28-мартка караган түндө орус аскерлери Одессага дрон менен жапырт сокку урушту. Облустук администрация башчысы Сергей Лысак соккудан эки адам мерт кеткенин билдирди.
Бир адамдын сөөгү урандылардын алдынан табылган, экинчиси ооруканада каза тапты. Кеминде 11 адам жаракат алганы, арасында 9 жаштагы бала бар экени кабарланды.
Украинаны калыбына келтирүү боюнча вице-премьер-министр Алексей Кулеба Одесса облусунда порттогу инфратүзүм чабуулга кабылганын, дрон дан сакталган кампага тийгенин билдирди.
Жергиликтүү бийликтин маалыматына караганда, шаардын өзүндө төрөт үйлөрүнүн биринин чатыры жабыркады, андагы 80 адам эвакуацияланды.
Приморскиде, Хажибей жана Киев райондорунда бир нече жер үй жабыркады. Бир катар көп кабаттуу үйлөрдө балкондору, терезелер сынган, өйдөңкү кабаттарда өрт чыккан. Жер үйлөр да өрттөнүп, ондон ашуун автоунаа зыянга учурады.
Украинанын президенти Владимир Зеленский түн бою Одессага 60тан ашуун дрон чабуулу жасалганын билдирди.
"Эч кандай аскердик мааниси жок: бул карапайым жарандардын өмүрүнө карата чыныгы террор. Зыян тарткан объектилердин арасында төрөт үйү, турак жай имараттары, ишканалар, порт жана маанилүү инфраструктура болгон", - деп жазды ал өзүнүн Telegram каналында.
Орус армиясы бул түндө Одессадан тышкары Полтава жана Днепропетровск аймактарын да аткылады. Полтаванын облустук администрация башчысы Виталий Дьяковнич билдиргендей, Полтава районунда дрон үйгө жана өнөр жай объекттерине тийген, бир адам мерт кетти.
Кривой Рогдо өнөр жай ишканасы жабыркаганы, мерт кеткендер жана жаракат алгандар бар экенин ишембинин таңында облус башчысы Александр Ганжа маалымдады.
Украин Аскер-аба күчтөрүнүн маалымдашынча, 28-мартка караган түндө Орусиядан Украинага 273 учкучсуз учак жиберилген. Анын 252си жок кылынган.
"21 дрон 18 локацияга тийгени жана тогуз жерге дрон сыныктары түшкөнү катталды", - деп жазылды маалыматта.
Орусия азырынча түн ичиндеги чабуул тууралу комментарий бере элек.
АКШнын мамлекеттик катчысы Марко Рубио Украина үчүн каралган курал-жарак эгер Иран менен жаңжал курчуп кетсе Жакынкы Чыгышка жиберилиши мүмкүн экенин билдирди.
27-мартта Францияда "Чоң жетинин" (G7) тышкы иштер министрлеринин жолугушуусунан кийинки сөзүндө Рубио АКШ курал-жаракты жеке артыкчылыктарына карай колдонорун билдирди.
"Эгер бизге Америка үчүн бир нерсе керек болсо жана ал Американыкы болсо, анда биз аны биринчи кезекте Америка үчүн калтырабыз. Азырынча мындай учур боло элек", -деп белгиледи Мамдепартаменттин башчысы. Анын сөзүн Bloomberg жарыялады.
Сөз ошол эле учурда 2025-жылы макудашылган PURL (Prioritized Ukraine Requirements List) программасы боюнча курал берүү жөнүндө да болууда. Анын алкагында Украина керектүү курал-жарактын тизмесин түзөт, ал эми европалык союздаштары аны АКШдан сатып алышат.
Politico маалымдагандай, Вашингтон союздаштарга курал-жаракты жеткирүү жакынкы айларда жайлап каларын же токтой турганын эскертти. Атап айтканда, Patriot абадан коргонуу системалары үчүн ок-дары жана атып түшүрүүчү ракета жеткирүү токтошу мүмкүн.
Ошол эле учурда америкалык тарап союздаштар атайын Украина үчүн гана сатып алган курал-жарак (Жакынкы Чыгышка) берилбей турганын билдирди. Бирок, The Washington Post жазгандай, Пентагон Жакынкы Чыгыштагы жеке корун толтуруу үчүн курал-жарактын кайсы бир бөлүгүн кайра бөлүштүрүүнү караштырып жатат.
НАТОнун башкы катчысы Марк Рютте эң негизги маанилүү жабдуулар, анын ичинде атып түшүрүүчү ракеталар Киевге жиберилип жатканын билдирди. Анын сөзүнө караганда, курал жеткирүү үзгүлтүксүз жүрүүдө. Мурдараак ал 2026-жылы АКШ Киевге Европа жана Канада төлөгөн 15 млрд долларлык курал берүүнү көздөп жатканын, ай сайын бир млрд евро өлчөмүндөгү курал жеткирилерин айткан.
Украинанын президенти Владимир Зеленский буга чейин АКШнын негизги көңүлү Жакынкы Чыгышка бурулганын айткан эле.
25-мартка караган түнү Эстония жана Латвиянын аймагын дрондор бузуп кирди.
Delfi басылмасы жазгандай, Латвиянын аба күчтөрү болжол менен түнкү саат 2:00дө чет өлкөлүк дронду каттаган. Ал Орусия менен чек арага жакын Краслава районунда жарылып кеткен. Окуя болгон жерден анын сыныктары табылган. Жарандык инфраструктурага зыян келтирилген эмес.
Латвия армиясынын Бириккен штабынын операциялык маселелер боюнча орун басары, бригадалык генерал Эгилс Лещинскис кийинчерээк өлкө аймагына эки дрон киргенин тактады. Ал эми Латвиянын президенти дрондор Украинага тийиштүү болгонун билдирди.
Ал эми Эстонияда бийликтин маалыматына ылайык, дрон Нарвага жакын жайгашкан Аувере электр станциясынын түтүгүнө урунган. Чоң зыян келтирилген эмес, станция ишин уланткан.
Бийлик дрон Орусия тараптан киргенин билдирген, бирок окуя үчүн Москваны түздөн-түз айыптаган жок.
«Азыркы маалыматтар боюнча, дрон атайын Эстонияга багытталган эмес», — деди башкы прокурор Астрид Ази.
Эстониянын өкүлдөрүнүн сөздөрүнө караганда, дрон украиналык болушу да мүмкүн.
25-мартка караган түнү Ленинград облусундагы Усть-Луга порту жана Выборг шаары бутага алынган. Киев портко жасалган чабуулду мойнуна алды.
23-мартка караган түнү Литва аймагына да дрон кулаган. Литванын коргоо министри Робертас Каунас дрон Украинага таандык болушу мүмкүн экенин жана радиоэлектрондук күрөш каражаттарынын таасиринен багытынан адашкан болушу ыктымал экенин билдирген.
Орусиянын армиясы Украинанын аймактарына 500дөн ашуун дрон менен жапырт чабуул койду. Адатта орус күчтөрү аба соккуларды түнкүсүн урат. Ал эми бул жолку чабуул күндүз болуп, анын кесепетинен үч адамдын өмүрү кыйылды. Ондон ашуун адам жаракат алды. Өлкө батышында жайгашкан Львов шаарындагы тарыхый имараттар жабыркады.
Львовдо тартылган видеолордо дрон шаардын борборундагы имараттын үстүнөн учуп өтүп, чиркөөгө жакын жайгашкан үч кабаттуу турак үйгө сокку урганы көрүнөт. Соккудан кийин жалын асманга көтөрүлгөн.
«Орусия күндүз эл көп жүргөн шаар борборуна сокку урууда. Бир нече мүнөт мурун орус-иран дрондору Львовго сокку уруп, эки адам оор жаракат алды», — деп жазды Украинанын премьер-министри Юлия Свириденко социалдык тармактарга.
Көп өтпөй жергиликтүү бийлик 20 киши ооруканага жаткырылганын ырастады.
Ал эми Украинанын тышкы иштер министри Андрей Сибига 24-мартта Тернополь, Винница, Ивано-Франковск, Житомир, Запорожье жана Днепр аймактары да чабуулга кабылганын кошумчалады.
Украинанын аба күчтөрү билдиргендей, Орусия 24-мартта 9:00дөн 18:00гө чейин 556 дрон менен чабуул койгон. Алардын көбү атып түшүрүлгөн.
Мунун алдында эле орус армиясы түн ичинде жана эртең менен 426 дрон жана ракета менен сокку урганы маалым болгон. Бул чабуулдардан кеминде төрт адам каза болуп, 20дан ашууну жаракат алган. Президент Владимир Зеленский өлкөнүн 11 аймагында кыйроолор катталганын айтты.
«Бул чабуулдун масштабы Орусиянын согушту токтотууга ниети жок экенин айкын көрсөтөт. Орусияга кошумча жана күчтүү басым болмоюнча, Москва олуттуу жоготууларга дуушар болмоюнча согуштан баш тартуу же тынчтыкка кайтуу каалоосу болбойт»,-деди Украинанын президенти.
Полтава облусунда эки адам каза болуп, 11 адам жаракат алган. Ал жерде турак жайлар жана мейманкана жабыркаган. Запорожье облусунда дрон жана ракета менен жасалган чабуулдан бир адам каза болуп, дагы бешөө жаракат алган. Харьков облусунда орус дрону жүргүнчүлөрдү ташыган поездге тийип, 61 жаштагы жүргүнчү каза болгон. Ал эми Днепр шаарында көп кабаттуу имаратка сокку урулуп, кеминде сегиз адам жаракат алган. Экөөнүн абалы оор.
Адатта орус бийлиги жарандык жайларга сокку урганын четке кагып, бир гана аскердик объекттерди бутага аларын айтып келет.