Украина Орусия көзөмөлдөгөн Мелитопол шаарында "жергиликтүү каршылык көрсөтүү кыймылдары" уюштурган чабуулдан үч орус офицери өлгөнүн билдирди.
Украинанын Коргоо министрлигинин Башкы чалгын башкармалыгы 12-ноябрда Телеграмдагы каналына жазгандай, Мелитополдогу орус күчтөрү басып алып, өз штабына айландырган "Жаңы почта" аттуу имаратта ишемби күнү жардыруу болгон. Башкармалык бул жардыруу Орусиянын Федералдык коопсуздук кызматынын жана Росгвардиянын өкүлдөрүнүн жолугушуусу өтүп жаткан учурда болгонун кабарлап, аны "өч алуу акциясы" деп сыпаттады.
"Баскынчылардын штабындагы жардыруудан улам Росгвардиянын кеминде үч офицери жок кылынды. Калган жоготуулар тууралуу маалымат такталып жатат. Соккудан кийин Мелитополдо башаламан кырдаал жаралды", - деп айтылат билдирүүдө.
Бул маалыматты көз карандысыз булактар аркылуу ырастоо мүмкүн боло элек. Орусия Мелитополдогу жардыруу тууралуу маалымат бере элек.
Украинанын чалгын кызматынын билдирүүсүнөн Мелитополдогу штабдын жанында автоунаа жарылганын түшүнүүгө болот.
Украинанын түштүк-чыгышындагы Мелитопол шаарында согушка чейин 150 миңдей адам жашап турган. Орус күчтөрү бул шаарды былтыр февраль айынын соңунда ээлеп алган.
Орусиянын Тергөө комитети Рязан облусундагы темир жол кырсыгына байланыштуу кылмыш ишин террордук акт жана жардыргыч затты мыйзамсыз алуу, өткөрүп берүү жана сактоо тууралуу беренелердин негизинде козгогонун 11-ноябрда мекеменин басма сөз кызматы билдирди.
Тергөөчүлөрдүн маалыматына караганда, “Рыбное” жана “Блок Пост 204-километр” станцияларынын ортосундагы аралыкта колго жасалган жардыргыч жарылып, 19 вагон рельстен чыгып кеткен, алардын 15и талкаланган.
Окуя 11-ноябрда эртең менен болгон. “Москва темир жолу” ишканасы “сырттан кийлигишүүнүн натыйжасында” темир жол кырсыгы болгонун, жүк ташыган вагондор рельстен чыгып кетер алдында жарылууну укканын жергиликтүү тургундар айтып беришкенин, адамдардан эч ким жабыркабаганын, экологияга зыян тийбегенин билдирген.
Орусияда соңку жарым жыл ичинде темир жолдогу диверсия окуялары дээрлик эки эсе көбөйдү.
"Агентство" басылмасы Рязандагы окуя Москвага жакын катталган алгачкы диверсия экенин белгиледи.
"Медиазона" Орусия Украинага кол салгандан бери бул өлкөнүн темир жол тармагындагы диверсияларга байланыштуу 150дөй кылмыш иши козголгонун жазды.
Мындай кылмыш үчүн өлүм жазасына тартууга чейинки чаралар каралган.
Кылмышка шектелип кармалгандардын үчтөн бири өспүрүмдөр.
11-ноябрда Украинада Орусиянын ракеталык аткылоосунан 18 жеке турак жай жана бир ишкананын имараты талкаланганын Киев облустук аскердик администрациясы кабарлады. Жарылуунун күчүнөн жана ракетанын сыныктарынан үйлөрдүн эшик-терезелери сынып, чатырлары жабыркады.
Ишемби күнү Орусия соңку эки айдан бери алгачкы жолу Киевге баллистикалык ракеталар менен чабуул жасады, алардын баарын Украинанын абадан коргонуу системалары атып түшүргөнү кабарланды.
Украин аскерлеринин айтымында, ракеталар Курск же Брянск облустарынын аймагынан атылган болушу ыктымал.
Орусия Украинага 2022-жылдын февраль айында кол салгандан бери кармаш уланууда.
Киев шаарында 11-ноябрь эртең менен аба коркунучу тууралуу эскертүү жаңырып, бир нече катуу жарылуу болду. Шаар мэри Виталий Кличко жарылууну Киевге жакын жердеги абадан коргонуу күчтөрүнүн иштегенине байланыштырды.
Ага чейин Би-Би-Синин орус кызматы украин армиясынын өкүлү Юрий Игнат "алдын ала маалымат боюнча орус куралдуу күчтөрү Киевге баллистикалык ракета менен сокку урууга аракет кылганын билдирди" деп жазган.
10-ноябрдын кечинде орус күчтөрү учкучсуз учактарын кое берип, аба коркунучу тууралуу эскертүү жаңырганын кабарланган. Украин армиясы беш учкучсуз учак жол кылынганын билдирди.
Украинанын куралдуу күчтөрүнүн Башкы штабынын маалыматында, өлкө аймагы бир сутка ичинде орусиялык армияны бир ракеталык, 46 жолу аба, 30дан ашык жапырт аткылоо системасынын соккусуна кабылды.
Орусиянын Коргоо министрлиги жума күнү эки украиналык учкучсуз аппарат Смоленск, Москва облустарынын аймагында жок кылынганын билдирди. Киев бул боюнча комментарий берген жок.
Согуш маалында тараптардын билдирүүлөрүн көз карандысыз булактардан ырастоо мүмкүн эмес. Орусия Украинага 2022-жылдын февралында кол салгандан бери кармаш уланууда.