Москвада аскерге барбаган борбор азиялыктарга каршы 22 кылмыш иши козголду. Бул тууралуу Тергөө комитети билдирди.
Кеп буга чейин орус жарандыгын алган адамдар тууралуу болуп жатат. Учурда укук коргоо органдары аларды издеп жатканы маалым болду. Эгер алар чындап эле аскерге баруудан баш тартса, жарандыктан ажыратылат.
Буга чейин жарандык алган 80ден ашуун адам Орусиянын Куралдуу күчтөрүнө кызмат өтөө үчүн жиберилген.
Ушул жылдын аягына чейин аскерге 18 жаштан 27 жашка чейинки жарандар чакырылат. 2024-жылдын 1-январынан тарта аскерге чакыруу мөөнөтү 30 жашка чейин узартылат.
Орусиянын Кылмыш кодексинде аскерде кызмат өтөөдөн баш тартканы үчүн эки жылга абакка кесүү каралган.
Быйыл жай айында Орусияда мигранттарга каршы рейддер күч алган. Мамлекеттик Думада "армияга барбай, аскердик милдетин өтөбөгөн мурдагы мигранттарды жарандыктан ажыратуу" мыйзам долбоору сунушталган.
Орусиянын атуулдугун алган борбор азиялыктарды согушка тартуу өнөктүгү Москва Украинага согуш ачканда башталган.
Расмий эсепте, орус жарандыгын алган кыргызстандыктардын саны 600 миңден ашуун. Алардын бир бөлүгү кыргыз паспортунан баш тартпаганы кабарланып келет.
Орусиянын армиясы 27-октябрга караган түнү Украинанын Изюм шаарындагы Өрт өчүрүү кызматынын имаратына сокку урду. Бул тууралуу Украинанын ички иштер министри Игорь Клименко билдирди.
"Нөөмөттө турган сегиз киши жараат алды. Алардын төртөө ооруканага жеткирилди", – деп тактады Харьков облустук администрация башчысы Олег Синегубов. Анын айтымында, алдын ала маалыматтарга ылайык, сокку С-300 зениттик-ракеталык комплексинен жасалган.
Клименко кошумчалагандай, чабуул Харьков облусунун Өрт өчүрүү кызматынын 200 жылдыгы белгиленип жаткан күнү болгон.
27-октябрга караган түнү Орусиянын армиясы Украинанын аймактарын “Шахеддер” жана "Искандер-М" ракеталары менен аткылоону улантты. Украин күчтөрү Херсон жана Николаев облустарында беш дронду абадан атып түшүргөнүн билдирдм.
Орусиянын ички иштер министри Владимир Колокольцев "мигранттардын айрым кылмыштары мыкаачылыгы менен айырмаланарын" билдирди. Анын айтымында, чет өлкөлүктөр “опузалап акча талап кылуу, адам уурдоо, анын ичинде өз мекендештерин уурдоо” менен алектенип, анын баарын Интернетке жайгаштырат.
Ички иштер министрлигинин коллегиясынын жыйынында 25-октябрда сүйлөгөн Колокольцевдин эсебинде, маңзатка байланыштуу "ар бир төртүнчү кылмышты мигранттар жасайт". Эки жыл мурда бул көрсөткүч "эки эсе төмөн болчу".
Министр ошондой эле жүздөгөн мигранттар Орусияга жеке маалыматтарын өзгөртүп кирүүнүн аракетин көрө турганын кошумчалады.
Былтыр Орусиянын Тергөө комитетинин башчысы Александр Баcтрыкин мигранттар барган оор жана өзгөчө оор кылмыштардын саны 11 миңден дээрлик 15 миңге жеткенин, анын ичинде адам өлтүрүү 18% өскөнүн кошумчалаган.
Кыргызстандын Тышкы иштер министрлигинин маалыматына караганда, Орусияда мыйзамсыз маңзат ташуу боюнча 2020-жылы 191, 2021-жылы 324, 2022-жылы 614 кыргыз жараны абакка кесилген. Бүгүнкү күндө орус абактарында 1311 кыргызстандык жазасын өтөп жатса, алардын 671и баңгизат үчүн соттолгон.
Орусияда курьер болуп иштеп жүрүп маңзат менен кармалып калган кыргызстандык мигранттар соңку жылдары көбөйгөнү, бир үй-бүлөдөн бир нече адам кесилип кеткен учурлар бар экени буга чейин парламентте айтылган. Маңзат менен абакка кесилип, кийин “Вагнерге” азгырылып, Украинадагы согушта ажал тапкандар да болду.
Украина: Авдеевкадагы кармаш Бахмуттагы кыргынга айланабы?
- автор Элвира Будайчиева
Авдеевканын аскердик администрациясынын башчысы Виталий Барабаш шаар тынымсыз атылган оор артиллерияга жана аба чабуулдарына туруштук берип атканын белгиледи:
"Душман шаарды курчоого алуу аракетин көрүп, түндүк менен түштүктөн жаңы күчтөрдү тартып келүүдө. Эки күн бою алар негизинен чакан топторго бөлүнүп, коргонуудагы жылчыктарды табууга аракет кылышты, бирок майнап чыккан жок. Коргоо линиясы күчүндө", - дейт Барабаш.
25-октябрда Украинанын президенти Владимир Зеленский: "Купянскиде, Авдеевкада катаал салгылашуулар уланууда, бирок биздин жоокерлер өз позицияларын кармап турат", - деп жазды Телеграмга.
Авдеевка экинчи Бахмут болобу?
Ал эми шаар тургундары жана аны коргогон аскерлер Авдеевкадагы абалды Бахмут менен салыштырууда. Орус армиясы күн сайын эл жашаган аймакты урандыга айландырууда.
Аскердик эксперт Иван Киричевский "Настоящее время" телеканалына берген маегинде "орус армиясына Авдеевка эмне үчүн маанилүү?" деген суроого жооп берди.
"Авдеевка азыр орус аскерлеринин саны аз болсо да, шаарды курчап алуу мүмкүнчүлүгү бар жападан жалгыз жер. Фронттун башка райондорунда алардын мындай мүмкүнчүлүгү жок. Ошондуктан орустар ал жерде катуу аракет жасап жатышат, башкача айтканда, жөө аскерлерди алдыга салып, авиацияны кеңири колдонууда. Авдеевка жана Марьинка Донецкиге басып кирүүнү көзөмөлдөйт. Ошондуктан орус аскерлер эки багытта тең бирдей интенсивдүү иш алып барууда. Марьинкадан дээрлик эч нерсе калган жок. Ал эми Авдеевка үчүн дагы деле күрөшө турган нерселер бар".
Иван Киричевский Авдеевкадагы кармаш Бахмуттагы кырдаалдан эч айырмасы жок экенин жашырбайт.
"Чындыгында азыр Авдеевканын жанында болуп аткан нерселердин бардыгын, тилекке каршы, Бахмутта да көргөнбүз. Орустардын Бахмуттагы "жаңылыгы" курчоого алынган шаарлардагы инфраструктураны абадан бомбалап талкалап, шаарды коргоочуларды алсыратканы эле. Жөө аскерлердин чабуулу да орустардын ойлоп тапканы, алар ушундай эле ыкманы Бахмуттун жанында көрсөтүшкөн. Колдо болгон бардык күч-аракетти бир аймакта, кайсыл бир шаардын аймагында топтоону, тилекке каршы, орустар Бахмутта көрсөткөн", - дейт эксперт.
Согуш башталганга чейин 25 миңдей адам жашаган Авдеевка шаарында азыр 1600дөй тургун калган.
Орусиянын президенти Владимир Путин 15-октябрда мамлекеттик телеканал аркылуу сүйлөп жатып, орус армиясы "активдүү коргонуу" позициясында экенин, "кеп Купянск, Запорожье жана Авдеевка тууралуу болуп жатканын" айткан.
24-октябрда Украинанын Реинтеграция министрлиги Донецк жана Херсон облустарынын Киевдин көзөмөлүндөгү айрым жерлеринен балдар эвакуация болорун жарыялады. Мекеменин каналында айтылгандай, орус армиясы аймакты аткылап, кирип барышы ыктымалдыгынан улам мындай чара көрүлүүдө.
Донецк облусунун Бахмут жана Покровск райондорунан 250гө жакын тестиер чыгарылат. Адегенде аларды гуманитардык хабга алып келип, зарыл болгон жардам берилгенден кийин Житомирге жөнөтүшөт. Херсондогу 23 жерден 802 бала Николаев, Одесса жана Львов облустарына эвакуацияланмакчы.
Орусиянын дрон чабуулунан 16 киши жабыркады
Орусиянын армиясы 25-октябрга караган түнү Украинанын Хмельницкий облусунда да "Шахед" жанкечти-дрондору менен аткылоону улантты. Аларды абадан атып түшүргөндө, сыныктарынан Шепетовский районунда 16 киши жабыркаганын облустун аскердик администрациясынын жетекчисинин биринчи орун басары Сергей Тюрин билдирди.
Анын сөзүнө караганда, дрондун сыныктары карапайым тургундар жашаган аймакка түшкөн. Бир катар турак жайлар, автоунаалар дагы зыян тартты.
Ал эми Украинанын ички иштери министри Игорь Клименко тогуз жер там жана 11 көп кабаттуу үй, эки окуу жайы, административдик имарат, дүкөн жана автоунаалар жабыркаганын тактады. Жергиликтүү бийликтин маалыматына караганда, Орусиянын армиясы Хмельницкий облусуна төртүнчү сутка катары менен чабуул коюуда.
Украинанын түштүгүндөгү Херсон облусуна шаршембиде эртең менен абадан соккуда бир киши мүрт кеткенин облус губернатору Александр Прокудин Телеграмга жазды.
Украин күчтөрү былтыр ноябрда орус аскерлерин бир нече айга созулган кармаштан кийин дал ушул Херсон аймагынан сүрүп чыккан. Бирок орус армиясы Днепр дарыясынын аркы өйүзүнөн шаардын борборун жана анын айланасындагы аймактарды аткылоону улантууда.
Прокудиндин айтымында, акыркы 24 саатта орус күчтөрү Херсон аймагына 35 жолу абадан чабуул жасаган.
Орус аскерлери дээрлик күн сайын Херсон облусунун басып алган бөлүгүн аткылашууда. Бирок Москва согуш башталгандан бери карапайым элге багытталган чабуулду четке кагып келет.
Орусиянын Коргоо министрлиги бул кол салуу боюнча комментарий бере элек. Согуш маалында тараптардын билдирүүлөрүн көз карандысыз булактардан ырастоо мүмкүн эмес.