Финляндиянын бийлиги Орусия менен чек арасындагы бир гана - түндүктөгү эң ыраак өткөрмө бекетинен башка бардык бекеттерин жабууну чечти. Бул тууралуу Финляндиянын премьер-министри Петтери Орппо шаршембиде билдирди.
Фин-орус чек арасындагы бир гана "Райа-Йоосеппи" көзөмөл өткөрмө бекети ачык болот. Аталган бекет Орусиянын Мурманск шаарынан 240 чакырым алыстыкта жайгашкан. Калган чек ара бекеттери 25-ноябрдан кеминде 23-декабрга чейин жабылат.
Хельсинки Москва үчүнчү өлкөлөрдүн жарандарын атайылап фин тарапка өткөрүп жатат деп эсептейт. Кремль бул айыптоону четке кагып келет.
Финляндиянын тышкы иштер министри Элина Валтонендин сөзүнө караганда, зарылчылык болсо Орусия менен чек ара толук жабылышы да ыктымал.
Финляндиялык Yle медиасы маалымдагандай, ноябрдын башынан бери Орусиядан фин тарапка башпаанек сураган 500дөн ашуун адам өткөн. Алардын ичинде Сирия, Йемен, Ирак, Сомали жана башка өлкөлөрдүн жарандары бар. Дем алыш күндөрү түштүк-чыгыш чек арасындагы "Вартиус" бекетинен 83 адам башпаанек сурап өтсө, шаршемби күнү эле "Вартиус" жана "Салла" өткөрмө бекеттеринен үчүнчү өлкөлөрдүн 75 жараны кирген.
Фин-орус чек арасында унаа өтүүчү сегиз өткөрмө бекети бар. 19-ноябрга караган түнү алардын Санкт-Петербург шаарына жакын жайгашкан төртөө 18-февралга чейинки мөөнөткө жабылган. Карелия жана Мурманск облустары менен чектешкен төрт чек ара бекети иштеп жатат.
Орусиядагы бир катар "Русское радио", "Хит FM" жана "Монте-Карло" радиолорунун башын бириктирген "Русская медиагруппа" медиахолдингинин ээси, ишкер Владимир Киселёв өкмөт уюштуруп жаткан патриоттук митинг-концерттерди сындады. Бул тууралуу The Moscow Times басылмасы маалымдады.
Киселёв НТВ телеканалында сүйлөп жатып, мындай митингдердин "пайдасыздыгын" айтты. Ал 29-сентябрда Кызыл Аянтта украин аймактарынын аннексияланышынын мааракесине арналып уюштурулган иш-чараны мисал келтирди. Ал концерттин "Бир өлкө, бир үй-бүлө, бир Орусия" деп аталган чакырыгын сындады.
"Кимдир-бирөө бул деген фашисттик Германиянын - бир фюрер, бир эл, бир өлкө" деген чакырыгы экенин ойлодубу?", - деген Киселёв иш-чаранын уюштуруучуларын "бешинчи колоннага" теңеди.
Ал ошондой эле 29-сентябрдагы митинг-концертке элди акча төлөп чакырышканын да билдирди. "Москва жана Подмосковьенин тургундарын акча төлөп алып келүүдөн башка нерсе ойлоруна да келбейт. Баарынан да жапайычылыгы - аларга акчасын митинг аяктаганда, үч саат кетпей турса гана берүүнү ойлоп табышыптыр", - деди Киселёв.
The Moscow Times белгилегендей, ишкер Орусия президенти Владимир Путиндин жакын чөйрөсүндөгү адамдарын бири. Анын фонду Путиндин катышуусу менен иш-чараларды өткөрүп келген.
Forbes 2011-жылы Путин Киселёвдун баласынын өкүл атасы (крёстным отцом) болгонун жазып чыккан.
Днепропетровск облусунун администрация башчысы Сергей Лысак орус армиясынын аткылоосунан Никопол шаарында эки киши жарадар болгонун билдирди.
"Кечээтен бери оккупанттар Никополду төрт жолу оор артиллериядан аткылашты. Райондун борборунда 61 жана 37 жаштагы эки эркек киши жарадар болду. Жети жер там, гараж, газ түтүгү жана бир автоунаа зыян тартты. 1200 түтүн электр жарыгысыз калды", - деп жазды Лысак 22-ноябрда Телеграм-каналына.
Анын айтымында, орус аскерлери Марганец деген жерди да аткылашты. Ал жерде эч ким жабыр тарткан жок.
Орус куралдуу күчтөрү Украинанын калк жашаган айыл-кыштактарына, шаарларына пилотсуз учактардан, ракеталардан, артиллериядан сокку уруп келет. Далилдер барына карабай, Москва аскердик жайларды гана бутага алганын айтууда.
Шаршембиде украин армиясынын Аба күчтөрүнүн командачылыгы 21-ноябрдын кечинде жана түн ичинде орусиялык аскерлер 14 Shahed дрону менен чабуул койгонун, бардыгы атып түшүрүлгөнүн билдирди. Ту22М3 учагынан Х-22 канаттуу ракетасы учурулганы, ал Запорожье облусуна кулаганы жана инфраструктурага зыян келтирилгени маалымдалды.
Ал тапта Орусиянын Коргоо министрлиги абадан коргонуу аскерлери оккупацияланган Крымдын үстүндө украиналык үч дронду жана жарым аралга бет алган төрт деңиз дронун жок кылышканын билдирди
Бул маалыматтарды көз карандысыз булактардан текшерүү мүмкүн эмес.
Согуш майданында акыркы 24 саатта 48 кармаш жүргөнүн украин аскерлерине шилтеме кылып, “Азаттыктын” украин кызматы жазды.
АКШ администрациясы чалгын кызматынын жакында ачыкка чыккан маалыматын жарыялады.
Ага ылайык, Орусиянын "Вагнер" менчик аскердик компаниясы ливандык "Хезболла" уюмуна же аны менен байланыштагы Иранга абадан коргонуу системасын өткөрүп берүүгө даярдык көргөн.
Бул тууралуу CNN телеканалы Ак үйдүн улуттук коопсуздук кеңешинин маалымат катчысы Жон Кирбиге шилтеме берип кабарлады. Анын айтымында, "вагнерчилер" куралды орус өкмөтүнүн көрсөтмөсү менен берүүгө даярданган. Москва бул билдирүүгө азырынча комментарий берген жок.
"Хезболла" АКШда террордук уюм деп таанылган.
Чалгынчылардын маалыматында ал система кайсы жерден берилиши керкетиги такталган эмес. Бирок октябрда америкалык телеканал "Вагнер" компаниясына Сириянын аймагынан шииттердин тобуна "Панцирь С-1" зениттик-ракеталык комплексти жеткирүү тапшырмасы берилгенин, ага сириялык президент Башар Асад макул болгонун кабарлаган.
Кирби Вашингтон "вагнерчилердин" "Хезболланы" же Иранды аскердик техника менен камсыздаганына жакындан байкоо саларын, терроризмге каршы аракеттердин алкагында керек болсо орусиялык уюмдарга же адамдарга санкция салуу караларын белгиледи.
АКШ буга чейин "Хезболлага" жана иранчыл башка топторго Газадагы согушка аралашпоону эскерткен.
Ноябрдын башында Мамлекеттик Думанын өкүлү Андрей Картаполов "Вагнер" жоюлганын, анын катарындагы согушкерлер башка топторго же армияга өтүп жатканын билдирген.