Украинада 11-февралда жапырт ракета жана дрон соккуларынан улам электр энергиясын берүү чукул токтотулду. Бул тууралуу «Укрэнерго» ишканасы эртең менен билдирди.
Энергетика министри Герман Галущенконун айтымында, түн ичинде Орусия газ инфраструктурасын бутага алды.
Министр соккунун кесепети такталарын кошумчалады.
“РБК Украина” жазганына караганда, орус армиясы шейшембиге караган түнү Полтава облусуна ракеталар менен чабуул койду. Натыйжада Миргород районунун 9 айыл-кыштагы жаратылыш газсыз калды. Ошол эле маалда жарандык инфраструктара жабыркабаганы кабарланды.
Украинанын ири энергетикалык компаниясы – ДТЭК Днепропетров жана Донецк облустарында да электр энергиясы чукул өчүрүлгөнүн билдирди.
Өлкөнүн көпчүлүк аймактарында аба соккусу тууралуу эскертүү берилди. Украин куралдуу күчтөрү түнү бою канаттуу "Калибр" ракеталары менен чабуул коюлганын маалымдады.
Орусиянын Коргоо министрлиги бул соккулар тууралуу маалыматка комментарий бере элек.
Херсон облусунун администрация башчысы Александр Прокудин 11-февралда маалымдагандай, бир суткада орус аскерлеринин аткылоолорунан карапайым эки киши набыт болду, алтоо жараат алды.
Анын айтымында, бутага калк жашаган райондор алынып, көп кабаттуу 6 турак үй, 12 жер там, газ түтүктөрү, айыл-чарба техникасы жана менчик машиналар жабыркады.
Далилдерге карабай, орус бийлиги кошуна өлкөсүнүн жарандык жайларына сокку урганын танып келатат.
Орусиянын Саратов жана Энгельс шаарлары учкучсуз учактардын соккусуна туш болду. Маалыматка караганда, бутага мунай иштетүүчү завод жана стратегиялык аэродром алынган болушу мүмкүн.
Саратов облусунун губернатору Роман Бусаргин "өнөр жай" объектилери зыян тартканын маалымдап, бирок чоо-жайын тактаган жок. Аймакта абадан урулуучу сокку тууралуу эскертүү берилди.
"ВЧК-ОГПУ" деген телеграм-канал жергиликтүү тургундарга шилтеме берип кабарлагандай, Саратовдогу "Крекинг" мунай иштетүү заводунда өрт тутанды. Ишкана “Роснефть” компаниясына кирет.
Украинанын куралдуу күчтөрүнүн башкы штабы Саратовдогу мунай заводуна сокку урулганын бышыктап, ал ишкана орусиялык баскынчы армияны күйүүчү май менен камсыздап турганын кошумчалады.
Саратов Москвадан 725 километр алыс жерде, Волга дарыясынын боюнда орун алган.
Энгельс шаарына урулган соккуга байланыштуу орус бийлиги комментарий жасай элек.
"ВЧК-ОГПУ" аскердик аэродромго чабуул болгонун жазып, жарылуу жана өрттүн видеолорун чыгарды.
Калаада орусиялык стратегиялык авиациянын аэродрому жайгашкан. Ал жактан учуп чыккан бомбалоочулар украин аймагына канаттуу ракеталар менен сокку уруп келет.
Орусиянын Коргоо министрлиги түн ичинде Саратов облусунун үстүнөн 18 дрон жок кылынганын билдирди. Мекеме өлкө аймагы 40 пилотсуз учактын чабуулуна туш болгонун кошумчалады.
Росавиациянын маалыматына ылайык, Казан, Киров, Саратов жана Ульяновск шаарларынын аэропорттору ишин бир нече саатка токтоткон.
Саратов жана Энгельс буга чейин да чабуулдарга кабылган.
9-февралга караган түнү Орусиянын армиясы "Шахед" дрондору менен Украинанын Сумы шаарына чабуул койду.
Сумынын вице-мэри Станислав Поляковдун маалыматына караганда, чабуулдан төрт көп кабаттуу үй, бир турак жай жана коммерциялык имараттарга зыян келтирилген.
1987-жылы туулган аял жаракат алып, ооруканга жеткирилди.
Украинанын өзгөчө кырдаалдар кызматынын маалыматы боюнча дрон сыныктары 15 автоунаага тийип, алты машина өрттөндү.
Маалыматка караганда, Украинанын абадан коргонуу күчтөрү орусиялык 83 учкучсуз учактын 61ин атып түшүргөн. Аткылоо Киев, Харьков, Полтава, Сумы, Чернигов, Кировоград, Хмельницкий, Днепропетров, Запорожье, Николаев жана Херсон облустарында катталган.
Орусия Украинага 2022-жылы февралда кол салган. Ошондон бери жай тургундар жана инфратүзүмдөр бутага алынып келет. Москва муну мойнуна албайт.
Кремлдин басма сөз катчысы Дмитрий Песков орус президенти Владимир Путин менен АКШ президенти Дональд Трамптын сүйлөшүүсү тууралуу маалыматты тастыктаган да, төгүндөгөн да жок. Бул тууралуу "Свобода" радиосу бир нече орусиялык басылмага шилтеме берип жазды.
«Бул кабар тууралуу эмне билдире алам, Вашингтондогу администрация өз ишин баштагандан бери ар кандай байланыш жолдору түзүлүүдө. Бул байланыш ар кандай каналдар аркылуу жүргүзүлүүдө. Албетте, коммуникациялардын көптүгүнөн улам мен жеке өзүм бир нерсени билбей же кабарсыз болушум мүмкүн. Ошондуктан, мен бул маалыматты тастыктай да, төгүндөй да албайм», - деди Песков «Интерфакс» жана ТАСС басылмаларына берген комментарийинде.
8-февралда Кошмо Штаттардын президенти Дональд Трамп New York Post басылмасына курган маегинде Орусиянын президенти Владимир Путин менен телефондон сүйлөшкөнүн билдирген. Бирок ал качан болгонун тактаган эмес. Трамп Путин менен канча жолу сүйлөшкөнү тууралуу суроого дагы бир ыктай жооп бербеген.
Трамп бул маегинде Украинадагы согушту токтотууга байланыштуу анын так планы бар экенин дагы кайталап, ал чукул ишке ашарына үмүттөнгөн. Ошондой эле Орусия менен Украинанын президенттеринин ысымдарын так атабастан "алар жолугушууну каалайт" деп билдирген.
Буга чейин Трамп келерки аптада Украинанын президенти Владимир Зеленский менен жолугушуусу, Орусиянын президенти Владимир Путин менен сүйлөшүүсү мүмкүн экенин айткан.
АКШнын президенти Украинадагы согушту тез арада бүткөрүү үчүн Путин менен сүйлөшөрүн билдирип келет. Буга чейин Ак үй бул тема Орусия менен олуттуу талкууланганын, жакын арада согушту токтотууга байланыштуу "орчундуу" кадамдар болушу мүмкүндүгүн кабарлаган.
Путин Трамптын сүйлөшүү тууралуу билдирүүлөрүн кубаттап, аны менен жолугушууга даяр экенин ырастаган. Ошол эле маалда Зеленский менен сүйлөшүүлөр болушу мүмкүндүгүн четке каккан.