Орус армиясы 10-октябрга караган түнү Украинанын аймагына "Шахед" жанкечти дрону менен 36 жолу чабуул жасады. Украинанын Куралдуу күчтөрү дрондор аннексияланган Крымдын Чауда аймагынан учурулганын билдирди. Алардын 27си Одесса, Николаев жана Херсон облустарынын чегинде атып түшүрүлдү.
Одесса облустук аскер администрациясынын башчысы Олег Кипер калкты аба чабуулу жөнүндө эскертүүгө көңүл бурууга жана баш калкалоочу жайларда болууга чакырды.
Харьков обладминистрациянын башчысы Олег Синегубов орус аскерлери Купянск районундагы Великий Бурлук айылына ракеталык чабуул жасаганын айтты. Баштапкы маалыматтарга караганда, С-300 ракетасы менен урулган соккуда үч тургун жараат алды.
Херсон облусун көздөй 440 снаряд атылганы кабарланды. Днепропетровск облусунун Никополь шаарында ок атылганын маалымат булактары жазды.
Киевдин маалыматында, украин авиациясы акыркы суткада Орусиянын турумдарына 10 жолу сокку урду. Орус тарап дүйшөмбү күнү Чернигов облусундагы курал-жарак кампасына чабуул болгонун, украиналыктардын ар кайсы багыттагы 11 чабуулунун мизин кайтарганын билдирди.
Украинанын президенти Владимир Зеленский Батышты биримдикке чакырып, ХАМАС радикалдык тобунун Израилге кол салуусу менен Орусиянын Украинага басып киргенин салыштырды.
"Бир эле айырма, Израил террордук топтун, ал эми Украина террордук мамлекеттин кол салуусуна дуушар болду", - деди ал 9-октябрда НАТОнун Копенгагенде өтүп жаткан парламенттик ассамблеясынын жыйынына онлайн катышкан учурда.
7-октябрда ХАМАС радикал кыймылы Израилге абадан чабуул коюп, бир нече калктуу конушка кирип барган.
Тель-Авивдин маалыматына караганда, аталган кыймылдын өкүлдөрү ондогон адамды барымтага алган. Кол салуу учурунда Израил тараптан каза болгон кишилер 700дөн ашкан, эки миңден көбү жараат алган.
Израилдин армиясы Газа тилкесине жооп катары абадан сокку ура баштаган. Палестин бийлигинин маалыматына караганда, Газа секторунда каза тапкандар 413кө жетти, жараат алгандар 2300 болду. Израилдин бийлиги 50 жылдан бери биринчи жолу согуштук абал жарыялады.
Орусиянын армиясы 2022-жылдын февраль айында Украинага басып киргенден бери миңдеген жай тургундардын, аскерлердин өмүрү кыйылган. Шаар-кыштактар талкаланып, миңдеген кишилер жараат алды, дагы миңдегени үй-жайын таштап качууга аргасыз болду. Украинадагы согушта Орусия да олуттуу аскердик жоготууларга кабылды.
Киев украин армиясы Донецк районундагы кармаштарда "жарым-жартылай ийгиликке жетишкенин" билдирди.
"Клещеевка жана Андреевка айылдарынын айланасында жарым-жартылай ийгилик болду", - деп жазылган 9-октябрдын таңында украин Куралдуу күчтөрүнүн Башкы штабы тараткан билдирүүдө.
Контрчабуул башталгандан бери украин күчтөрү Бахмуттун тегерегинен орус күчтөрүн сүрүп чыкканга аракет кылып келишет. Аталган калааны орус армиясы бир нече айга созулган айыгышкан кармаштан кийин ээлеп алган эле.
Жалпысынан соңку бир суткада фронтто 37 кагылышуу катталды.
Ал арада облустук администрациялардын жетекчилери соңку бир суткада орус армиясынын аткылоосунан кеминде 16 жайкын тургун мүрт кеткенин кабарлашты.
8-октябрда Херсон облусуна жасалган орус күчтөрүнүн соккусунан ондогон карапайым киши жаракат алды. Алардын арасында 27 жаштагы аял жана анын тогуз айлык наристеси бар. Бул тууралуу аймактын губернатору Александр Прокудин телеграмга жазды.
Согуш маалында тараптардын билдирүүлөрүн тактоо мүмкүн эмес.
Украинанын Херсон облусунда Орусиянын 8-октябрдагы чабуулдарында кеминде 16 киши каза тапты.
Ондогон киши жараат алганын, арасында 27 жаштагы аял жана анын тогуз айлык баласы бар экенин Херсондун башчысы Александр Прокудин билдирди.
"Биз дагы коркунучтуу түндү баштан өткөрдүк", - деп жазды ал Телеграмга.
Киевдин маалыматына караганда, жекшембиге караган түнү орус күчтөрү Херсонго бир нече жолу чабуул жасашкан.
Өзөктүк куралды сыноого тыюу салуу боюнча келишим уюмундагы Орусиянын элчиси Москва бул документтин ратификациясын чакыртып аларын билдирди.
Өзөктүк куралды сыноого тыюу салган келишим уюмундагы орус элчиси Михаил Улянов Москва ратификация болгон пактты кайра чакыртып аларын билдирди. Вашингтон бул чечимди өзөктүк куралды сыноого тыюу салган глобалдык нормага коркунуч катары сыпаттаган.
Буга чейин Владимир Путин "Валдай" клубунун жыйынында сүйлөп жатып ратификацияны чакыртып алууну ойлонууга чакырган. Мындан кийин орус парламентинин спикери Вячеслав Володин Телеграмга бул маселе жакын арада Мамдуманын кеңешинде караларын билдирген.
Володин жана Ульянов ратификацияны чакыртып алуу зарылдыгын ар кандай түшүндүрүшкөн. Мамдуманын спикери бул Орусияга каршы Вашингтон менен Брюсселдин "согушуна" байланыштуу экенин айткан. Өзөктүк куралды сыноого каршы келишим уюмундагы Орусиянын элчиси "максат келишимди кабыл алып, бирок ратификация кылбаган АКШ менен бирдей шартта болуу экенин" белгилеген.
Улянов жана Путиндин пресс-катчысы Дмитрий Песков ратификацияны чакыртып алуу өзөктүк куралды сыноону жандантууну билдирбесин белгилешкен.
Буга чейин Жаңы жердеги полигондо орусиялык күчтөрдүн активдешкени жана кыймылдаткычы өзөктүк май менен иштеген "Буравестник" ракетасы сыноодон өткөнү белгилүү болгон.