Украина согушта каза болгон дагы 100 аскер кызматкеринин сөөгүн Орусиядан кайтарып алганын бүгүн 15-мартта өлкөнүн аскер туткундары боюнча координациялык штабы билдирди.
Куралдуу күчтөрдүн тийиштүү бөлүктөрү маркумдардын сөөгүн укук тартибин коргоо органдарына жана соттук-медициналык эксперттерге өткөрүп берип жатышканы, идентификация иши аяктагандан кийин туугандарынын колуна берилери маалымдалды.
Буга чейин Украина 58 аскеринин сөөгүн кайтарып алган, Орусияга 61 сөөктү өткөрүп берген.
Координациялык штабдын ишине Кызыл Чырым эл аралык уюму, Украинанын Коопсуздук кызматы, Ички иштер министрлиги жана башка мекемелердин өкүлдөрү көмөк көрсөтүүдө.
АКШда Украинага аскердик жардам боюнча ленд-лиз, башкача айтканда, насыя программасын иштеп чыгуу аракети көрүлүп жатканын сенатор Маркуэйн Маллин (Оклахома штатынан шайланган республикачы) билдирди.
14-мартта ал Арканзаста курал-жарак жасалуучу заводго барганда Украинага кошумча аскердик жардам демилгесин колдой турганын айтты.
Макрон: Эгер Орусия согушта жеңсе, Европага ишеним нөлгө түшөт
Франциянын президенти Эммануэл Макрон 14-мартта TF1 жана France 2 каналына интервью берип, жакында эле батыш өлкөлөрүнөн Украинага аскер жөнөтүү сунушун түшүндүрдү.
"Бизде максат бар. Орусия бул согушта жеңүүчү болбошу керек. Эки жыл катары менен биз Украинага жардам берип келдик. Эгер иш начарласа, бул үчүн жоопкерчилик Орусияда. Украинада Европа үчүн экзистенциялык мааниси бар согуш жүрүп жатат. Биз Орусия менен согушкан жокпуз. Бирок биз "Орусиянын жеңип алуусуна жол бербеш керек" деп ачык айтканыбыз оң. Эгер Орусия жеңсе, Европада мындан ары коопсуз болбойт".
Макрон андан ары Франция газга жана буудайга баанын өзгөрүшүнөн, экономикалык чынжыр үзүлгөнүнөн жабыр тартып жатканын билдирди. Француз лидеринин айтымында Орусия согушта жеңсе, Европага ишеним "нөлгө" түшөт. Макрон Украинага француз аскерлерин жөнөтүү ниетинен баш тартпаганын, бирок азырынча ал тууралуу азырынча сөз жок экенине, аскерлер кол салууга катышпай турганына токтолгон.
Орусиянын президенти Владимир Путиндин опузасы тууралуу сөз кылганда, Макрон өзөктүк курал "коркутуунун куралы" эмес, коопсуздуктун ачкычы болушу керектигин айтты. "Биздин өзөктүк дараметибиз бизге коопсуздук тартуулайт" деди Франциянын президенти. Макрон андан тышкары Путин менен диалогду улантуу мүмкүн экенине токтолгон. Президенттер ким болбосун эки өлкө келечекте эки тараптуу мамилени талкуулай турган күн келерине үмүт арткан.
Учкучсуз учактар Калуга облусундагы мунай иштетүүчү заводго чабуул койду
Украинанын учкучсуз учактары жумага караган түнү Орусиянын Калуга облусундагы Полотняный кыштагындагы мунай иштетүүчү өндүрүшкө чабуул койду. Бул тууралуу украиналык медиалар өлкөнүн Коргоо министрлигинин Башкы чалгын кызматындагы булактарына таянуу менен билдирди. Учкучсуз учактын чабуулунун кесепетинен өрт чыккан видео да тарады.
Ал эми Орусиянын Коргоо министрлиги жана Калуга облусунун губернатору Владислав Шапша төрт дрон атып түшүрүлгөнүн, жабыр тарткандар жана чыгым тарткандар жок экенин билдирди. "База" Телеграм-каналы "бардык дрондор атып түшүрүлгөнүн, бирөө түтүккө тыгылып калганы үчүн өрт чыкканын" жазды. Өрт убагында өчүрүлгөнү айтылууда. Завод ишин токтоткону тууралуу азырынча маалымат жок.
Акыркы жумада Орусиянын аймагындагы беш мунай иштетүүчү завод чабуулга кабылып, айрымдары чыгым тарткан.