Работино айылын алгандан кийин украин күчтөрү түштүккө карай жылып, Новопрокоповканы айланып өтүүдө. Украин күчтөрүнүн башкы штабынын күнүмдүк маалыматында аскерлер бошоткон аймактарда позицияларын бекемдеп жатканы айтылат.
Украин күчтөрү Работинонун түштүк-чыгышындагы Вербовое багытына жылып, "Суровикиндин линиясы" деп аталган биринчи эшелонго жакындаган. Буга чейин Вербовое багытынын батышында украин күчтөрү позициясын бекемдегени тууралуу маалыматтар чыккан. Бирок кийинчерек алар оор куралдары жок чалгын топтору экени маалым болду.
Орусия абадан коргонуу системасын Куриль аралдарынан алып кеткенин "Майнити симбун" жапон басылмасы жазды. Орусия системаны украин дрондору чабуул койгондо абадан коргонуу күчтөрү жетишпей жаткандан улам алып кетиши мүмкүн.
Басылма Итуруп жана Кунашир аралдарын Maxar Technologies компаниясынын спутниктери космостон тарткан сүрөттөрдү изилдеген Токио университетинин окутуучусу Ю Коидзумиге шилтеме берген.
Орусия С-300 ракеталык комплексин Итуруптагы Касатка жана Кунаширдеги Түштүк-Куриль аймагындагы булуңга 2020-жылы жайгаштырган. 2022-жылы тартылган сүрөттө ал жерде ракета менен атылуучу транспорттук жабдууларды, радар жана башка жабдыктарды көрүүгө болот. Коидзуми азыр алар жок экенин айтууда.
Ракеталык комплекстер Украинага жакын аймактарга жеткирилиши мүмкүн. Коидзуми Сахалин аралынын түштүгүндөгү аскердик базадагы эски танк жана гаубицалар ремонттон өткөндөн кийин Украинага жеткирилиши мүмкүн деген божомолду айткан.