АКШ президенти Жо Байден Орусиянын лидери Владимир Путин “АКШ Украинага жардам бере албайт деп үмүттөнбөй эле койсо болот” деп билдирди.
Байден 12-декабрда Украинанын президенти Владимир Зеленскийди кабыл алгандан кийинки маалымат жыйында республикачылар кошумча жардам бөлүүгө каршы чыгып жатканына карабастан Киевге колдоону улантууну убада кылды.
АКШ президенти Киевдин Москванын чабуулуна туруштук бере алганын "жеңиш" деп атады.
Байден Конгрессти Украинага кошумча жардам бөлүүнү караган мыйзам долбоорун колдоп берүүгө чакырып, бул Киевдин согуштагы жеңишин камсыздай турган мүмкүнчүлүк экенин белгиледи.
Зеленский өз кезегинде Орусиянын президенти Владимир Путин Украинага каршы бир да согушта жеңишке жетпегенин белгиледи.
Украинанын президенти ошондой эле АКШ сенаторлору менен жолугуп, Өкүлдөр палатасынын республикачы спикери Майк Жонсон менен өз алдынча сүйлөштү.
Жолугушуудан кийин Жонсон Украинага кошумча жардам берүүгө каршы экенин айтты.
АКШнын Сенаты 6-декабрдын кечинде Украина жана Израилге аскердик, Газага гуманитардык жардам берүү каралган мыйзам долбоорун колдобой койгон.
Октябрдын аягында президент Жо Байден Конгресстен эл аралык коопсуздукка жумшалчу каражатты бекитүүнү өтүнгөн. Украинага ал пакеттин алкагында 61 млрд доллар берилмек.
Республикачыл мыйзам чыгаруучулардын көбү Киевге жардам берүүнү улантууну колдогону менен, мыйзамсыз иммиграцияга каршы күрөштү күчөтүүнү талап кылууда.
Орусиянын армиясы 13-декабрга караган түнү Украинанын баш калаасы Киевге ракеталык сокку урду. Шаар мэри Виталий Кличконун айтымында, чабуулдан 53 киши жабыркады. Алардын 20сы ооруканага жеткирилди. Арасында он чакты бала бар.
Киев облустук администрациясы билдиргендей, Голосеевский районунда ракетанын сыныгы жолдун боюна түшкөн. Дарницкий районунда менчик үй жабыркап, өрткө чалдыкты. Деснянский районунда тогуз кабат үйдүн жетинчи кабатында өрт тутанды. Сегиз автоунаа зыянга учурады. Днепровский районунда балдар ооруканасы талкаланды.
Жалпысынан Орусия он ракета менен сокку урган. Украин армиясы билдиргендей, алардын баары абадан атып түшүрүлгөн.
Андан тышкары 12-декабрдын кечинде Одесса облусуна орус армиясы он дрон учурулуп, баары абадан атып түшүрүлдү. Учкучсуз аппараттын калдыгы автоунаа оңдогон жайга түшкөн. Эки киши жараат алып, 11 машинеге зыян келтирилген.
Буга чейин АКШ Орусиянын армиясы Украинадагы жарандык инфратүзүмдөргө соккуларын күчөткөнүн билдирген.
Орусиянын Коргоо министрлиги ар кандай далилдерге карабастан, аскердик жайларга гана сокку уруп жатканын билдирип келет.
Украинадагы “Киевстар” ири уюлдук операторунун миллиондогон абоненттери 12-декабрда байланышсыз калышты. Компания мунун себебин хакердик чабуул менен түшүндүрдү. Forbes журналынын украин редакциясы жазгандай, компаниянын 24 миллион абоненти бар.
Dev.ua басылмасы өз булактарына таянып, хакерлер компаниянын борбордук түйүндөрүнө чабуул койгонун жазды.
Ишкананын генералдык директору Александр Комаров кол салуу Орусия ачкан согуштун “жыйынтыгы” экенин белгиледи.
Украинанын Коопсуздук кызматы уюлдук операторго жасалган чабуулду аймактык бүтүндүккө кол салуу жана мамлекеттик чыккынчылык беренелери боюнча иликтеп жатканы маалымдалган.
Атайын кызмат бул чабуулдун артында Орусиянын коопсуздук кызматтары турат деп эсептейт.
Кремль комментарий бере элек.
- автор Айнура Жекше кызы
Украинанын президенти Владимир Зеленский АКШдагы сапары учурунда Киевдин аскердик жардамга муктаж экенин түшүндүрүүгө аракеттенүүдө. 12-декабрда Зеленский президент Жо Байден менен жолугушуп, Сенатка кайрылмакчы.
Өткөн аптада республикачыл сенаторлор Украина жана Израилге аскердик жардам берүү каралган мыйзам долбоорун колдобой койгон. Ал эми ушул жумада Еврошаркет Украина менен мүчөлүк жөнүндө сүйлөшүүлөрүн баштоо-баштабоо маселесин чечүүгө тийиш.
Украинанын үмүтү
Дүйшөмбүдө украин мамлекет башчысы АКШнын Улуттук коргонуу университетинде сүйлөгөндө Вашингтонго буга чейинки жардамы үчүн ыраазычылыгын билдирип, колдоо мындан ары да уланат деп ишенерин айтты:
"Бүтүндөй дүйнө бизге назарын бурууда, башка эркин өлкөлөрдү өз алдынча жашоо же чөгөлөп калуу тагдыры күтүшү мүмкүн экенине күбө болууда. Украина багынган жок жана багынбайт. Биз эмне кылууну билебиз, сиздер Украинага ишенсеңер болот, биз дагы силерге таяна алабыз деп үмүттөнөм”.
Өткөн аптада АКШнын Сенаты Украина жана Израилге аскердик жардам берүү маселеси каралган мыйзам долбоорун колдобой койгон. Республикачылар адегенде Мексика менен чек араны бекемдөөгө, мыйзамсыз иммиграцияга каршы күрөшкө көбүрөөк каражат бөлүүнү талап кылууда.
Октябрдын аягында президент Байден Конгресстен эл аралык коопсуздукка жумшалчу каражатты бекитүүнү өтүнгөн. Украинага ал пакеттин алкагында 61 млрд доллар берилмек.
Ак үй Киевге аскердик жардам жанданбаса, согуш Орусиянын жеңишине алып келип, Кошмо Штаттардын коопсуздугуна коркунуч жаралышы мүмкүн экенин эскерткен.
Дүйшөмбүдө АКШнын Улуттук коопсуздук кеңешинин расмий өкүлү Жон Кирби президент Конгрессти Киевге кошумча жардам бөлүүгө ынандыруу аракетин улантканын, айдын аягына чейин маселе оңунан чечилип калышы мүмкүн экенин билдирди.
Орусия кошуна өлкөсүнө согуш ачкан 2022-жылдын февраль айынан бери Вашингтон Киевге жалпысынан 110 млрд доллардан көп жардам берди.
Ошол эле күнү Эл аралык валюта фондунун төрайымы Кристалина Георгиева Зеленский менен жолугушууда Украинага 900 миллион доллар кредит бөлүү чечими жактырылганын айтты.
Кремлдин басма сөз катчысы Дмитрий Песков Москва Зеленский менен Байдендин сүйлөшүүсүнө жакындан байкоо саларын билдирди:
"Украинага берилген ондогон миллиард доллар согуш талаасында ийгиликке жетүүгө жардам бербегенин түшүнүү керек. Украина өз экономикасы үчүн алууну көздөгөн мындан аркы он миллиарддаган доллардын тагдыры да ушундай болот".
Еврошаркетке мүчөлүк маселеси
Украин президенти АКШга Буэнос-Айрестен кийин барды. Согуш башталгандан бери Латын Америкасындагы алгачкы сапарында ал Аргентинанын жаңы президенти Хавьер Милейдин ант берүү аземине катышты. Ал өлкөнүн сенатынын Ютуб каналы тараткан видеодо Зеленский менен Венгриянын премьер-министри Виктор Орбандын 20 секундадай сүйлөшкөнүн көрүүгө болот. Дүйшөмбүнүн кечинде Телеграм-каналына чыккан кайрылуусунда украин президенти “ачык-айкын сөздөр айтылганын, кеп европалык иштер тууралуу жүргөнүн” билдирди.
Орбан Евробиримдиктин Киевге кошумча жардамына бөгөт коёрун, Украинанын шаркетке мүчө болуп киришине каршы болорун эскертип келатат.
Мүчөлүк тууралуу сүйлөшүүлөрдү баштоо же баштабоо маселеси 14-15-декабрь күндөрү Брюсселдеги саммитте каралмакчы.
Брюссель Киевге талапкер макамын Москва согуш ачкандан 4 ай өткөндө ыйгарган. Мунун арты менен Украинада Еврокомиссия белгилеген артыкчылыктуу тармактарда реформалар башталган. Өткөн айда комиссия 7 сунуштун төртөө аткарылганын билдирген.
Ал эми 8-декабрга карай украиналык депутаттар дээрлик бардык талаптарга жооп берген мыйзамды кабыл алышты.
Майдандагы абал оор бойдон калууда
Маалыматтарга караганда, орус аскерлери Лиман, Бахмут жана Авдеевка багыттарында жоготууларга учураганы менен, жай болсо да, алдыга жылууда. Украин армиясы дүйшөмбүнүн кечинде жана шейшембиге караган түнү 15 дрондун тогузун жана эки канаттуу ракетаны атып түшүргөнүн билдирди. Калган дрондор кайда түшкөнү айтылган жок.
Харьков облусунун жетекчиси Олег Синегубов Купянск шаарын аткылоо маалында жергиликтүү тургун набыт болгонун, дагы бирөө жараат алганын Телеграм каналына жазып, сүрөттөрдү жарыялады.
11-декабрда украин башкалаасы баллистикалык ракеталардын соккусуна кабылганы кабарланган.