Украинанын Донецк облусундагы Константиновка шаары шаршемби күнү дагы бир жолу чабуулга туш болду. Орус аскерлеринин аткылоосунан беш киши каза таап, сегиз киши жараат алды.
Облустун аскердик администрациясынын башчысы Вадим Филашкиндин айтымында, орусиялык күчтөр шаарга кеминде үч башкарылуучу бомба таштаган. Филашкин соңку күндөрү Орусиянын бул шаарга чабуулу күчөгөнүн, тургундар үчүн кооптуу жагдай жаралганын белгилеп, жергиликтүү элди өз убагында эвакуация болууга чакырды.
Константиновка 22-февралда да чабуулга туш болгон. Маалыматка караганда, анда шаарга кеминде жети авиабомба ташталган жана эки адам каза болуп, төрт адам жаракат алган.
Орусиянын Коргоо министрлиги бул маалымат боюнча комментарий берген эмес.
DeepState долбоору орусиялык аскерлер Донецк облусунун түштүк-батышындагы эки жеринде алдыга жылганын аныктады.
Ал арада Украинадагы согушту токтотуу боюнча дипломатиялык аракеттер уланууда. Бейшембиде Британиянын премьер-министри Кир Стармер АКШ президенти Дональд Трамп менен Вашингтондо жолукканы турат. Анда Украина маселесине, НАТОнун келечегине көбүрөөк көңүл бурулат деп күтүлүүдө.
"Улуу Британия үчүн коргонуу, коопсуздук, соода, технология, каржы жана башка маанилүү маселелерде АКШ менен алака маанилүү. Биз бири-бирибиздин экономикабызга 1,5 триллион доллар инвестиция сала алдык. Биздин ортобуздагы соода мамиле күчтүү гана эмес, адилеттүү жана тең салмактуу", - Кир Стармер.
Буга чейин эл аралык басылмалар Франциянын президенти Эммануэл Макрон жана Британиянын премьер-министри Кир Стармер Вашингтонго сапарынын алкагында АКШ президенти Дональд Трампты Украинада ок атышууну токтотуу келишими кабыл алынса, ал аймакка бейпилдик күчтөрүн киргизүүгө ынандырууга аракет кыларын жазышкан. Украинага европалык өлкөлөрдөн 30 миңге чейин аскер жөнөтүү планы тууралуу буга дейре бир нече ирет кабарланган. Эммануэл Макрон европалык лидерлердин арасынан биринчи болуп Украинага француз аскерлерин жөнөтүүгө даяр экенин айтып чыккан.
Орусиянын тышкы иштер министри Сергей Лавров шаршемби күнү бейпилдик күчтөрүнө байланыштуу Москванын позициясын айтты.
"Биз эч кандай варианттарды карап жаткан жокпуз. Макрон эмне деп айтканын билбейм, бирок президент Трамп пресс-конференцияда тынчтык орнотуучу күчтөрдү жөнөтүү чечими эки тараптын макулдугу менен гана ишке ашарын айткан. Кыязы, алар биз жана Украина жөнүндө айтышты. Бул тууралуу бизден эч ким сураган жок. Европалыктар, биринчи кезекте Франция жана Улуу Британия таңуулап жаткан бул ыкма кайрадан чыр-чатактын ырбап кетишине алып келет", - деди Лавров.
Бир күн мурун Вашингтон менен Киев сейрек кездешүүчү металлдар, маанилүү минералдар жана башка табигый ресурстар боюнча мунаса тапканы кабарланган. Бирок Украина кандай коопсуздук кепилдиктерин алары так айтыла элек.
27-февралда Түркиянын Стамбул шаарында АКШ менен Орусиянын элчиликтеринин ишин калыбына келтирүү боюнча сүйлөшүүлөр башталды.
Reuters агенттиги АКШнын Мамлекеттик департаментинин өкүлүнө таянып "күн тартибинде кадр маселелери, виза, дипломатиялык банк операциялары жана башка уюштуруу маселелери бардыгын" жазды. Маалыматка караганда бул жолку жолугушууда Украина боюнча талкуу болбойт, ошондой эле саясат жана коопсуздук маселелери каралбайт.
Түндүк Корея Орусияга дагы миңдеген жоокерлерин жөнөттү жана алардын айрымдарын Украина менен чектеш Курск аймагындагы фронт тилкесине жайгаштырды. Бул тууралуу Түштүк Кореянын Чалгын агенттиги 27-февралда билдирди.
Түштүк Кореянын YTN телеканалы чалгын булактарына таянып канча аскер жөнөтүлгөнү белгисиз экенин кабарлады. Ал эми JoongAng басылмасы Пхеньян быйыл жыл башынан бери Орусияга үч миңдей жоокерин жибергенин жазды.
Түштүк Кореянын жана Батыштын чалгын кызматтарынын маалыматына ылайык, өткөн жылы Орусияга болжол менен 11 миң түндүк кореялык аскер жөнөтүлгөн жана алар Украина тараптан Курск аймагына жасалган чабуулдарга каршы согушка катышкан.
Москва да, Пхеньян да бул маалыматты расмий түрдө ырастаган эмес.
Эки өлкө өткөн жылы Орусиянын президенти Владимир Путин Түндүк Кореяга барганда өз ара коргонуу чараларын камтыган келишимге кол койгон.
Айрым чалгын булактарынын маалыматы боюнча, өткөн жылы Курскиге жайгаштырылган түндүк кореялык аскерлердин көпчүлүгү украин күчтөрү менен согушта чоң жоготууларга учурагандан кийин фронттон чыгарылган. Сеул ырастагандай, быйылкы январь айына карата 300дөй түндүк кореялык окко учкан, үч миңдейи жараат алган.
Түндүк Кореянын лидери Ким Чен Ын 8-февралда Орусияны колдоону улантарын убада кылган.
Ошол эле күнү Украина президенти Владимир Зеленский Москванын "Түндүк Корея менен кызматташуусу мындан ары да кеңейерин" айткан.
Киев облусундагы Буча районунда 26-февралга караган түнкү чабуулдан бир киши каза таап, бери дегенде эки киши жабыркады, бир нече үйдү өрт чалды. Бул тууралуу облус губернатору Николай Калашник шаршембиде билдирди. Набыт болгон аялдын сөөгүн эки кабат турак жайдын урандылары астынан алып чыгышты.
Жергиликтүү жашоочу Ольга Волконская күйүп кеткен үйлөрдү кабарчыларга көрсөтүп, дрондун добушу угулганда балдары менен сыртка атып чыгышканын айтып берди:
"Биз Орусияны атам замандан бери билебиз. Көрүп тургандай, биз менен жакшы мамиледе болууну каалашпайт. Бизге кысым көрсөтүп, аткылап жатышат. Сүйлөшүүлөрдөн майнап чыгарына ишенбейм. Мунун бардыгы калп. Албетте, тынч жашоону эңсейбиз, бизди эч ким аткылабасын деп каалайбыз. Бирок орусиялыктардын кылып жатканы менен айтканы айырмаланат".
Украин Куралдуу күчтөрүнүн маалыматына караганда, алдыңкы күнү кечинде Киев жана айланасындагы райондор, өлкөнүн чыгыш аймагы аба соккуларына туш болду.
Шаршембиде орусиялык дрон Харьков шаарындагы көп кабаттуу үйгө тийгенин облустун губернатору Олег Синегубов билдирди. Жабыркагандар тууралуу кабарланган жок.
"Бул жерде эч кандай аскердик жай жок. Жакын жерде мектеп менен бейтапкана гана бар, алар жабык турат. Аскерлер да жок айланада. Карапайым элди коркутуп, жүрөк үшүн алып жатышат. Башкача айта албайм", - деди жергиликтүү тургун Юрий Гара.
Орусия бул чабуулдар тууралуу комментарий кыла элек. Согуш башталгандан бери Москва жайкын украиналыктарды, жарандык объектилерди бутага алганын танып келатат.
Орусиянын Коргоо министрлиги аннексияланган Крым жарым аралынын аймагында, Кара жана Азов деңиздеринин акваторияларында 128 пилотсуз учак жок кылынганын билдирди.
Краснодар районунда, күбөлөрдүн айтымында, Туапседеги деңиз портуна сокку урулду. Сочинин аэропорту бир нече убакытка ишин токтотту.
Украин Куралдуу күчтөрү чабуул жана жок кылынган дрондор тууралуу маалыматтарга үн ката элек
Рейтер: Зеленский жума күнү Вашингтонго барышы мүмкүн
Рейтер агенттиги атын атабаган эки булагына таянып, Украина президенти жума күнү Вашингтонго барышы мүмкүн экенин кабарлады. Бул сапар Украинанын кен байлыктары тууралуу келишимге кол коюлгандан кийин АКШ президенти Дональд Трамп менен жолугуу максатында уюштурулуп жатат. Ак үй азырынча бул маалыматты ырастай элек.