Ишембиге караган түнү Орусиянын армиясы Украинанын аймактарын "Искандер М", Х-59/69 авиациялык ракеталары жана 80ден ашуун дрон менен аткылады. Арасынан ракеталар жана 17 дрон бутага тийип, калгандарын Украинанын абадан коргонуу системалары атып түшүргөн.
Одесса облусунун жарандык инфраструктурасын аткылоо учурунда азык-түлүк кампасында өрт тутанганын облустук администрация башчысы Олег Кипер жазды. Анын айтымында, 29 жана 41 жаштагы эки адам жараат алып, биринин абалы оор.
Сумы шаарын аткылоодо үч киши каза болгонун, бирөө бала экенин Украинанын Өзгөчө кырдаалдар боюнча мамлекеттик кызматы кабарлады.
"Соккулар шаардын борбордук бөлүгүндөгү көчөлөргө урулган. Талкаланган көп батирлүү үйлөрдөн беш кишини куткарып калдык. Дагы 27 адам, анын ичинде жети бала түрдүү жарааттарды алды", - деп жазылган маалыматта.
Аймактын башчысы Олег Григоровдун билдиришинче, жараат алган бир адам ооруканада каза болду.
Харьков облусунун башчысы Олег Синегубовдун билдиришинче, 13 киши жараат алып, жарандык инфраструктура объекттери кыйраган.
Запарожьеде эки киши каза болуп, 39у жараат алды. Бир сутка ичинде тийиштүү кызматтарга турак жай, автоунаа жана инфраструктуралык объектилер жабыркаганы тууралуу 344 билдирүү түшкөн.
Донецкиде беш киши каза болуп, 12си жараат алды. Бул аймакка коюлган чабуулдан Дружковка, Славянск жана Краматорск көбүрөөк жабыр тарткан.
Орус армиясы Херсон облусундагы "Чернобаевская" канаттуулар фабрикасына авибомба таштаган.
4-июлдун таңында орусиялык дрондор Украинанын Полтава облусундагы "Нефтегаз" компаниялар тобунун газ өндүрүүчү объекттерине чабуул коюп, өрт чыккан ишканада жумуш токтоду. Бул тууралуу “Нафтогаз” башкармалыгынын төрагасы Сергей Корецкий маалымдады. Объектиге буга чейин дагы сокку урулган.
Санкт-Петербургда украин дрондору мунай терминалына сокку урду
4-июлга караган түнү Санкт-Петербург шаары дрондордун жапырт чабуулуна кабылды. Шаардын губернатору Александр Бегловдун маалыматында, сокку Киров районундагы мунай терминалынын аймагына тийген.
"Техногендик кесепеттер жоюлду. Жабыркагандар жок", - деп жазды Беглов.
Astra басылмасынын маалыматына ылайык, "Петербург мунай терминалынын" аймагында өрт чыккан.
Ленинград облусунда түн ичинде жалпы 72 дрон атып түшүрүлгөнүн аймактын губернатору Александр Дрозденко билдирди. Анын айтымында, атып түшүрүлгөн дрондордун сыныктары Высоцк порту жайгашкан аймакка кулаган.
Брянскиде дрон чабуулунан бир адам каза болду
Украинанын дрондору Брянск шаарындагы Чайковичи конушундагы турак үйгө сокку урган. Натыйжада бир адам каза таап, дагы эки адам жараат алганын аймактын башчысынын милдетин аткаруучу Егор Ковальчук билдирди.
Анын айтымында, турак үй толугу менен талкаланып, дагы жети үй жана сегиз жарандык автоунаа жабыркаган.
Орусия аннексиялап алган Крымда чабуулдан улам бир адам каза таап, дагы экөө жараат алды
Аннексияланган Крымда түнкү чабуулдун натыйжасында бир адам каза таап, дагы эки адам, анын ичинде 10 жаштагы бала жараат алганын Крымдын Орусия дайындаган башчысы Сергей Аксёнов билдирди. Анын айтымында, жаракат алгандарга медициналык жардам көрсөтүлүүдө.