Орусиянын Коргоо министрлиги 26-июндагы маалыматында өлкөнүн 12 аймагында, аннексияланган Крымдын, ошондой эле Кара жана Азов деңиздеринин акваторияларынын үстүнөн 660 учкучсуз аппарат жок кылынгандыгын билдирди. Тула облусунда "Азот" химиялык комбинаты чабуулга учурады.
Талдоочулар бул жыл башынан берки эң ири чабуул болгонун жазышты.
26-июнга караган түнү Украина учкучсуз учактар менен Орусиянын бир нече аймагына чабуул койду. Негизги буталардын бири Тула облусунун Новомосковск шаарындагы "Азот" химия заводу болду.
Мониторинг жүргүзгөн Telegram каналдардын маалыматы боюнча, ишканага чабуул бир нече саат бою уланды.
Күбөлөр заводдун аймагында жарылуу болуп, коюу түтүн каптаганын, аба аммиак жыттанып жатканын, электр энергиясы менен камсыздоодо үзгүлтүккө учураганын билдиришти.
Ошондой эле Новомосковск ГРЭС ишканасы жакта өрт чыккандыгы тууралуу маалыматтар чыгууда.
Тула облусунун губернатору Дмитрий Миляев учкучсуз учактардын чабуулунан Новомосковск шаарында өнөр жай ишканасы жана электр берүү линиясы жабыркаганын тастыктады.
Щекино районунда жеке турак үй жабыркап, жергиликтүү тургун жаракат алды.
Новомосковск шаарындагы "Азот" - Орусиядагы аммиак жана азот семирткичтерин өндүргөн ири ишкана. "Еврохим" холдингине кирген ишкана азот кислотасын, метанол, кальций хлоридин жана башка химиялык продукция да чыгарат. Завод буга чейин да бир нече жолу украиналык чабуулдардын бутасы болгон.
Москва шаарынын мэри Сергей Собянин түн ичинде шаардын жана облустун үстүнөн кеминде 47 дрон атып түшүрүлгөндүгүн билдирди.
Москва жана Подмосковье аймагында чукул кызматтар урандылар түшкөн жерлерде иштеп жатышканы айтылды.
Telegram каналдар аннексияланган Крымдагы Керчь шаарында Орусиянын коргонуу позицияларына чабуул болгондугун билдиришти.
Орусиянын Коргоо министрлиги түн ичинде аба чабуулдарынан коргонуу күчтөрү өлкө аймагынан, аннексияланган Крымдын, ошондой эле Кара жана Азов деңиздеринин акваторияларынын үстүнөн 660 украиналык учкучсуз учакты жок кылгандыгын билдирди.
Орусия коңшусу Украинага каршы толук масштабдуу согуш ачып, анын аймагын күн сайын дрон жана ракета менен аткылап келатканына бешинчи жыл болуп баратат. Соңку жылдары Орусиянын өзүнүн аймагы да бутага көп алынууда. Украина Орусиядагы чабуулдарга адатта комментарий бербейт, болгону, Москванын согуш машинасын токтотуу үчүн анын мунай жана аскердик продукция чыгаруучу ишканаларын жарактан чыгаруу керек деп эсептей турганын айтып келет.
Ал тапта Орусия 26-июнга караган түнү Украинанын аймагына «Искандер-М» баллистикалык ракеталарынан жетини учурду, 189 дрон менен чабуул койду. Бул тууралуу украин Куралдуу күчтөрүнүн баса сөз кызматы билдирди.
Ракеталардын үчөө, дрондордун 174ү атып түшүрүлгөнү, төрт ракета жана 11 учкучсуз учак бутага жеткени, айрым жерлерге сыныктары түшкөнү маалымдалды.
Орусия Казакстандан 50 миң тоннага жакын АИ-92 үлгүсүндөгү бензин жеткирүү боюнча сүйлөшүүлөрдү жүргүзүүдө. Бул тууралуу тармактагы төрт булакка таянып Reuters агенттиги жазды.
Агенттиктин маалыматына ылайык, быйыл Орусияда бензин өндүрүшү былтыркыга салыштырмалуу болжол менен 25% азайды.
Казакстандын бийлиги азырынча мындай сүйлөшүүлөр жүрүп жатканын расмий түрдө четке кагууда. Өлкөнүн энергетика министри Ерлан Аккенженов Москвадан күйүүчү май жеткирүү боюнча расмий кайрылуу түшпөгөнүн билдирди.
Reuters жазгандай, рыноктогу абалды турукташтыруу үчүн Орусиянын бийлиги ар кандай чараларды карап жатат.
Алардын арасында бензин экспортун чектөө, мунайды иштетүүчү ишканаларга субсидияларды көбөйтүү жана күйүүчү май импорттоо бар.
Ошондой эле Москва ички базар үчүн бензин менен дизелдин сапатына коюлган талаптарды жеңилдетип, деңиз аркылуу күйүүчү май ташуу мүмкүнчүлүгүн да караштырып жатат.
Орусиялык армия Сумы жана Запорожьедеги күйүүчү май куйган станцияларга сокку урду
Сумыга урулган соккудан төрт адам жабыр тартты. Облустук аскердик администрациянын башчысы Олег Григоров май куючу станциянын эки кызматкери ооруканага жеткирилип, эки кардарга жеринде жардам көрсөтүлгөнүн билдирди.
Григоров орусиялыктар мунай инфраструктурасына тынымсыз сокку уруп, калкты күйүүчү май менен камсыздоочу логистиканы үзгүлтүккө учуратып жатканын айтты. Сумынын өзүндө эле 13 жолу май куюучу жайларга чабуул жасалган.
Сокку Запорожьедеги бензин куйган жайга да урулган. Жабыр тарткандар тууралуу маалымат түшө элек. Облустун аскердик администрациясынын башчысы Иван Федоров аймакта орусиялык чабуулдан улам эки адам каза таап, 22си жабыр тартканын билдирди.
24-июнга караган түнү украин учкучсуз аппараттары аннексияланган Крымдын энергетикалык инфраструктурасына кайрадан сокку урду. Натыйжада Севастополь электр жарыгысыз калды.
Украин мониторинг каналдары аннексияланган Крымдын Симферополь шаарындагы Жылуулук электр станциясына учкучсуз аппараттардын соккусу тууралуу кабарлашты. Бул маалыматты ASTRA басылмасынын OSINT анализи да тастыктоодо.
Севастополдо подстанция жана Керч аймагында порт аткыланганы кабарланды. "Крымский ветер" Телеграм каналынын маалыматына караганда, подстанцияга кеминде үч жолу чабуул коюлду. Бул энергетикалык объект жалпы Севастополь аймагын электр жарыгы менен камсыздайт. Ал жерде өрт катуу тутанганы айтылууда.
Аннексияланган Севастополдун Орусия дайындаган губернатору Михаил Развожаевдин айтымында, шаар "убактылуу электр энергиясысыз калды". Электрдин жоктугунан бүгүн троллейбустар каттамга чыкпай, бала бакчалар өзгөчө режимге которулду. Развожаев адистер зыяндын көлөмүн баалап жатышканын кошумчалады.
Крымда электр энергиясы менен камсыздоо 21-июндан бери уланып жатат, ошол күнү украиналык учкучсуз учактар Керчке жапырт чабуул жасаган. Мындан тышкары, жарым аралда күйүүчү май кризиси жаралып, бензин сатып алуу оорлоодо.