Украинанын Донецк облусунда Road to Relief деген гуманитардык уюмунун машинеси аткыланганда чет элдик эки жаран окко учту. Бул тууралуу уюм жана испаниялык El Mundo гезити жекшембиде билдирди.
Road to Relief тараткан маалыматка ылайык, чет өлкөлүк төрт жаран отурган автоунааны Часов Яр деген жерде орусиялык аскерлер аткылаган. Славянск шаарынан Бахмутка бараткан автоунаага дүрмөт тийгенде ал аңтарылып кетип, күйүп кеткен. Уюм окуяга байланыштуу маалымат чогултуп жатканын коушмчалады. Орусия тарап комментарий бере элек.
Маалыматка караганда, канадалык Энтони Игнат жана Испаниянын жараны Эмма Игуаль каза тапты. Оор жараат алган дагы эки ыктыярчы-медицина кызматкерлери – Германия жана Швециянын жарандары ооруканага жеткирилди.
Road to Relief уюму былтыркы марттан бери иштеп келатат. Би-Би-Си жазгандай, ыктыярчылар майдан тилкесиндеги украин айылдарына гуманитардык жардам жеткирүү жана салгылашуулар жүргөн жерлерден калкты көчүрүү менен алектенет.
НАТОнун мүчөсү Румыниянын аймагында бир жумада экинчи жолу орусиялык дрондун сыныктары табылды.
«Азаттыктын» румын редакциясы маалымдагандай, сыныктар Орусия Украинанын Одесса облусуна сокку ургандан кийин түшкөн болушу ыктымал.
Украина менен чектеш айылдардын тургундары орусиялык учкучсуз учактар тууралуу даттанганда жергиликтүү бийлик убактылуу эвакуацияны сунуш кылганын Digi-24 каналы буга чейин кабарлаган.
Президент Клаус Йоханнис Орусиянын мындай аракети кабыл алынгыс экенин, өлкөнүн суверендүү аба мейкиндигин бузуп жатканын эскертти. Президент Украинанын калкына жана жарандык жайларга, анын ичинде чек аралаш райондорго коюлган чабуулдарды согуш кылмышы деп эсептей турганын кошумчалады.
Румын мамлекет башчысы Орусиянын соккулары өлкө жашоочуларына коркунуч жаратарын, маселе НАТОнун жетекчиси Йенс Столтенберг менен талкууланганын билдирди. Баш катчы Бухарест менен тилектеш экенин бышыктады.
Столтенбергдин X социалдык тармакка жазганына караганда, орусиялык дрондор Румыниянын аймагына атайлап учурулган деген далилдер жок, бирок ал соккулар кырдаалды туруксуз кылууда. Ал ошондой эле чек араны көзөмөлдөө үчүн F-16 учактарын жөнөтүү боюнча АКШнын буга чейинки чечимин кубаттады.
Румыниянын аймагына Орусиянын согуштук жабдыктарынын сыныктары түшкөнүн Бухарест 6-сентябрда биринчи жолу моюнга алган. Коргоо министрлиги жаңы калдыктар ошол эле дронго таандык деп болжолдоп, ошол эле маалда алар бири-биринен алыс жерлерде табылганын да белгилейт.
Жекшембиге караган түнү Орусия "Шахед" дрондору менен Киевге чабуул койду. Киевдин аскердик администрация башчысы Сергей Попконун маалымдашынча, 20дан ашуун дрон абада жок кылынды.
"Дрондор Киевге топ-тобу менен ар тараптан чабуул коюшту",- деди Попко.
Киевдин Шевченко районунда кыйраган дрондордун калдыктары көп кабаттуу үйлөрдүн бириндеги батирди талкалап кеткен. Автоунаалар, троллейбус зымдары, жолдор жабыркаганы кабарланууда. Шаар мэри Виталий Кличко бир адам жаракат алганын маалымдады.
Жекшембиге оогон түнү Харьков облусунун Изюм жана Купянск райондору да аткыланды. Днепропетровск облусунда Никополь шаарына үч ракетадан чабуул жасалды.
Бул аралыкта Орусиянын Коргоо министрлиги Украинанын дрондору аннексияланган Крымга чабуул койгонун билдирди. Мекеменин маалыматына караганда, жарым аралга жакын жерден сегиз учкучсуз учакты атып түшүргөн. Орусия ошондой эле жекшембиге караган түндө Кара деңизде "Крымдын жээгине бара жаткан жеринен АКШда чыгарылган Willard Sea Force деп аталган үч аскердик ыкчам катер десанттары менен кошо жок кылынганын" билдирди. Украин тарап бул маалыматты азырынча комментарийлей элек.
Согуш маалында эки тараптын маалыматтарын көз карандысыз булактардан тактоо мүмкүн эмес.
Атомдук энергия боюнча эл аралык аганттиктин (МАГАТЭ) орусиялык аскерлер басып алган аймак - Украинанын Запорожье облусундагы АЭСте турган эксперттери акыркы жумада көп сандаган жардыруулардын добушу угулгаанын айтышууда.
"Немис толкуну" радиосу маалымдагандай, 8-сентябрда МАГАТЭнин башчысы Рафаэль Гросси азыркы кырдаал аймакта аскердик активдүүлүктү күчөтүп, "АЭСте өзөктүк коопсуздукка коркунуч келтириши ыктымалдыгын" айтты.
Уюмдун эксперттери 2-сентябрдан тарта үч күн ичинде 20дан ашуун, андан кийин дагы бир нече жардыруулардын добушун угушкан. Гроссинин сөзүнө караганда, АЭСтин өзүндө жардыруунун кесепети байкалган эмес.
МАГАТЭнин эксперттерине станциянын бир катар энергоблоктору жайгашкан чатырына чыгууга уруксат бериле элек.
Июндун башында Украинанын президенти Владимир Зеленский чалгындын маалыматына таянып, Орусия станциянын чатырына жардыргыч заттарды жайгаштырганын билдирген. Москва аны четке каккан.
8-10-сентябрь күндөрү Орусия басып алган аймактарда, анын ичинде Запорожье облусунда "Мыйзам чыгаруу жыйынына" шайлоо өтүп жатат.
Украина шайлоону сындаган.