Орусиянын армиясы Украинанын аймактарына 500дөн ашуун дрон менен жапырт чабуул койду. Адатта орус күчтөрү аба соккуларды түнкүсүн урат. Ал эми бул жолку чабуул күндүз болуп, анын кесепетинен үч адамдын өмүрү кыйылды. Ондон ашуун адам жаракат алды. Өлкө батышында жайгашкан Львов шаарындагы тарыхый имараттар жабыркады.
Львовдо тартылган видеолордо дрон шаардын борборундагы имараттын үстүнөн учуп өтүп, чиркөөгө жакын жайгашкан үч кабаттуу турак үйгө сокку урганы көрүнөт. Соккудан кийин жалын асманга көтөрүлгөн.
«Орусия күндүз эл көп жүргөн шаар борборуна сокку урууда. Бир нече мүнөт мурун орус-иран дрондору Львовго сокку уруп, эки адам оор жаракат алды», — деп жазды Украинанын премьер-министри Юлия Свириденко социалдык тармактарга.
Көп өтпөй жергиликтүү бийлик 20 киши ооруканага жаткырылганын ырастады.
Ал эми Украинанын тышкы иштер министри Андрей Сибига 24-мартта Тернополь, Винница, Ивано-Франковск, Житомир, Запорожье жана Днепр аймактары да чабуулга кабылганын кошумчалады.
Украинанын аба күчтөрү билдиргендей, Орусия 24-мартта 9:00дөн 18:00гө чейин 556 дрон менен чабуул койгон. Алардын көбү атып түшүрүлгөн.
Мунун алдында эле орус армиясы түн ичинде жана эртең менен 426 дрон жана ракета менен сокку урганы маалым болгон. Бул чабуулдардан кеминде төрт адам каза болуп, 20дан ашууну жаракат алган. Президент Владимир Зеленский өлкөнүн 11 аймагында кыйроолор катталганын айтты.
«Бул чабуулдун масштабы Орусиянын согушту токтотууга ниети жок экенин айкын көрсөтөт. Орусияга кошумча жана күчтүү басым болмоюнча, Москва олуттуу жоготууларга дуушар болмоюнча согуштан баш тартуу же тынчтыкка кайтуу каалоосу болбойт»,-деди Украинанын президенти.
Полтава облусунда эки адам каза болуп, 11 адам жаракат алган. Ал жерде турак жайлар жана мейманкана жабыркаган. Запорожье облусунда дрон жана ракета менен жасалган чабуулдан бир адам каза болуп, дагы бешөө жаракат алган. Харьков облусунда орус дрону жүргүнчүлөрдү ташыган поездге тийип, 61 жаштагы жүргүнчү каза болгон. Ал эми Днепр шаарында көп кабаттуу имаратка сокку урулуп, кеминде сегиз адам жаракат алган. Экөөнүн абалы оор.
Адатта орус бийлиги жарандык жайларга сокку урганын четке кагып, бир гана аскердик объекттерди бутага аларын айтып келет.
Молдованын Министрлер кабинети өлкөнүн энергетика тармагында 60 күнгө өзгөчө кырдаал жарыялоо сунушун жактырды.
«Биз энергетика секторунда 60 күнгө өзгөчө кырдаал жарыялоону сунуштайбыз. Бул жөн гана дүрбөлөңдөн эмес, жоопкерчиликтен улам кабыл алынган чара», — деди Молдованын премьер-министри Александру Мунтяну 24-мартта Facebook аркылуу жасаган билдирүүсүндө.
Мындай чечим Украинанын аймагына Орусиянын түнкү соккуларынан кийин кабыл алынды. Бул чабуулда Молдованын негизги электр берүү линиясы үзгүлтүккө учураган. Эми бул чечим парламент жактырган соң күчүнө кирет. Мыйзам чыгаруучулар жакын арада кезексиз жыйынга чогулары күтүлүүдө.
Молдова электр энергиясынын негизги бөлүгүн коңшу Румыниядан импорттойт. Ал Евробиримдикке мүчө өлкө болуп саналат жана электр энергиясы Украинанын түштүгү аркылуу өткөн зымдар аркылуу жеткирилет.
Молдованын президенти Майя Санду Украинадагы жарандык энергетикалык инфраструктурага соккуларды «согуш кылмышы жана баарыбызга каршы чабуул» деп айыптады.
«Түнкү чабуулдар Молдованын Европа менен болгон негизги энергетикалык байланышын үздү. Альтернативдүү маршруттар бар, бирок кырдаал дагы эле туруксуз. Бул үчүн толук жоопкерчилик Орусияга тиешелүү», — деп жазды ал X социалдык тармагында.
Украинанын аба күчтөрүнүн маалыматына ылайык, Орусия 34 ракета жана 392 дрон учурган. Алардын арасында жети “Искандер” баллистикалык ракетасы, 23 канаттуу ракета жана төрт абадан башкарган ракета болгон.
Ошол эле учурда, Орусиянын Коргоо министрлиги алардын күчтөрү түн ичинде Украинанын 55 дронун атып түшүргөнүн билдирди.
Украинанын Львов аймагында орус армиясынын дрон чабуулунан жаракат алгандар дагы 13 адамга көбөйүп, 20га жетти. Маалыматты 25-мартта шаар башчысы Андрей Садовый жарыялады. Буга чейин жергиликтүү бийлик соккудан эки адам оор жаракат алганын билдирген.
Орусия Украинанын Львов шаарын шейшембиде күндүз дрон менен аткылады, бир дрон шаардын борборундагы Собор аянтында чиркөөнүн жанындагы имаратка тийди.
24-мартта ЮНЕСКОнун баалуу мурастар тизмесине кирген имарат өрттөнгөнү кабарланган, бирок кийинчерээк аймактык аскердик администрация башчысы Максим Козицкий улуттук маанидеги эстелик - Бернард монастырлар комплекси кыйраганын тактады. Ал адистер тарыхый имараттын кыйроо даражасын аныктап жатышканын кошумчалады.
"РБК-Украина" Львовдо дрондор Собор аянтындагы жана дагы эки көчөдөгү турак жайларга тийгенин жазды.
Шейшембиде Орусия Украинанын башка аймактарын да бутага алды. Украинанын Аба күчтөрү билдиргендей, 24-мартта күндүз "Шахед" дрондору менен катуу сокку урулду. Мониторинг жүргүзгөн каналдар жанкечти дрондор жүздөп саналарын билдиришти. Жергиликтүү убакыт боюнча саат 14:30дарда «Шахеддердин» тобу Херсон, Чернигов облустары аркылуу кирген, кеминде 17 дрон Киевге багыт алганы кабарланган. Кийинчерээк Днепрде, Харьков облусундагы Дергачи шаарында дрондор түшкөн учурлар болгону айтылды.
Шейшембиде кечинде украин Аба күчтөрү Орусия 24-мартта согуш башталгандан берки эң ири жапырт дрон чабуулун жасаганын билдирди. Саат 9:00дан кечки 18:00га чейин 556 учкучсуз учак менен чабуул жасалды. Ал эми 23-мартта жалпысынан миңден ашуун Shahed жана башка ракета, дрондор менен сокку урулган.
Орусия Украинага жапырт соккулар тууралуу комментарий бере элек.
Украина Орусиянын толук масштабдуу агрессиясына каршы 2022-жылдын февралынан бери күрөшүп келе жатат. Согушту сүйлөшүү жолу менен токтотуу аракетинен майнап чыкпагандыктан Киев Орусиянын аскердик жөндөмүн алсыратуу максатында анын мунай жана аскердик-техникалык ишканаларын бутага алууга мажбур экенин айтып келет.
Украинанын ондон ашуун облусу Орусиянын жапырт соккусуна кабылды
Украинанын президенти Владимир Зеленский 24-марттын кечинде Орусиянын жапырт чабуулунан кийин калыбына келтирүү аракеттери уланып жатканын билдирди.
Зеленский Телеграм каналында Орусия 24-мартка караган түнү 390дон ашуун дрон, ар кайсы типтеги 34 ракета менен сокку урганын, 11 облус андан зыян тартканын, болжолдуу маалыматтар боюнча төрт киши өлгөнүн билдирди.
"Бул сан орусиялык чабуулдан көбүрөөк коргонуу керектигин айгинеледи. Украинага колдоо маанилүү. Абадан коргонуу боюнча макулдашуулардын баары өз убагында аткарылышы маанилүү. Жана дагы Европа ар кандай коркунучтардан коргонуу үчүн абадан коргоо системасы үчүн керектүү сандагы ракеталарды өндүрүүсү маанилүү", – деди Зеленский.
24-мартта орус армиясынын Украинанын Львов шаарынын борборундагы соккусунда ЮНЕСКОнун баалуу мурастар тизмесине кирген имарат өрттөнгөнүн жергиликтүү бийлик билдирди.
Шейшембиге караган түндөгү жапырт чабуулда Полтавада жараат алгандар акыркы маалымат боюнча 12ге жетти. Арасында бала да бар. Турак үй, мейманкана, өндүрүш объектилеринде өрт чыкты.
Украинанын Аба күчтөрү билдиргендей, төрт облуста беш кишинин өмүрүн алган түнкү жапырт чабуулдан кийин 24-мартта күндүз орус күчтөрү "Шахед" дрондору менен катуу сокку урду. Мониторинг жүргүзгөн каналдар жанкечти дрондор жүздөп саналарын билдиришти. Жергиликтүү убакыт боюнча саат 14:30дарда «Шахеддердин» тобу Херсон, Чернигов облустары аркылуу кирген, кеминде 17 дрон Киевге багыт алганы кабарланды. Кийинчерээк Днепрде, Харьков облусундагы Дергачи шаарында дрондор түшкөн учурлар болгону айтылды.
Орусия Украинага жапырт соккулар тууралуу комментарий бере элек.
Украина Орусиянын толук масштабдуу агрессиясына каршы 2022-жылдын февралынан бери күрөшүп келе жатат. Согушту сүйлөшүү жолу менен токтотуу аракетинен майнап чыкпагандыктан Киев Орусиянын аскердик жөндөмүн алсыратуу максатында анын мунай жана аскердик-техникалык ишканаларын бутага алууга мажбур экенин айтып келет.