Орус аскерлери шаршембиге караган түнү Украинага 136 дрон менен чабуул койду. Бул тууралуу украин куралдуу күчтөрү маалымдады.
Маалыматка караганда, абадан коргонуу бөлүктөрү Сумы, Черкассы, Кировоград, Тернополь, Херсон, Харьков, бардыгы болуп 14 облуста 51 учкучсуз учакты атып түшүрдү. Дагы 60 дрондун "локациясы жоголгону" кабарланды.
Тернополь облусунда өнөр жай комплексине урулган соккудан өрт тутанганын облус жетекчиси Вячеслав Негода билдирди. Ал эч ким жабыркабаганын кошумчалады.
Буга чейин орус Коргоо министрлиги Белгород жана Воронежде украиналык үч дрон атып түшүрүлгөнүн билдирген.
Белгороддо шейшембиде украиналык пилотсуз учактын кичи автобуска чабуул койгону маалымдалган. Губернатор Вячеслав Гладков сегиз киши, арасында өспүрүмдөр жарадар болгонун айтты.
Согуш шартында тараптардын билдирүүлөрүн оперативдүү бышыктоо мүмкүн эмес.
15-октябрдын кечинде орусиялык дрондор баш калаа Киевди бутага алган. Мэр Виталий Кличко элди коопсуз жайларга баш калкалоого чакырган. Киев облусунун аскердик администрациясынын башчысы Сергей Попко абадан коргоо күчтөрү чабуулдун мизин кайтарганын билдирди. Жабыркагандар жана кандай зыян келтирилгени айтылган жок.
Ал арада шейшембиде майданда 164 кармаш болгону, эң айыгышканы Покровск жана Харьков багыттарында катталганын украин армиясынын командачылыгы билдирди.
Европа Биримдиги Ирандын жети компаниясына жана жети аткаминерине санкция салды. Бул чара Орусияны Украинага сокку урууда колдонулган дрондор, ракеталар жана аскердик технологиялар менен камсыздагандыгы үчүн көрүлүүдө. Маалымат Еврокеңештин сайтында жарык көрдү.
Чектөөгө Saha Airlines, Mahan Air жана Iran Air, эки сатып алуучу компания жана суюк отун чыгарган эки фирма кабылды.
Орусиялык армия Николаевге сокку урду
Учурда каза тапкандар жана 16 жарадар тууралуу белгилүү. Облустук аскердик администрациядан билдиришкендей, инфраструктура, ресторан комплекси, соода павильондору, жеке турак жайлар жана автомобилдер кыйраганы айтылууда. Алдын ала маалым болгондой, чабуул үчүн бештен кем эмес С-300 тибиндеги ракета колдонулган.
Сумы облусу 14 жолу аткыланды
Украинанын Сумы облусунун аскердик администрациясы билдиргендей, жекшембиде Орусиянын армиясы 14 жолу чабуул койду.
21 жардыруу болду. Николаев, Белопольск, Краснопольск, Новослободск, Эсманьск, Шалигинск кыштактары соккуга кабылды.
Бийлик орусиялык күчтөр дрон учуруп, минометтордон аткылаганын, авиабомба таштаганын билдирди.
Орус тарап комментари берген жок.