Аннексияланган Крым жарым аралынын Севастополь шаарында 23-сентябрь күнү таңга жуук катуу жардыруу болгонун "Крым. Реалии" сайты кабарлады. Жергиликтүү кабарчынын маалымдашынча, жардыруунун толкунунан үйлөрдүн айнектери сынып кеткен.
Кийинчерээк аймактын Орусия дайындаган башчысы Михаил Развожаев Севастополго ракетадан чабуул жасалганын ырастады. Анын сөзүнө караганда, абадан коргонуу системасы иштеп, атылган ракеталардын калдыктары Сухарный районундагы жээкке түшкөн.
Жардыруудан кийин жүргүнчүлөрдү ташыган суу транспорттору токтоду.
Михаил Развожаев бир күн мурун да аймакта жардыруу болгонун, ракеталык чабуул Орусиянын Кара деңиз флотуна багытталганын Телеграм каналына жазган эле.
Украинанын Аскердик чалгындоо башкы башкармалыгынын башчысы Кирилл Буданов 22-сентябрда Севастополь шаарындагы Орусиянын Кара деңиз флотунун штабына жасалган чабуулдан кеминде тогуз адам өлүп, 16 киши жараат алганын, арасында орусиялык генералдар да бар экенин билдирген.
Тараптардын маалыматтарын согуш шартында тактоого мүмкүн эмес.
Ак үй Украинага алыска атылуучу ATACMS ракеталары бериле турганы жөнүндө маалыматты расмий ырастоодон баш тартты
Ишемби күнү брифингде Ак үйдүн пресс-катчысы Карин Жан-Пьер Жо Байден Владимир Зеленскийге мындай ракета берүүнү убада кылганбы деген суроого "Мен бул маалыматты ырастабайм... Президент ATACMS талкуудан чийилбегенин айткан. Мен түшүндүрө турган жаңы эч нерсе жок" деп жооп берди.
Буга чейин америкалык медиада АКШ ATACMS ракеталарын бере турганын жазышкан.
Украин аскерлеринин түштүк багытынын командачылыгы Вербовоеде алга жылганын билдирди
"Таврия" оперативдүү-стратегиялык аскердик тобунун башчысы, бригадалык генерал Александр Тарнавский ишемби күнү CNN каналына курган маегинде украин армиясы Запорожье облусундагы Вербовое айылындагы орусиялык коргонуу чебин жырып өткөнүн билдирди.
Буга чейин аймакта украин армиясы "Суровикин линиясы" деп аталган Орусиянын коргонуусун талкалаганы тууралуу кабар тараган. Бул жерде адегенде украиналык жөө аскерлер пайда болуп, кийин оор техникалар тартылган.
Аннексияланган Крым жарым аралынын Севастополь шаарындагы Орусиянын Кара деңиз флотунун штабына жасалган чабуулдан кеминде тогуз адам өлүп, 16 киши жаракат алган. Алардын арасында орусиялык генералдар да бар экенин “Америка авазы” радиосунун украин кызматына Украинанын Аскердик чалгындоо башкы башкармалыгынын жетекчиси Кирилл Буданов билдирди.
Ал жаракат алгандардын арасында орус генералдары Александр Романчук, Олег Цеков да бар экенин айтты.
Запорожье багытындагы орус аскерлеринин тобунун командири Александр Романчук генерал-полковник наамын 2023-жылы алган. Генерал-лейтенант Олег Цеков Орусиянын Аскер-деңиз флотунун 200-мотоаткычтар бригадасынын командири.
22-сентябрда Севастополдо бир нече жардыруу болду. Орусиянын оккупациялык бийлиги Орусиянын Кара деңиз флотунун штабына ракеталык чабуул жасалганын билдирген. Украинанын Куралдуу күчтөрү бул маалыматты ырастаган.
Орусия Украинанын Крым жарым аралын 2014-жылы жазында күч менен өзүнө каратып алган. Эл аралык коомчулук Крымды Украинанын аймагы деп эсептейт.