Украинанын Орусия көзөмөлдөгөн Запорожье облусунун Токмак шаарында уранды астынан дагы төрт адамдын сөөгү алынды. Ошентип, кечээ кечинде болгон атышуудан каза болгондордун саны онго жетти. Бул тууралуу Орусия дайындаган аймактын башчысы Евгений Балицкий билдирди.
Каза болгондордун арасында үч бала бар. Эки адам дайынсыз, он сегиз адам жабыркаганы айтылууда.
Ишемби күнү эртең менен уранды астынан беш адам куткарылды.
"Денеси күйгөн жана жараат алган адамдар медициналык мекемеге жеткирилди, алардын үчөөнүн абалы оор", - деп жазды Балицкий.
12-апрель күнү кечинде Балицкий Украинанын аскерлери тарабынан Токмактагы көп батирлүү үйлөр аткыланганын билдирген. Натыйжада жеке сектордогу 25 үй жана көп кабаттуу 9 үй газсыз калган.
Бул окуяга Украина тарап комментарий берген жок.
- Запорожье облусундагы Токмак шаары орус аскерлеринин көзөмөлүндө. Запорожье облусунун бир бөлүгүн согуш башталганда эле Орусия басып алган, бирок анын борбору Запорожье шаары Украинанын көзөмөлүндө турат.
- 2022-жылы сентябрда Владимир Путин Запорожье облусунун Орусияга кошулуусу тууралуу жарлыкка кол койгон. Бул чечимди дүйнө өлкөлөрүнүн көпчүлүгү тааныган эмес.
12-апрелге караган түнү Орусиянын армиясы Украинанын аймагына 17 “Шахед” жанкечти дрону жана Х-59 башкарылуучу авиациялык ракета менен сокку урду.
Бул тууралуу украин Куралдуу күчтөрүнүн башкармалыгы билдирди. Маалыматка караганда, дрондор аннексияланган Крымдын Чауда тумшугунан, ал эми ракета Донецк облусунун оккупацияланган бөлүгүнөн учурулган.
Николаев, Одесса, Херсон, Днепропетровск, Винница, Хмельницк облустарында 16 дрон абадан атып түшүрүлгөнү кабарланды.
Днепропетровск облусунда дрондун калдыктары маанилүү инфратүзүм объектисинин аймагына кулап, өрт тутанган.
Ал арада Орусиянын Коргоо министрлиги Ростов жана Белгород облустарында беш дрон атып түшүрүлгөнүн билдирди. “Астра” Телеграм-каналы өз булактарына таянып, дрон чабуулу Ростов облусундагы Новошахтинск мунай иштетүүчү заводуна жасалганын жазды. Атып түшүрүлгөн аппараттардын бири заводдун аймагынан табылган.
Буга чейин “Настоящее время” телеканалы маалымдагандай, жыл башынан бери украиналык дрондор Орусиянын 10 регионундагы 15 мунай иштетүүчү заводуна сокку урган.
10-апрелде Брюсселде уюмдун кеңсесинде Финляндиянын президенти Александр Стубб менен сүйлөшүү жүргүзгөн НАТОнун башкы катчысы Йенс Столтенберг бул маселеге токтолуп, Украина агрессиядан коргонуп жаткан өлкө болгондуктан сырттагы "легитимдүү аскердик максаттарды" бутага алууга укугу бар экенин билдирди.
Анын белгилешинче: "Эл аралык укук ченемдерине ылайык, Украина өзүн өзү коргоо укугуна ээ. Мындай укук Бириккен Улуттар Уюмунун (БУУ) Уставында да жазылган. Биз ага НАТОнун мүчөлөрүн бул кармашка катыштырбай жардам бере алабыз. Өзүн өзү коргоо – бул Украина өзүн коргош үчүн сыртка да сокку ура алат дегенди туюндурат".
9-апрелде Bloomberg АКШнын коргоо министри Ллойд Остинге шилтеме берип, украин куралдуу күчтөрүнүн Орусиянын мунай иштетүү заводдоруна урган соккулары дүйнөнүн энергетика тармагына залака тийгизерин маалымдады.
Көптөгөн фото жана видео далилдерге карабастан, расмий Москва Украинадагы жарандык жайларга сокку урганын танып, аскердик объектилерди гана бутага алганын билдирип келет. Ал эми украин бийлиги Орусиянын аймагындагы мунай иштетүүчү заводдорго жасалган соккулар үчүн расмий жоопкерчилик ала элек.
Украин парламенти мобилизациялоо тууралуу мыйзам долбоорун жактырды. Мыйзам бүгүн 11-апрелде Жогорку Радада экинчи, жыйынтыктоочу окууда каралып, кабыл алынды.
Ага «макул» деп добуш берген 283 депутат бийликтеги "Слуга народа" партиясынын жана башка бир катар фракциялардын өкүлдөрү болду.
Долбоордо үч жыл кызмат өтөгөндөн кийин аскерден бошотуу тууралуу да жобо бар эле. Бирок аны Украинанын Куралдуу күчтөрүнүн Башкы командачысы Александр Сырскийдин өтүнүчү менен алып коюшканы белгилүү болду.
Демобилизация тууралуу мыйзам өзүнчө иштелип чыгары айтылды.
Украина 2022-жылдын февраль айынан бери Орусиянын толук масштабдуу кол салуусуна каршы согушуп келе жатат.
3-апрелде Зеленский аскерге 500 миң кишини мобилизациялоо зарылчылыгы азырынча жок экенин айткан. Бирок, анын белгилешинче, бул «адилеттик маселеси», анткени азыр согуш талаасында жүргөндөр нааразылык айтпаганын алар эс албашы же ордуна башкалар барбашы керек деп кабыл алуу туура эмес. Былтыр 19-декабрдагы пресс-конференцияда Зеленскийдин аскерге 500 миң кишини чакыруу тууралуу сунуш болуп жатканы жөнүндөгү билдирүүсү кызуу талкуу жараткан.
2-апрелде украин президенти аскерге мобилизациялоого 27 эмес, 25 жаштан алуу тууралуу мыйзамга кол койгон.
Украина 11-апрелге караган түнү Орусиянын топтоштурулган жапырт ракеталык жана дрон чабуулуна кабылганын, бутага негизинен энергетика объектилери алынганын билдирди. Харьков, Одесса, Львов, Запорожье жана Киев облустарында 200дөй куткаруучу иштеп жатканын, адамдар арасында жабыркагандар жок экенин, эгер зарыл болсо мобилдик генератордук станциялар орнотуларын өлкөнүн Өзгөчө кырдаалдар боюнча мамлекеттик кызматы билдирди.
Украин президенти Владимир Зеленский Орусия бул жолу 40тан ашуун ракета жана сокку уруучу 40 дрон колдонгонун айтып, алардын кайсы бир бөлүгү гана кармалганын, абадан коргонуу системаларына болгон муктаждык «өтө курч» болуп жатканын билдирди.
“Дүйнө дал ушул жерде, дал азыр, дал биздин орусиялык террорду жеңүү мүмкүнчүлүгүбүз аркылуу террор кылмыш катары кабылданарын далилдей алат. Көздү жумуп отура берүү жана узакка созулган талкуу эмес, абадан коргонуу жана башка коргоо жардамы керек”, - деп жазды Зеленский социалдык түйүндөрдөгү баракчасына.
Газ транзити үчүн жооптуу «Нафтогаз Украина» ишканасы 11-апрелдин таңында орусиялык аскерлер газды жер алдында сактоочу эки кампаны бутага алганын, чабуулдун кесепетин жоюу иштери жүрүп жатканын маалымдады.
Украинанын Куралдуу күчтөрүнүн басма сөз кызматынын маалыматына караганда, жалпысынан бейшембиге караган түнү Орусия чабуул коюучу 82 каражат колдонду, алардын арасынан 57 ракета жана дрон атып түшүрүлдү. Канаттуу Х-101/Х-555 ракетасынан 20, баллистикалык Х-47М2 «Кинжал» ракетасынан алтоо, баллистических С-300 ракетасынан 12, учкучсуз «Шахед» учактарынан 40 жана башкарылуучу Х-59 авиаракетасынан төртөө колдонулганы маалымдалды.
Владимир Зеленский АКШ убада кылган аскердик жардам берилбесе бул согушта жеңилиши мүмкүндүгүн 8-апрелде эскерткен. Кошмо Штаттарда былтыртан бери Украинага жардам боюнча бир нече демилге көтөрүлүп, талкууланып, бирок кабыл алынбай келе жатат. Конгрессте сунуш кылынган мыйзам долбоорлору колдоо таба элек.