31-мартка караган түнү орус армиясы Украинанын аймагын жалпысынан 289 согуштук дрон менен бутага алганын өлкөнүн Аскер-аба күчтөрүнүн басма сөз кызматы билдирди.
Украин аскерлеринин маалыматына караганда, эртең мененки саат 8:00гө чейин 267 дрон атып түшүрүлдү же иштен чыгарылды.
11 жерде дрондун жыйырма соккусу катталып, дагы алты жерде сыныктары түшкөнү аныкталган.
Одесса жана Полтава облустарынын бийликтери да шейшембиге караган түнү дрон соккулары тууралуу кабарлашкан. Полтавада бир адам каза болуп, төртөө, анын ичинде эки бала жаракат алганы белгилүү болгон.
Дрон чабуулуна кабылганын Орусия да билдирди. Өлкөнүн Коргоо министрлиги 31-мартка караган түнү 92 украиналык дрон "кармалып, жок кылынганын" жарыялады.
Мекеменин маалыматына караганда, дрондор Брянск, Белгород, Ленинград, Курск, Новгород, Ростов, Псков, Смоленск, Орел, Калуга, Тверь жана Москва облустарынын аймагында атып түшүрүлдү.
Орусия коңшусу Украинага каршы ачкан согуш токтобой келатканына төрт жылдан ашты. Тынчтык сүйлөшүүлөрүнөн майнап чыга элек.
Расмий Киев Орусиянын аймагын аткылоосун анын Украинага каршы аскердик, согуш жүргүзүү мүмкүнчүлүгүн алсыратуу максаты менен түшүндүрүп келет.
Бүгүн 31-мартта Украинанын Буча шаарынын орус аскерлеринен бошотулушунун төрт жылдыгын эскерүү иш-чараларына Европа Биримдигинин тышкы иштер министрлери да катышууда. Киевге Европа дипломатиясынын башчысы Кая Каллас баштаган делегация барды.
Эскерүү иш-чараларынан тышкары алар украин жетекчилиги менен жолугушуу өткөрүп, кызматташтык маселелерин талкуулоодо. Еврошаркеттин каржылык жардам берүүсүн бөгөттөп жаткан Венгрия темасы, ок атышууну токтотуудан кийин Орусияны согуш кылмыштары үчүн жазага тартуу маселелери да каралат.
Киев облусуна караштуу чакан Буча шаары Орусиянын Украинага толук масштабдуу согушу башталгандан беш жума өткөндөн кийин, 2022-жылдын 31-мартында бошотулган. Шаар бийлигинин маалыматына караганда, Бучадагы оккупация учурунда 458 жайкын тургун каза болгон, алардын 419ун атып же кыйнап өлтүрүшкөн. Буча орус аскерлеринин мыкаачылыгынын символуна айланган.
Украин бийлиги Буча окуяларын геноцид деп жарыялоо зарылдыгын айтып келет. Орусия айыптоолорду четке каккан.
Орус аскерлери бул шаарга 2022-жылдын 27-февралында кирип барышкан. Калаа толук бошотулганын мэр Анатолий Федорук 31-мартта жарыялаган.
Орусиянын Украинага "атайын аскердик операция" деп атаган негизсиз кол салуусуна 2026-жылдын 22-февралында туура төрт жылдын жүзү болду. Бул мезгил аралыгында Украинада миңдеген киши бейажал өлүм тапты, миңдегени майып, качкын болуп, үй-жайсыз калды.
Москванын согушуна жооп иретинде Украина Орусиянын армиясынын каржы булагы деп эсептелген мунай заводдорун жана башка объектилерин маал-маалы менен бутага алып келет.
Орусиянын аскерлери Украинага күн сайын сокку уруп жатат. Жекшембиге караган түнү орус тарап 400дөн ашуун дрон менен чабуул койгонун Киев билдирген. Жекшембиде Украинанын Донецк облусундагы Краматорск шаарына Орусиянын чабуулунда үч киши каза тапты, арасында 13 жаштагы бала бар. Жараат алгандар акыркы маалымат боюнча 14 кишиге жетти.
Орусиянын Ростов облусунун бийлиги украиналык дрондордун жапырт чабуулунан Таганрог шаарында бир киши каза тапканын, сегизи жараат алганын билдирди.
«Таганрог абадан жапырт чабуулга кабылды. Абадан коргонуу күчтөрү баарын жарактан чыгарды», — деп жазды Таганрогдун мэри Светлана Камбулова.
Учкучсуз учактардын калдыктары кулаганда бир нече турак жай, социалдык жана өнөр жай ишканаларына зыян келтирилген.
Ростов облусунун губернатору Юрий Слюсарь аймакта абадан коркунуч тууралуу эскертүү жарыяланганын айтты.