Украинанын расмий бийлик өкүлдөрү билдиргендей, 23-сентябрга караган түнү Орусия өлкөнүн түштүгүндөгү Запорожье шаарына бир нече авиа сокку урду, натыйжада көп кабаттуу үйлөрдүн айрымдары талкаланып, кеминде 13 жайкын тургун жараат алды. Жараат алгандардын арасында 15 жаштагы өспүрүм бала бар экени маалымдалды.
Ички иштер министрлиги бир нече имараттан адамдар эвакуация кылынганын, Орусия КАБ бомбаларын колдонгонун билдирди.
Облус губернатору Иван Федоров кээ бир жерлерде өрт чыкканын, жалпысынан соңку суткада бул аймактын 12 калктуу пунктуна абадан жана жерден 363 жолу сокку урулганын кабарлады.
Бир күн мурда Орусиянын ушундай эле чабуулуна түндүк-чыгыштагы Харьков шаары кабылып, айрым жерлерде көп кабаттуу үйлөр кыйраган, 21 киши жараат алган.
Оруc бийлиги 2022-жылдын февралында Украинага каршы толук масштабдуу согуш ачкандан бери шаар-кыштактарынын мектеп, бала бакча, оорукана, таза суу жана энергетика тармагы сыяктуу жарандык инфраструктурасын талкалап, адамдарын өлтүрүп жатканы тууралуу айыптоолорду четке кагып келүүдө.
Украин бийлиги жана эл аралык уюмдар Орусиянын куралдын көптөгөн түрү менен жасалып жаткан соккуларын атайын чабуул катары баалоодо.
Спутниктен тартылган жаңы сүрөттөргө караганда, Орусиядагы космодромдордун биринде чоң оюк пайда болду. Эксперттердин пикиринде, бул континент аралык баллистикалык ракетаны сыноо ийгиликсиз аякташынын белгиси болушу ыктымал.
Өлкөнүн түндүгүндө жайгашкан Архангельск облусундагы Плесецк космодромунун сүрөттөрүнөн өрт өчүрүүчү төрт машинени көрүүгө болот.
X социалдык түйүнүнө OSINT-аналитик @MeNMyRC1 жазгандай, сөз РС-28 "Сармат" ракетасы тууралуу болууда. Башка талдоочулар да бул пикирге кошуларын айтып жатышат.
Эгер эксперттердин маалыматы анык болсо, анда "Сармат" ракетасы ийгиликсиз учурулган окуя ушуну менен төртүнчү жолу катталууда.
2000-жылдардын башында иштелип чыга баштаган "Сармат" - 18 миң чакырымга чейин учууга ылайыкталган ракета. Узундугу 35 метр. Ал ар түрдүү согуштук дүрмөт менен 10 тонналык жүктү көтөрө алат.
Белгород облусун аткылоодо 15 жергиликтүү тургун жабыр тартты
Орусиянын Белгород облусуна урулган соккудан бир сутканын ичинде 15 жергиликтүү тургун жаракат алып, алардын 13ү ооруканага жаткырылды. Бул тууралуу губернатор Вячеслав Гладков билдирди. Анын маалыматы боюнча, эки жарадар абдан оор абалда, аларды мүмкүн Москвага дарыланууга жөнөтүшөт. Жабыр тарткандардын арасында Яснозоренское айыл аймагынын башчысы Дмитрий Панков да бар.
Чиновник кошумчалагандай, жабыр тарткандардын жок дегенде жетөө - Черемошное айылында электр жабдуусун калыбына келтирүүгө жардам үчүн аймактык коргонууга тартылгандар.
Украинага каршы толук масштабдуу согуш башталгандан кийин, чек арага жакын орус аймактары үзгүлтүксүз учкучсуз учуучу аппараттар менен ракеталардын чабуулуна кабылууда. Украинанын Харьков облусу менен чектешкен Белгород облусу башка аймактарга караганда көбүрөөк жабыр тартууда. "7х7" басылмасынын журналисттеринин эсептөөсү боюнча, согуш башталгандан бери Белгород облусунун кеминде 243 тургуну, ал эми бүткүл Орусия боюнча 346дан көп киши каза болгон.
14-августта облуска аймактык деңгээлдеги өзгөчө кырдаал режими киргизилген. Бул Украина куралдуу күчтөрү коңшулаш Курск облусунун айрым аймактарын басып алгандан кийин болгон. 15-августта Белгород облусунда федералдык масштабдагы өзгөчө кырдаал режими жарыяланган.
Украинанын президенти Владимир Зеленский Нью-Йорк шаарына барды
Украинанын президенти Владимир Зеленский 22-сентябрда Нью-Йорк шаарына (АКШ) барды. Бул тууралуу ал жекшемби күнү кечинде Х (мурдагы Твиттер) социалдык түйүнүндөгү баракчасына жазды. Украин президенти ушул аптада Бириккен Улуттар Уюмунун (БУУ) Башкы ассамблеясынын жыйынында сөз сүйлөйт деп күтүлүүдө.
Андан тышкары 26-сентябрда Вашингтондо АКШнын президенти Жо Байден менен жолугуша турганы кабарланган. Ошондой эле АКШнын вице-президенти жана демократтардан президенттикке талапкер Камала Харрис да Зеленский менен өзүнчө жолугушуу өткөрөт. Лидерлер Орусия менен Украинанын ортосундагы согуштун абалын, анын ичинде Украинанын стратегиялык пландарын жана АКШнын Украинаны коргоодогу колдоосун талкуулашат.
Владимир Зеленский АКШга сапар учурунда президенттикке республикачылардан талапкер Дональд Трамп менен да жолугушууну пландап жатканы айтылган.
Украинанын президенти АКШга баратканда жазган видеокайрылуусунда “бул согушта мындан ары эмне болору ушул күздө чечилет” деп билдирди.