Орусиянын дрон чабуулунан кийин Харьков облусундагы 460 миң керектөөчү электр жарыгысыз калды. Бул тууралуу облустук администрациянын башчысы Олег Синегубов брифингде билдирди.
"Суспильне" басылмасы маалымдагандай, Синегубов жалпы 520 миң абонент жарыксыз калганын, анын ичинде 60 миңдейи 2022-жылдан бери эле жарыксыз жашап келе жатканын айтканын билдирди.
"Факты боюнча чабуулдан кийин 460 миң абонент жарыксыз калды. Адам башына айландырып айтчу болсок, албетте кыйла көп болот. Бизде үчүнчү күнү катары менен он сааттан ашык убакыт жарыксыз калган кырдаал кайталанып жатат", – деди ал.
Синегубов ошондой эле 20-январь күнү 1,1 млн абонент жарыксыз калганын, бул облус калкынын 90% түзөрүн белгиледи. Анын сөзүнө караганда учурда облуста 950 күжүрмөн жана 350 жылытуу түйүндөрү иштеп жатат.
"Буга кошумча ысык тамак таратылуучу жайларды даярдап жатабыз. Анткени биз мындан жаман кырдаалга даярдык көрүп жатабыз, себеби душман жалаң энергетикалык жана жылытуу системаларына чабуул коюууда", - деди Синегубов.
Днепропетров облусунда дрон чабуулунан эки адам: бир аял жана эркек мерт кетип, дагы бир адам жаракат алды. Мындан тышкары жер үйлөр жайгашкан аймакта бир нече өрт катталып, үч үй жабыркаган.
Кривой Рог аймагында чабуулдун натыйжасында жер үйлөр жана кабаттуу үйлөр, административдик имараттар жана автоунаалар жабыркаганы кабарланды.
Одесса облусунун аскердик администрация Олег Кипердин маалыматына караганда, Одесса районунда жер үйлөр жабыркаган, кампа кыйраган. 50 жаштагы адам жаракат алып, ооруканага жеткирилген.
Орусиянын армиясы 21-январга караган түндө жалпысынан Украинага бир баллистикалык "Искандер-М" ракетасын жана 97 дрон менен чабуул коюшканын украин күчтөрү билдирди. 84 дрон док кылынган. Баллистикалык ракета жана 13 дрон 11 бутага тийген, бир жерге дрон сыныгы кулаган.
Украин президенти Владимир Зеленский 20-январдагы кайрылуусунда борбор калаа Киевде орус чабуулунан соң миллиондон ашуун адам жарыксыз калганын билдирген.
Киев шаарынын мэри Виталий Кличко орус армиясынын дүйшөмбү түнкү соккуларынан кийин калаада көп кабаттуу 5 635 үй жылуулуксуз калганын маалымдады.
Кличко белгилегендей, жабыркаган үйлөрдүн болжол менен 80% 9-январдагы жапырт чабуулдан кийин жылуулук системаларын калыбына келтирип жаткан имараттар болгон. Ал шаардагы сол жээк түнкү соккудан кийин суу менен камсыздоо кызматынан ажыраганын кошумчалады.
Киев шаардык администрациясы ошондой эле энергия менен камсыздоо үзгүлтүккө учурашына байланыштуу метрополитендин кызыл жана жашыл линияларында поезддердин графиги өзгөрөрүн эскертти.
Днепров районунда эл жашабаган имараттарга сокку урулган, дрон ачык аймакка кулап, бир нече автоунаа өрттөнгөн. Бир аял жабыркаган жана ооруканага жеткирилген.
Ошондой эле Днепрге жасалган чабуулдан 76 жана 67 жаштагы эки аял жаракат алды. Аймактын аскердик администрация башчысы Александр Ганжа дрон чабуулунан улам өрт чыгып, көп кабаттуу үй, инфратүзүм жана бир нече автоунаа жабыркаганын кошумчалады.
Орусия Украинанын шаарларына түнкү чабуулу тууралуу комментарий бере элек.
Одессада 19-январдын түнүндөгү Орусиянын соккуларынан кийин 30 миңден ашуун киши электрсиз калган.
Соңку күндөрү өлкөнүн бир катар аймактарында энергетикалык объекттер бутага алынгандыктан 19-январда бир канча облуста, анын ичинде Днепропетровск облусунда электрди убактылуу жапырт өчүрүп үнөмдөө режими киргизилди. Украинанын энергетика тармагына соңку чабуулдар олуттуу кыйроо алып келгендиктен айрым райондордо электрди өчүрүү 10-12 саатка созулушу мүмкүн экени эскертилген.
Украинанын президенти Владимир Зеленский 19-январда, кезектеги кечки кайрылуусунда Орусия Украинанын аймагына жапырт чабуулга камданып жатканын айтып, элин абадан эскертүүлөргө дыкат көңүл бурууга чакырды.
«Келерки күндөрү жана андан кийин да өтө сак болуңуздар – Орусия чабуулга, жапырт чабуулга камданып жатат, сокку урууга ыңгайлуу учурду күтүп турат. Сураныч, абадан айгай салынган эскертүүлөргө дыкат көңүл буруңуздар, ар бир облуста ыкчам чара көрүүгө, адамдарга жардам берүүгө даярдык катуу болушу талап», – деди Зеленский.
Ошол эле күнү украин өкмөтүнүн басма сөз кызматы энергетика министри Денис Шмыгал Бириккен Улуттар Уюмунун Атом энергиясы боюнча эл аралык агенттигинин (МАГАТЭ) башкы директору Рафаэл Гросси менен жолугушууда "орусиялыктар өлкөнүн энергетикалык инфраструктурасына кезектеги жапырт чабуул коюусуна камданып жатканын, бутага тейлөөчү атомдук объектилер жана түйүндөр алынышы мүмкүн экенин" айтканын маалымдаган.
Орусия Украинанын атомдук электр станцияларына залака келтирүү аракетин көрүп жатканын Зеленский да айткан.
Украин чалгын мекемеси муну менен Москва Киевди капитуляциялык талаптарга макул болуусуна мажбурлоого аракеттенип жатканын билдирген.
Күн сууктагандан бери энергетикалык системага урулган соккулардын айынан Украинада бул тармакта өзгөчө кырдаал жарыялаган. Эң оор абал борбор калаа Киевде жана Киев облусунда. Шаар мэри Виталий Кличко белгилегендей, согуш башталгандан берки эң оор кырдаалды Киев ушул кышта башынан кечирүүдө.
Украинадагы Одесса облусунун аскердик администрация башчысы Олег Кипер учкучсуз учактардын чабуулунан бир адам жаракат алып, турак жай, энергетикалык жана газ инфратүзүмдөрү жабыркаганын билдирди.
Одесса районунда учкучсуз учак кабаттуу үйгө тийген. Эки батир, үйдүн алды, терезелер жана жакын токтотулган унаага зыян келтирилген. Кипер мындан тышкары стратегиялык маанилүү объект да дрон чабуулуна кабылганын кошумчалады.
Орусиянын аскерлери 19-январга караган түнү Украинага 145 учкучсуз учак менен чабуул коюшканын, анын 126сы жок кылынганын Украинанын Куралдуу күчтөрү билдирди.
"13 дрон 12 бутага тийген, ал эми беш бутага дрон сыныктары түшкөн", - деп жазылган билдирүүдө.
Орусия чабуул тууралуу маалымат бере элек.
Орусия Украинага кол салган 2022-жылдын 24-февралынан бери тараптар бири-бирин эл жашаган конуштарды аткылоого айыптап келишет. Маалыматтарды согуш учурунда бейтарап булактардан тактоо мүмкүн эмес.
Украин президенти Владимир Зеленский өткөн аптада Орусия Украинага 1300дөн ашык дрон, миңден көп башкарылган авиабомба жана ар кандай типтеги 30 чакты ракета менен аткылаганын билдирген. Зеленский буга байланыштуу өлкөсү көбүрөөк коргоого, айрыкча абадан коргонуу системасына муктаж болуп жатканын белгилеген.