24-апрелдин таңында орус армиясынын чабуулунан Одесса шаарында жетимиш жаштан ашкан жубайлардын өмүрү кыйылды. Дрон соккуларынан бир катар облустарда карапайым тургундар жабыркады. Ал арада Орусиядагы Туапсе шаарында кара май иштетүүчү заводго жасалган соккулардан улам калаада "мунай жамгыры" жаады. Заводдо тутанган өрттү өчүрүү иштери көпкө уланды. Шаардыктар көчөгө чыгууга мүмкүн болбой калганын айтышты.
"Мына ушундай кара май аралашкан тамчылар түштү. Азыр жакыныраак көрсөтөм. Мына ушундай...", - деди Туапсенин тургундарынын бири шаардан тартылган видеодо.
Калаада «мунай жамгыры» жаап жатты. Мындай кара тоголоктор унааларга, имараттарга, кийим-кечеге, атүгүл үй жаныбарларынын жүнүнө чейин жабышып калып жатканын тараган сүрөттөрдөн, видеолордон көрүүгө болот.
Сергей Гапон геоинформатика боюнча эксперт. Алнын айтымында, күйүүчү заттар атмосферага көтөрүлүп, бири-бири менен байланышып, булуттарда конденсацияланып, андан кийин жамгырдын тамчылары менен кошо жерге түшөт:
"Негизи, эгер мунай сактагычтар эмес, башка нерсе күйүп жатса да ушундай жамгыр жаашы мүмкүн. Мисалы, торф катмарлары катуу күйгөндө же токой өрттөнгөндө да ушундай көрүнүштөр байкалат. Бул жолу атмосферага өтө чоң көлөмдө күйүүчү заттар көтөрүлгөн. Ошондуктан ушундай жамгыр жаап жатат. Жергиликтүү тургундар мындай жамгырды дагы бир нече жолу сөзсүз көрүшөт".
Мунун баары украин армиясынын Туапсе мунай иштетүүчү заводуна жасаган соккуларынын жыйынтыгы.
Дрондор Туапсе шаарын 16-апрелде жана 20-апрелде бутага алган. Экинчи жолкусунда мунай сактоочу жайга чабуул коюлган. Анда тутанган өрттү тиешелүү кызматтар ушул күнгө чейин өчүрө албай убара тартууда.
24-апрелге карата беш резервуар күйүп жатканы тууралуу маалыматтар бар. Спутниктен алынган кадрларга караганда, кара түтүн 300 чакырымга чейин созулуп, Ставрополго чейин жеткен.
Роспотребнадзор Туапсе шаарынын тургундарын зарыл болбосо көчөгө чыкпоого жана үйдүн терезелерин ачпоого чакырды. Ал эми калаадагы мунай иштетүүчү завод жумушун биринчи чабуулдан кийин эле токтоткон.
Бул жумада украин дрондору Сызран шаарындагы мунай иштетүүчү заводду дагы бутага алды. Ошол эле учурда соккулар Новокуйбышевск мунай иштетүүчү заводуна да урулган. Чабуул 22-апрелде кайра кайталанган, бирок Сызрандагы завод биринчи соккулардан кийин эле ишин токтоткон.
Жалпысынан апрель айынын башынан бери, Reuters агенттигинин маалыматына ылайык, Орусияда мунай иштетүүчү төрт завод ишин токтотту.
Украина энергетикалык объектилерди мыйзамдуу аскердик бута деп эсептейт.
Ал арада орус армиясы 24-апрелге караган түнү Украинадагы бир катар аймактарга абадан сокку урду.
Орус аскерлери 24-апрелге караган түнү Украинанын Одесса аймагына сокку урганын, кеминде эки кишинин өмүрү кыйылганын шаардын жана облустун аскердик администрация башчылары Сергей Лысак жана Олег Кипер Telegram каналдарында билдиришти.
Турак жай кварталдары жана соода кемеси бутага алынып, каза тапкан эки адамдан тышкары дагы 14ү жаракат алганы, алардын экөө ооруканага жаткырылганы маалымдалды.
Лысак чабуулдун курмандыгы 75 жаштагы жубайлар болгонун билдирди. Куткаруучулардын маалыматы боюнча, алар эки кабаттуу үйгө сокку урулганда каза болушкан, дагы бир адам жаракат алган. Дагы үч үйгө чабуул коюлганы, ал жерде батирлер талкаланып, өрт чыкканы, алты адам жаракат алганы кабарланды.
Бул жолу орус аскерлери Украинаны эки "Искандер-М" баллистикалык ракетасы жана 107 согуштук дрон менен аткылаганын, эртең мененки саат 8ге карата 96 учкучсуз учак атып түшүрүлгөнүн украин Куралдуу күчтөрүнүн Аба күчтөрү маалымдады.
Николаев облусунда эртең мененки дрон чабуулунан, сыныктардын түшүүсүнөн 45 жана 68 жаштагы аялдар жабыркап, эки үй зыянга учураганын жергиликтүү бийлик билдирди.
Орусиянын Коргоо министрлиги жумага караган түнү өлкөнүн төрт аймагында жана аннексияланган Крымда Украинанын 10 учкучсуз учуучу аппараты "кармалып, жок кылынганын" билдирди.
Одесса шаарында жашы жетимиштен ашып калган жубайлар көз жумду. Орусиянын бийлиги бир гана аскердик объектилерге сокку урганын билдирип, жайкын тургундарга коюлган чабуулдарды мойнуна албайт.
Кавказ.Реалии жазгандай, Краснодар крайындагы Туапсе шаарында учкучсуз учактардын чабуулунан кийин портто күйүүчү май күйүп жатат, аккан мунай деңизге жана шаардык пляжга түштү. Ыкчам штаб билдиргендей, нөшөр жамгырдан улам мунай агып түшкөн Туапсе дарыясында суунун деңгээли көтөрүлүп, тосмолордон ашып, деңиз акваториясына жана жээк сызыгына түштү. Тазалоо иштери жүрүп жатканы кабарланууда.
Буга чейин бийлик көптөгөн арыздардан кийин шаардын бир катар райондорунда бензол, ксилол концентрациясы нормадан 2-3 эсе ашканын мойнуна алган.
Орусиянын Новокуйбышев шаарында өнөр жай ишканасына дрон соккусунда бир киши каза тапты, жараат алгандар да бар экенин Самара облусунун башчысы Вячеслав Федорищев билдирди. Ал кайсы ишкана бутага алынганын тактаган жок.
Буга чейин украиналык дрон Новокуйбышев мунай заводуна бир нече жолу сокку урган.
Нижний Новгороддогу Кстово районундагы мунай заводу да кайра чабуулга кабылып, жарылуулар болгону кабарланды.
Дрондор аннексияланган Крымга да чабуул койгону айтылды. "Крымский ветер" жана Exilenova+ Телеграм каналдары Феодосиядагы мунай заводуна сокку урулганын жазып жатышат.
Орусиянын түштүгүндөгү Туапсе шаарында болсо учкучсуз учактардын чабуулунан кийин мунайды кайра иштетүүчү завол менен "Роснефтинин" деңиз терминалы өрттөнгөн.
Өрттүн түтүнү 300 километр аралыкка жеткенин спутниктен тартылган сүрөттөрдөн көрүүгө болот. Жергиликтүү тургундар Туапседе май аралашкан жамгыр жааганын жазышты.
Орусиянын Украинага "атайын аскердик операция" деп атаган негизсиз кол салуусуна 2026-жылдын 22-февралында туура төрт жылдын жүзү болду. Орус аскерлери Украинага күн сайын сокку уруп жатат. Бул мезгил аралыгында Украинада миңдеген киши бейажал өлүм тапты, миңдегени майып, качкын болуп, үй-жайсыз калды.
Москванын согушуна жооп иретинде Украина Орусиянын армиясынын каржы булагы деп эсептелген мунай заводдорун жана башка объектилерин маал-маалы менен бутага алып келет.
Орусия Днепр жана Житомирге сокку урду, бир нече кишинин өмүрү кыйылды
Орусиянын армиясы 23-апрелге караган түнү Украинанын Днепр шаарына сокку уруп, каза тапкандар үч кишиге жетти. Бул тууралуу шаардын мэри Борис Филатов билдирди.
Буга чейин Днепропетров облустук аскердик администрациясынын башчысы Александр Ганжа эки киши каза болуп, ону ар кандай жараат алганын, анын төртөө орточо оор абалда ооруканага жаткырылганын кабарлаган.
Бейтапканага түшкөндөрдүн экөө 9 жана 14 жаштагы кыздар.
Жергиликтүү бийлик соккунун кесепетинен көп кабаттуу турак жайдын жогорку кабаттарында өрт чыкканын маадымдаган.
Орусиялык аскерлер Житомир облусунун жарандык транспорттук инфраструктурасына да сокку уруп, бир аял каза тапканын дубандын аскердик администрациясынын жетекчиси Виталий Бунечко кабарлады.
Өткөн түнү орус армиясы Украинага 155 дрон учурган, анын 139у жок кылынган.
Орусиянын Коргоо министрлиги аткылоолор тууралуу комментарий бере элек.
Украина жана эл аралык уюмдар Орусиянын жарандык инфраструктурага жана жай тургундарга багытталган соккуларын согуш кылмышы деп эсептейт. Далилдерге карабай Москва муну танып, соккулар аскердик буталар урулуп жатканын айтып келет.
21-апрелге караган түнү Орусия Украинанын Сумы шаарына сокку урду. 15 киши жараат алды, арасында 13, 15 жана 17 жаштагы кыздар бар.
Баары ооруканага жаткырылганын Телеграм каналында Сумы облустук администрациясынын башчысы Олег Григоров билдирди.
Жапа чеккендердин көбү улгайган адамдар.
Сумы шаардык аскердик администрациясынын жетекчиси Сергей Кривошеенко маалымдагандай, чабуулда көп кабаттуу үйлөр, инфраструктура объектилери жана автоунааларга зыян келтирилген.
"Полиция медициналык жайлардын биринин чатырына сокку тийген фактыны каттады", — деп билдирди Украинанын Улуттук полициясы.
Украинанын Аба күчтөрү 21-апрелге оогон түнү орусиялык армия эки баллистикалык "Искендер" ракетасы, 143 учкучсуз аппарат менен чабуул койгонун маалымдады. 116 дрон атып түшүрүлгөн.