Екатеринбургда Wildberries кампасы дрон чабуулуна кабылды, 800 адам эвакуацияланды
Орусиянын Екатеринбург шаарында Wildberries компаниясынын логистикалык борборуна үч учкучсуз учак (дрон) чабуул жасады. Бул тууралуу 7-августта Би-Би-Си Свердлов облусунун губернатору Денис Паслердин маалыматына таянып билдирди.
Анын айтымында, үч дрон логистикалык борбордун чатырына түшүп, өрт чыкты. Учурда өрттү өчүрүү иштери жүрүп, окуя болгон жерде өзгөчө кырдаалдар кызматтары иштеп жатат.
Украиналык дрондордун чабуулунан улам кампанын имаратынан 800 адам эвакуацияланганын Орусия президентинин Урал федералдык округундагы ыйгарым укуктуу өкүлү Артем Жога билдирди. Анын маалыматына караганда, жабыркагандар жок.
Wildberries компаниясы да өзүнүн Telegram каналында Екатеринбургдагы логистикалык борборго дрон чабуулу коюлуп, өрт чыкканын ырастады. Өрттүн аянты азырынча так айтыла элек.
Украиналык мониторинг жүргүзгөн Telegram каналдарында дрон соккусунан кийинки өрт жана түтүн тартылган видео жарыяланган.
18-июлдан бери Орусияда, ушуну менен, Wildberries кампаларын кеминде 15-жолу өрт каптады. Соккулар дээрлик күн сайын болуп жатат, ондой адам каза болду, арасында Тажикстандын бир жараны бар экени кабарланган.
Расмий Киев бул соккуларды маркетплейс Орусия логистикасынын "өтө маанилүү бөлүгү" экендиги менен түшүндүрүп келет. Украин бийлиги Wildberries аркылуу Орусияга аскердик жабдуу, анын ичинде рациялар, ок өтпөс жилеттер жана дрондор үчүн компоненттер жеткирилүүдө деп эсептейт.
Орусиянын Ярославль облусунда мунай иштетүүчү ири заводго сокку урулду
6-августка караган түнү украиналык учкучсуз учуучу аппараттар Орусиянын Ярославль облусунда жайгашкан эң ири мунай иштетүүчү ишканалардын бири болгон «Ярославнефтеоргсинтез» (ЯНОС) заводуна сокку урду. Бул тууралуу Astra басылмасы жана мониторинг жүргүзгөн украиналык Telegram каналдар күбөлөрдүн фото жана видеолоруна таянып билдиришти.
Соккудан кийин заводдун аймагында бир нече жарылуу болуп, өрт чыккан. Социалдык түйүндөрдө тараган видеолордон Ярославль шаарынын үстүн коюу түтүн каптаганын көрүүгө болот.
«Славнефть» компаниясына таандык «Ярославнефтеоргсинтез» заводу Орусиядагы кубаттуулугу боюнча бешинчи ири мунай иштетүүчү ишкана. Ал жылына 15 миллион тоннага чейин чийки мунайды кайра иштетүүгө жөндөмдүү.
Маалыматтарга караганда, Украина бул ишкананы ушуну менен быйыл жыл башынан бери кеминде жетинчи жолу бутага алды.
Ярославль облусунун губернатору Михаил Евраев түнкү чабуулду «эң катуу дрон чабуулдардын бири» деп атады.
Губернатордун маалыматына караганда, абадан коргонуу күчтөрү жалпысынан 88 дронду атып түшүргөн. Чабуулдун кесепетинен бир жеке турак жай күйүп кеткен, көп кабаттуу үйлөрдүн терезелери сынган жана бир нече автоунаа зыянга учураган. Адамдар арасында жабыркагандар бар же жогу айтылган жок.
Орусияда быйыл июль айында мунайды кайра иштетүүнүн орточо суткалык көлөмү 3,6 миллион баррелди түзүп, бул көрсөткүч сезондук нормадан болжол менен үчтөн бирге аз болду. Июль айында, Deutsche Welle жазгандай, өлкөдөгү мунай объектилери кеминде 30 жолу чабуулга кабылды. Бул, расмий эсептөөлөргө караганда, согуш башталгандан бери бир ай ичиндеги экинчи эң жогорку көрсөткүч.
Украинанын соккуларынан мунай иштетүүчү заводдордо өндүрүш 2002-жылдын май айынан берки эң төмөнкү деңгээлге чейин кыскарганын 3-августта Bloomberg агенттиги EA Analytics компаниясынын маалыматтарына таянып кабарлады.
Чабуулга негизинен ири мунай иштетүүчү заводдор, мунай ташуучу танкерлер, ошондой эле деңиз жана куур инфраструктурасы кабылууда.
23-июлда Европа Биримдигинин Орусияга каршы санкцияларынын 21-топтому күчүнө кирген. Бул чаралардын максатынын бири орус бийлигинин мунай сатуудан түшкөн кирешесин кыскартуу экени белгиленген. Еврошаркет мунайдан түшкөн каражатты Москва Украинага каршы согушун каржылоону улантууга жардам берүүдө деп эсептейт.
Орусия коңшусу Украинага каршы толук масштабдуу согуш ачып, анын аймагын күн сайын дрон жана ракета менен аткылап келатканына бешинчи жыл болуп баратат. Соңку жылдары Орусиянын өзүнүн аймагы да бутага көп алынууда. Украина Орусиядагы чабуулдарга адатта комментарий бербейт, болгону, Москванын согуш машинасын токтотуу үчүн анын мунай жана аскердик продукция чыгаруучу ишканаларын жарактан чыгаруу керек деп эсептей турганын айтып калат.
Украинада Орусиянын кезектеги соккуларынан бир нече аймакта адамдар каза болду
6-августка караган түнү Орусия Украинага каршы кезектеги жапырт чабуулдарын улантып, бир нече облуста адамдар каза болду, ондогон тургун жараат алды. Ошондой эле жарандык инфраструктурага олуттуу зыян келтирилди.
Харьков облусундагы Балаклея шаарында орус күчтөрүнүн чабуулунан үч адам каза болду. Шаардык аскердик администрациянын башчысы Виталий Карабановдун айтымында, соккулардын бири жеке турак үйгө тийип, бир аял набыт кетти. Ал жерде өрт чыгып, куткаруучулар урандыларды тазалап жатышат. Дагы бир соккудан бир эркек жана бир аял каза тапты.
Ошондой эле Харьков облусундагы Лозовая шаарында темир жол станциясы учкучсуз учуучу аппараттар менен бутага алынды. Облустук аскердик администрациянын жетекчиси Олег Синегубовдун маалыматына караганда, эки эркек киши каза болуп, сегиз адам жараат алды. Жабыркагандардын айрымдарынын абалы оор деп мүнөздөлүүдө.
Сумы шаары жалпысынан төрт башкарылуучу авиациялык бомба менен бутага алынды, 12 адам жабыркады. Облустук аскердик администрациянын башчысы Олег Григоровдун билдиришинче, көп кабаттуу үйлөр, административдик имараттар жана инфраструктуралык объектилер зыянга учурады.
5-августтун кечинде Одесса районундагы чабуулдан жети турак жай жана бир нече автоунаа зыян тарткан. Бир адам жараат алганын Одесса облустук администрациясынын жетекчиси Олег Кипер билдирген.
Ал эми Запорожье шаарында, баштапкы маалымат боюнча, төрт адам жараат алды. Украинанын Өзгөчө кырдаалдар боюнча мамлекеттик кызматынын билдирүүсүндө тогуз кабаттуу турак үйдүн чатырынын бир бөлүгү талкаланып, жарылуунун толкуну коңшу үйлөргө да зыян келтиргени айтылды.
Украин бийлигинин расмий маалыматына караганда, Киев шаарына жана Киев облусуна жасалган 5-августтагы Орусиянын жапырт ракета-дрон чабуулунан кеминде 17 адам каза болуп, 44 адам жараат алды.
Украин президенти Владимир Зеленский билдиргендей, бул түнү орус аскерлери сокку үчүн 24 баллистикалык ракета, канаттуу Zircon/Onix ракеталарынан төрттү, ошондой эле 115 учкучсуз учуучу аппарат колдонду. Айрым дрондор реактивдүү экени маалым болду.
Негизинен бутага жарандык ишканалардын кампалары, инфраструктуралык объекттер жана темир жол станциясы алынганы айтылды.
Зеленский өнөктөш өлкөлөргө кайрылып, баллистикалык ракеталарды атып түшүрүүгө жөндөмдүү каражаттар көбүрөөк керек болуп жатканын, мындай куралдын жетишсиздиги адам өмүрүн сактап калуу мүмкүнчүлүгүнөн ажыратып жатканын айтты.