29-майга караган түнү орусиялык дрон Кара деңизде түркиялык компанияга таандык жана Вануатунун желеги алдында бараткан ANT жүк ташуучу кемесине сокку урду.
Украинанын Аскердик деңиз күчтөрү билдиргендей, жүк жүктөгөн кеме Одесса облусунун портторунун биринен Түркияга багыт алганда чабуулга кабылган. Соккунун натыйжасында кемеде өрт чыгып, эипаждын эки мүчөсү жараат алган.
Одесса облустук аскердик администрациясынын башчысы Олег Кипердин маалыматына караганда, түндө учкучсуз аппараттар Кара деңизде Вануату, Комор аралдары жана Панаманын желеги менен бараткан үч соода кемесине сокку урду.
Одесса облусунда электр линиялары үзгүлтүккө учурап, 4 миңдей абонент жарыксыз калды.
Түндө Запорожье облусу да чабуулга кабылды. Александров районунда көп кабаттуу төрт турак жайга зыян келтирилди. Облустун башчысы Иван Федоров билдиргендей, үч киши жараат алды, анын бири 80 жаштагы аял.
Чернигов облусунда учкучсуз аппараттар Машево кыштагын бутага алды, соккудан мектептин имараты толук күйүп кеткенин Новогород-Северск райондук аскердик администрациясынын жетекчиси Александр Селиверстов маалымдады. Украинанын Аба күчтөрү түндө Орусия 232 дрон жана Искандер-М ракетасы менен чабуул койгонун билдирди. 217 дрон жок кылынган.
"Баллистикалык ракетанын жана 14 дрондун 14 жерге тийгени катталды. Атып түшүрүлгөн дрондордун калдыктары жети жерге тийди", – деп жазылган маалыматта.
29-майга караган түнү Румыниянын Галац шаарында орусиялык дрон көп кабаттуу турак жайга тийди.
Румыниянын Коргоо министрлиги билдиргендей, дрон өлкөнүн аба мейкиндигине киргени радарда катталып, аны кармоо үчүн истребителдер менен тик учактар көтөрүлгөн. Аны атып түшүрүүгө жетише электе көп кабаттуу үйдүн чатырына тийип, өрт тутанган.
Румыниянын Өзгөчө кырдаалдар боюнча башкы инспектораты эки киши жараат алганын ырастады. Мекеменин маалыматына караганда, көп кабаттуу үйдөн 70 киши эвакуацияланды.
Интернетте тараган сүрөттөрдөн дрон шаардын түштүгүнө тийгенин көрүүгө болот. Бул аймактан Украинанын чек арасына чейин аралык 11 чакырымдан ашат.
Буга чейин румын Коргоо министрлиги Орусиянын Украинага чабуулдары учурунда Румыниянын аймагына дрондор кирген же кулаган 45 учур тууралуу кабарлаган. Бирок алар Румыниянын Украина менен чектешкен эл жашабаган аймактарда катталган.
Бул эл жыш жайгашкан районго дрон учуп, карапайым тургундар жараат алган биринчи окуя болду.
Латвиянын парламенти 28-майда жаңы өкмөттүн курамын бекитти. Мурдагы коалиция өлкөгө украиналык дрондордун учуп киришине байланышкан окуядан кийин тараган.
100 депутаттан турган Сейм депутаттарынын 66сы премьер-министр кызматына 47 жаштагы Андрис Кулбергстин талапкерлигин колдоду. Ал латыш өкмөтүн быйыл 3-октябрга белгиленген парламенттик шайлоого чейин башкарат.
Мурдагы премьер Эвика Силиня коргоо министри отставкага кеткенден кийин 14-майда кызматын тапшырган.
7-май күнү украиналык эки дрон Латвия аймагына, анын ичинде Резекнедеги мунай заводунун айланасына кулаган соң бул өлкөдө саясий кризис жаралган. Премьер-министр Эвика Силинянын сындоосунан кийин коргоо министри Андрис Спрудс кызматтан кеткен. Андан кийин өкмөт бөлүнүп, премьер-министр Силиня өзү да кызматтан кетүүгө арыз берген. 17-майда Латвиянын асманына кайрадан дрон учуп кирген.
Украинанын Тышкы иштер министрлиги ошол кезде маалымат таратып, дрондор Латвиянын аймагына орусиялык радиоэлектрондук жабдуулардан улам түшүүсү ыктымалдыгын билдирген.
Орусиядагы бутага бет алган украиналык дрон болушу ыктымал делген учкучсуз учак шейшембиде Эстониянын үстүнөн атып түшүрүлгөн.
Украинанын Жогорку радасы Евробиримдиктен 90 млрд евро өлчөмүндө пайызсыз насыя алуу тууралуу келишимди 28-майда ратификациялады. Бул тууралуу парламенттин басма сөз кызматы билдирди. Документти колдоп 298 депутат добуш берген.
Келишим жакынкы эки жыл ичинде Евробиримдиктен жалпы суммасы 90 миллиард еврого чейин каржылык жардам алууга мүмкүнчүлүк берет.
Бул каражат мамлекеттик бюджеттин тартыштыгын жабууга, макроэкономикалык туруктуулукту камсыз кылууга жана коргонуу-өнөр жай потенциалын чыңдоого, анын ичинде курал-жарак өндүрүүгө жана сатып алууга жумшалат.
Жогорку раданын билдирүүсүндө насыянын негизги суммасы Орусиядан өндүрүлө турган репарациялардын эсебинен гана төлөнөрү айтылат. (Эгер келечекте согуш аяктап, Орусия Украинага компенсация же репарация төлөп берүүгө милдеттендирилсе, ошол акчанын бир бөлүгү ушул насыяны жабууга жумшалат) Ал эми пайыздык төлөмдөрүн Евробиримдиктин бюжети жабат.
Башкача айтканда, Украина бул насыяны өз каражаты менен кайтарбайт деген механизм сунушталууда.
Еврошаркетке мүчө өлкөлөр бере турган 90 миллиард евро “бюжеттик” жана “аскердик” болуп экиге бөлүнөт.
“Аскердик” бөлүктүн алгачкы алты миллиард евролук траншы июнь айында эле которулат деп күтүлүүдө.
Ал эми “бюжеттик” бөлүктү алуу үчүн бир катар шарттар коюлган. Алардын арасында реформаларга байланыштуу мыйзам долбоорлорун кабыл алуу, айрыкча коррупцияга каршы багыттагы өзгөртүүлөр бар.
Еврокомиссиянын башчысы Урсула фон дер Ляйен бүгүн алгачкы төлөмдөр июнь айында эле башталышы мүмкүн экенин ырастады.
Бул насыянын бөлүнүшүн бир топ убакыт бою Венгриянын мурдагы премьер-министри Виктор Орбандын өкмөтү бөгөттөп келген.