Украинанын президенти Владимир Зеленский 17-майга караган түндө украиналык учкучсуз учактардын Москва жана Москва облусуна соккулары тууралуу комментарий берди. Украин куралдуу күчтөрүнүн Башкы штабы маалымдагандай жана жеринен тартылган сүрөт жана видеолор менен тастыкталгандай, соккунун натыйжасында энергетика жана аскер өндүрүшүнө байланышы бар бир катар объектилер жабыркады.
Турак жайлар да жабыркады. Акыркы маалыматтар боюнча үч адам мерт кетти, арасында Индиянын жараны бар. 17 адам жаракат алды.
"Бүгүн Украинанын Коргонуу күчтөрү, Коопсуздук жана чалгын кызматы Москва аймагы боюнча өтө масштабдуу иштешти", - деди Зеленский видеокайрылуусунда. Ал бутага чейинки аралыктар 500 чакырымдан ашканын белгиледи, ал эми Москва аймагы абадан коргонуучу система менен тыгыз жабдылганын, "украиналык алыска сокку уруучу аракеттер алардан ашып түшкөнүн" айтты.
Зеленский Украинанын алыскы аралыкка ийгиликтүү соккулары "кырдаалды жана орусиялык согуш тууралуу жалпы дүйнөлүк түшүнүктү олуттуу өзгөртөрүн" айтты.
"Согуш күтүлгөндөй эле "туулган жээгине" кайтып келе жатат жана бул Украинага каршы баскынчылык согуш жүргүзүүгө такыр мүмкүн эместигинин так белгиси", - деди Зеленский.
Зеленский соккуларды украин шаарларына орусиялык соккуларга "толугу менен адилеттүү жооп" деп атады.
Украин Куралдуу күчтөрүнүн Башкы штабы жекшембиде соккулардын натыйжасында Москва облусунун Зеленоград шаарында орусиялык аскер-өндүрүш комплексинин маанилүү компоненти саналган жана микроэлектроника, радиоэлектоника, оптикалык системалар жана аскердик муктаждыктар үчүн роботтехника өндүрүүгө катышкан "Ангстрем" ишканасы жарактан чыкканын билдирди.
Ошондой эле Москва облусунда мунай куюучу "Солнечногорская" насостук станциясы жабыркаган. Башкы штабдын маалыматында Капотнядагы мунай иштетүүчү заводго сокку урулганы тууралуу айтылган эмес. Башкы штаб мындан тышкары Москва облусундагы буталарга RS-1 "Барс", FP-1 "Firepoint", БАРС-СМ "GLADIATOR" жана башка учкучсуз учактар колдонулганын билдирди.
Москванын мэри Сергей Собяниндин маалыматына караганда, сутка ичинде шаар аймагына 120 дрон менен сокку урулган. Орусиянын Коргоо министрлиги түн ичинде украиналык 556 дрон жок кылынганы билдирди.
Орусия ошол эле түнү Украинага дээрлик 300 дрон менен чабуул койгон.
Москва жана Москва облусу 17-майга караган түнү учкучсуз учуучу аппараттар менен жапырт чабуулга алынды. Бул Орусия коңшусу Украинага кол салган согуш башталгандан бери Москва аймагы эң ири соккуга кабылган окуя.
Шаар мэри Сергей Собяниндин Telegram каналындагы бир нече билдирүүсүнө ылайык, Москвага учкан 85тен кем эмес дронду абадан жасалуучу соккудан коргонуу күчтөрү жок кылды.
Кеминде үч адамдын өмүрү кыйылганы, 10 чакты киши жараат алганы, дрон тийген же сыныктары түшкөн бир нече жерде, анын ичинде Шереметьево эл аралык аэропортуна караштуу тилкеде өрт тутанганы маалым болду.
Украиналык мониторинг каналдары жана ASTRA Телеграм каналы окуя болгон жерлерден сүрөт, видеолорду жарыялап жатышат.
Зеленоградда (Москванын бир бөлүгү) "Элма" технопаркы соккуга кабылганы белгилүү болду.
Шереметьево аэропортунда өрттүн тутанышына дрон сыныгы түшкөнү себеп болду, ал жер терминалдын имаратынан тыш жакта экени кабарланды.
Аэропорттун маалымат кызматы жазганына караганда, "жүргүнчүлөрдү жана учактарды тейлөө кадимки тартипте уланышы камсыздалып жатат". Бирок, онлайн таблодогу маалыматтарга караганда, Шереметьевого келип коно турган учактардын 100дөн ашуунунун убактысы өзгөртүлдү же каттамдын өзү токтотулду. Аэропорттон уча турган жүздөгөн учак да кармалып турат.
Внуково аэропортунда да 100 чакты каттамдын иши үзгүлтүккө учурады.
Москванын тегерегиндеги бир нече аймакта учкучсуз учактар көп кабаттуу үйлөргө тийгени кабарланып, Химки, Истра, Красногорск жана Москванын Михайлов көчөсү аталууда.
Москва облусунда, бийлик өкүлдөрүнүн маалыматы боюнча, үч адам каза болду: бири учкучсуз учуучу аппарат Химкиде жеке үйгө, экөө Мытищиде курулуп жаткан үйгө тийгенде.
Москвада Зеленограддан тышкары Капотнядагы мунай иштетүүчү заводго да чабуул жасалды, мэр Сергей Собяниндин айтымында, 12 адам жабыркады, алар өткөрүү пунктунун жанында турган куруучулар болгон деп айтылууда. Келтирилген зыян тууралуу маалымат жок.
Шаардын борбордук бөлүгүндө да жарылуулар угулду.
Солнечногорск аймагында да мунай куюучу станция жабыркады.
Орусиянын Коргоо министрлигинин маалыматы боюнча, бир түндүн ичинде 556 украиналык учкучсуз учуучу аппарат атып түшүрүлдү, анын ичинде 120га жакыны Москва облусунун үстүнөн. Канчасы атып түшүрүлбөй калганы тууралуу маалымат жок.
Украина азырынча бул чабуулдарга комментарий бере элек.
Буга чейин Украинанын президенти Владимир Зеленский Украина Орусиянын 13-14-майдагы жапырт соккусуна сөзсүз түрдө жооп кайтарарын билдирген, ал чабуулдун кесепетинен Киевде кеминде 24 өмүр кыйылган.
Орусия 16-майга оогон түнү Украинага ар кандай типтеги 294 дрон учурду, алардын 269у атып түшүрүлдү же кармалды. Украинанын аба күчтөрү 15 жерге 20 дрон тийгенин, тогуз жерде алардын калдыгы түшкөнүн билдирди.
Түн ичинде орусиялык күчтөр Одесса облусундагы портко сокку урду. Облустук аскердик администрациянын башчысы Олег Кипердин айтымында, бир дрон Измаилдеги беш кабаттуу турак жайга тийип, терезелери талкаланды. Мындан тышкары Измаил районундагы 39 калктуу конуш жарыксыз калды.
Облустук аскердик администрациянын маалыматы боюнча, Херсон облусуна чабуулда бир адам каза болуп, 23ү жаракат алды.
Эртең мененки саат 7:00 чамасында орусиялык аскерлер Херсондун борбордук районунда кичи автобуска сокку урду. Айдоочу жаракат алып, орточо абалда ооруканага жаткырылды. Харьковдун Киев районундагы соккудан үч адам жаракат алып, гаражга зыян келтирилген. Мэр Игорь Тереховдун айтымында, бир адам жаракат алган. Шаардын Основянский районунда бир адам жаракат алган.
Эртең менен Орусия Запорожьеге да кол салган. Аймактык аскердик администрациянын башчысы Иван Федоровдун айтымында, эки адам осколкадан жаракат алган.
Сумы облусуна соккулардын кесепетинен жалпы жети адам жаракат алды. Украинанын Өзгөчө кырдаалдар боюнча мамлекеттик кызматы Шостка жана Тростянецтеги соккулардын кесепеттеринин сүрөттөрүн жарыялап жатат.
Днепропетров облусундагы чабуулдарда бир адам жаракат алып, болжол менен 30 чакты унаа өрттөнүп, турак жайларга зыян келтирилгенин дубандын башчысы Александр Ганжа билдирди.
Орусия согушта кайтыш болгон 528 жоокердин сөөгүн Украинага кайтарды. Бул тууралуу Аскер туткундары менен иш алып барган Координациялык штаб билдирди. Орус тараптын маалыматына ылайык, сөөктөр украиналык аскерлерге таандык деп болжолдонуп жатат. Украинада алардын тек-жайын аныктоо иши жүргүзүлөт.
Мунун алдында Орусиянын Мамлекеттик Думасынын депутаты Шамсаил Саралиев РБК агенттигине 15-майда Украина менен сөөктөрдү алмашуу күтүлүп жатканын айткан. Киевге 528 сөөк өткөрүлөрүн, Москвага 41 сөөк кайтарыларын билдирген.
Украина тарап бул репатриацияны уюштурууга көмөктөшкөн Эл аралык Кызыл Чырым комитетине ыраазычылык билдирди.
15-майда Москва менен Киев “205ке 205” формуласы боюнча туткун алмашты. Украина президенти Владимир Зеленский бул “1000ге 1000” форматындагы ири алмашуунун биринчи баскычы экенин билдирди. Ар бир тараптан миңден туткун алмашуу 9–11-май күндөрү АКШ президенти Дональд Трамптын кийлигишүүсү менен жетишилген ок атышууну токтотуу келишиминин бир бөлүгү болуп саналат.
Москва сөөктөрдү алмашуу тууралуу расмий маалымат тарата элек.