Орусиянын Рязань облусуна жасалган учкучсуз учак чабуулунан көп кабаттуу эки үй жабыркап, эки адам жаракат алганын аймактын губернатору Павел Малков билдирди.
Дрон сыныктары өндүрүш ишканалардын биринин аймагына түшкөнү да кабарланды.
Astra агенттиги дрон Рязандагы турак жай комплексинин бир үйүнө тийгенин ырастады.
"Орусия менен биргебиз" кыймылынын төрагасы Владимир Рогов украин армиясы Бердянскидеги электроподстанцияларга чабуул жасап, шаар жарыксыз жана суусуз калганын кабарлады. Ушундай эле маалыматты "Запорожье суусу" ишканасы билдирди. Украиналык Supernova+ каналы оккупацияланган Бердянскиде "Морозовская" подстанциясы күйүп жатканын жазды.
Запорожье облусунун оккупацияланган бөлүгүнүн Орусия дайындаган "башчысы" Евгений Балицкий Бердянск, Васильевск, Приморск муниципалдык аймактарында жана Бердянск шаарында жалпы 76 миң абонент жарыксыз калганын билдирди. Социалдык объекттерге кошумча жолдор менен электр энергиясы берилип жатканын өзүнүн Телеграм каналына жазды.
Орусия 16-январга караган түндө тогуз аймагынан жана аннексияланган Крымдын үстүнөн 106 учкучсуз учак жок кылынганын, ал эми Рязан облусунда 22 дрон атып түшүрүлгөнүн билдирди.
Украина бул маалыматтарды комментарийлеген жок. Согуш учурунда маалыматтарды тактоо мүмкүн эмес.
өткөрбөй койду. Танкер Орусиянын "көмүскө флотуна" байланышы бардыгын Süddeutsche Zeitung, NDR жана WDR агенттиктери жазышты.
Tavian танкери бир нече жолу аталышын жана идентификациялык маалыматтарын алмаштыргандыктан "танкер-зомби" деген атка конгон.
Немис чек арачылары кемеде жалган желек менен жасалма номер илинген деп шек санашкан. Кийинчерээк Tavian танкери АКШ жана United Against Nuclear Iran уюму санкция тизмесине киргизген Tia кемеси экени аныкталган. Кеме 27 жылдан бери мунай ташып келе жаткан эң эски танкерлердин бири.
Tavian 2025-жылы декабрда Балтика деңизинен Түркияга чыккан. 11-январда деңизге кайтып келген. Немис чек арачылары аны өз жээгине өткөрбөй койгон соң Норвегия деңизине багыт алган. Ал жактан алыс эмес жерде Орусиянын Мурманск шаары - дагы бир мунай порту жайгашкан.
2025-жылы Евробиримдик Орусияга каршы 19-санкциялар түрмөгүн кабыл алган. Анда 2027-жылга чейин Орусиянын газынан баш тартып, "Роснефть" жана "Газпромнефть" компаниялары менен кызматташууга толук тыюу салынган. Санкцияга орусиялык "көмүскө флоттун" 117 танкери менен кошо 588 кемеси да кирген.
Брюссел Орусиянын дестабилдештирүүчү аракеттери менен күрөштүн алкагында санкциялык тизмени кеңейткени жатат. Еврошаркеттин тышкы иштер боюнча жогорку өкүлүнүн 13-январдагы сунушуна ылайык, «кара тизмеге» Кремлди колдогон орусиялык белгилүү теле алып баруучулар жана артисттер киргизилмекчи.
Алардын аракеттери «Евробиримдиктеги жана Украинадагы демократияга, мыйзам үстөмдүгүнө жана коопсуздукка коркунуч жаратат» деп сыпатталууда.
Бул тууралуу сөз болгон документтин көчүрмөсүнө таянып, "Системы" иликтөө долбоору кабарлады.
Тизмеде "Россия" телеканалынын башкы директорунун кеңешчиси, спорт комментатору Дмитрий Губерниев, Биринчи каналдын «Время» программасынын көп жылдан берки алып баруучусу Екатерина Андреева, "Вести" берүүсүн алып барган жана Орусиянын Аялдар бирмидигинин төрайымы болгон Мария Ситтел, "Москва. Кремль. Путин" программасынын автору Павел Зарубин, рэпер жана актер Роман Чумаков (Рома Жиган), балет артисти Сергей Полунин бар.
Алсак, Губерниев президент Путиндин 2024-жылкы шайлоодо ишенимдүү адамы болгон, 2022-жылдын 18-мартында Лужникидеги пропагандалык митингди алып барган.
Чумаков Украинага басып кирүүнү колдойт, согуштук пропагандага активдүү катышат. Аскер бөлүктөрүндө жана Украинанын оккупацияланган аймактарында концерт коюп жүрөт.
Украинанын Коопсуздук кызматы жылуулук сезону башталгандан бери Орусия энергетикалык жайларга 256 сокку урганын билдирди. Маалыматка караганда, былтыркы октябрдан бери 11 ГЭС жана 45 ири ЖЭБ, 49 жылуулук станциялары, 151 электрподстанция бутага алынган. Мекеме бул Кремлдин украин элин кырууга багытталган туруктуу саясаты экенин далилдейт жана андай аракеттерде адамзатка каршы кылмыштардын белгилери бар деп эсептейт.
Эң көп Киев шаары жана облусу, Харьков, Одесса, Днепропетровск, Сумы, Николаев жана Чернигов аймактарындагы жылуулук жана электр станциялары аткыланган.
Коопсуздук кызматы мунун айынан миллиондогон жайкын тургун кычыраган суукта жылуулуук, электр жарыгы жок калганын белгиледи.
Жыл башынан бери эң кубаттуу чабуулга Киев кабылганын жергиликтүү медиа жана бийлик өкүлдөрү кабарлашууда.
9-январда башкалаа жапырт соккуга туш болгондо энергетикалык инфраструктура катуу жабыркаган. Шаардын жарымынын көбү караңгыга баткан.
Мэр Виталий Кличко энергетикадагы мындай оор абал согуш башталгандан бери түзүлө электигин бейшембиде айтты.
Президент Владимир Зеленский алдыңкы күнү Киевдеги абалды координациялоо үчүн штаб түзүлгөнүн, өлкөнүн энергетикасында чукул кырдаал киргизилерин билдирген. Буга чейин президент Орусия карапайым элдин жашоосун ого бетер оорлоштуруу үчүн катуу суукту күткөнүн сындаган.
9-январда украин премьер-министри Юлия Свириденко бир жумада электр станцияларга жана башка маанилүү инфраструктурага 44 сокку урулганын билдирген.
Шейшембиде Орусиянын Коргоо министрлиги кошуна өлкөсүнүн 157 жериндеги энергетика жана транспорт тармактарына, аскердик аэропортторго жана дрон чыгарган заводдорго сокку урулганын маалымдаган.
Орусиянын украин энергетикасына чабуулдарын күчөткөнүн БУУ да сындаган.