Украина 31-октябрда өлкөнүн ар кайсы жериндеги 118 шаар, айыл-кыштактар чабуулга кабылганын билдирди. Быйыл мынча көп сандагы калк жашаган жерлерге сокку урулганы катталган эмес. Ички иштер министрлиги 10 облус аткыланганын шаршембиде маалымдады.
Ал эми Украина армиясынын Аба күчтөрү 1-ноябрга караган түнү орус аскерлери учкучсуз учактар жана Х-59 авиациялык ракета менен чабуул койгонун билдирди. Өлкөнүн борбордук жана батыш тараптарындагы маанилүү инфраструктурага жана аскердик жайларга сокку урулду. Маалыматта украин аскерлери 20 дрондун 18ин жана бир ракетаны атып түшүргөнү айтылат.
«Азаттыктын» украин кызматы жазганына караганда, Полтаванын облустук администрациянын башчысы Филип Пронин бир дрон Кременчуг шаарындагы мунай иштетүүчү заводго тийгенин билдирди. Жетекчи өрт өчүрүлгөнүн, алдын ала маалыматтарга ылайык эч ким жабыркабаганын, ишкана иштебей турганын айтты.
Хмельницкий, Кировоград, Полтава жана дагы бир нече облустарда сокку ыктымалдагын эскерткен сиреналар жаңырып турду.
Түнкү аткылоодон Харьков облусунда бир киши окко учканы, экинчиси жараат алганы украин Ички иштер министрлигинин маалыматында жазылган.
Донецкиде бир киши каза тапты, Херсондо экөө жараат алып, бирөө мүрт кетти.
Орусия 31-октябрдын отчетторунда куралдуу күчтөрү Бахмуттун айланасында ийгиликтүү чабуул койгонун билдирди.
Согуш шартында касташкан тараптардын маалыматтарын дароо текшерүү мүмкүн эмес.
Орусия Украинага басып киргенден бери Волга боюндагы аймактан чыккан кеминде 7169 киши каза болду. Бул тууралуу тиешелүү статистиканы жургүзгөн «Азаттыктын» татар-башкыр редакциясы («Idel.Реалии») жазды. Тизмеде башкыртостандык миңден ашуун кишинин ысымы бар. Экинчи сапта Самара облусу турат, журналисттер ал жерлик 933 кишинин өлүмүн тактай алган.
Тизмени түзгөндө алар орус тарап моюнга алган, жакындары, окуу жайлар же башка мекемелер бышыктаган учурларды гана алган. Жоготуулардын чыныгы саны мындан ашышы мүмкүн. Орусиянын Коргоо министрлиги согушта канча аскер каза болгонун ачыктабайт жана журналисттердин маалыматтарын комментарийлебейт. Акыркы жолу министрлик былтыр сентябрда 5937 жоокер набыт кеткенин билдирген.
«Idel.Реалии» жазганына караганда, Башкортостанда сегиз батальондун куралганы же ал жараян башталганы белгилүү. 2022-жылы үч батальон урушка жөнөтүлгөн.
Би-Би-Синин орус кызматы жана «Медиазона» сайты 20-октябрга карай орус армиясынын 34 857 аскери Украинадагы согушта каза тапканын кабарлады. Алар эсепти ачык булактардагы маалыматтарга таянып чыгарып турат.
БУУнун Адам укуктары боюнча кеңсеси Украинанын Гроза айылында 59 кишинин өмүрүн алган сокку үчүн Орусиянын аскерлери жооптуу деп айтууга “олуттуу негиз” бар деген жыйынтыкка келди. Кеңсенин отчётунда ошол маалда ал жерде эч кандай “аскердик бута” же “аскер кызматкерлери” болгонуна далил табылбаганы айтылат.
5-октябрда Харьков облусундагы Гроза айылынын кафесинде согушта курман болгон жоокерди эскерип жатышканда ракетадан сокку урулуп, 59 жайкын тургун набыт болгон. Тергөөчүлөр ал жай атайылап бутага алынган, орус аскерлерине ушу тапта Орусияда жашап жаткан эки жергиликтүү тургун жардам берген деп эсептешет.
Адам укуктары боюнча кеңсе “орус куралдуу күчтөрү бута аскердик объект эмес экенин аныктоо аракетин көргөн эмес же атайылап жарандык жайды бутага алган” деген бүтүмгө келди. Курман болгондордун арасында наристе болгон.
Сокку болжол менен "Искандер" комплексинен урулган.
Орусиянын БУУдагы элчиси Василий Небензя ошондо Коопсуздук кеңешинин жыйынында "Грозада белгилүү улутчулду эскерип жатышат, ал жакта неонацисттер чогулду" деп айткан.
Украин президенти Владимир Зеленский соккуну “атайылап жасалган теракт” деп атаган. БУУнун баш катчысы Антониу Гутерриш мындай чабуулдарды токтотууну талап кылган.
Улуттар Уюмунун 29-августта тараткан маалыматына караганда, согуш башталган былтыркы февралдан бери Украинада 9 жарым миңден ашык карапайым кишинин өмүрү кыйылды.