Украинанын учкучсуз учактары 20-августта Татарстанга жана Краснодар крайына чабуул койду. Бул тууралуу Телеграмдагы мониторинг каналдары жана жергиликтүү бийлик өкүлдөрү билдиришти.
Нижнекамск шаарынын мэри Радмир Беляев 20-августтун таңында абадан коргонуу күчтөрү кезектеги жапырт чабуулдун мизин кайтарганын билдирди. Украиналык Exilenova+ жана Supernova+ мониторинг каналдарынын маалыматына караганда, бутага "Танеко" мунайды кайра иштетүүчү заводу ("Татнефть") алынган.
Exilenova+ жана Supernova+ каналдарынын маалыматы боюнча, дрондор Темрүк районундагы "Таман" көмөк чордонуна (Кубан менен Крымды байланыштырган энергетикалык көпүрөнүн негизги түйүнү) жана Волна кыштагындагы "Таманьгазнефть" мунай терминалына да сокку урган. "Крымский ветер" каналынын маалыматына ылайык, 30-июлда украиналык дрондор аталган терминалдагы 12 резервуарды жок кылган.
Мындан тышкары, "Крымский ветер" спутниктен алынган маалыматтарга таянып, Украинага "Шахед" дрондорун учуруу үчүн колдонулган Приморско-Ахтарск аскердик аэродромунун аймагында өрт катталганын билдирди.
Ульяновск облусунун губернатору Алексей Русских дрондордун чабуулунан бир адам жабыркаганын маалымдады. Анын айтымында, облустун үстүнөн 11 дрон атып түшүрүлгөн.
"Новоспасск районунда чабуулдун мизи кайтарылды. Инфраструктура жабыркаган жок. Окуя болгон жерде атайын кызматтар иштеп жатат. Электр линиясынын мамыларына зыян келтирилип, оңдоо иштери жүрүүдө. Электр менен камсыздоо үзгүлтүккө учураган жок. Тилекке каршы, жабыркаган адам бар. Жаш жигит башынан жаракат алган, абалы оор", – деп жазды ал.
Украина тарап азырынча Орусиянын аймагына соккулар тууралуу маалыматка комментарий бере элек.
Орусиянын Коргоо министрлиги Астрахань, Белгород, Брянск, Волгоград, Воронеж, Калуга, Курск, Орёл, Ростов, Рязань, Самара, Саратов, Тамбов, Тула жана Ульяновск облустарынын, Москва аймагынын, Краснодар крайынын, аннексияланган Крымдын, Татарстандын, ошондой эле Азов жана Кара деңиздеринин акваториясынын үстүнөн 726 украиналык дрон кармалып же жок кылынганын билдирди.
Орусиянын армиясы 20-августка караган түнү Украинанын борбору Киевге жапырт сокку урду. Акыркы маалыматтарга караганда, 12 киши каза таап, 33ү жараат алды.
Киевде 21-август аза күтүү күнү деп жарыяланды.
Калаанын мэри Виталий Кличко билдиргендей, Соломенск районунда чабуулдан он кабаттуу турак жайдын 8-9-кабаттары талкаланды. Жакын жайгашкан имараттардын терезелери күбүлүп калды, мектеп, балдар ооруканасы жана гаражга зыян келтирилди.
Дагы бир медициналык мекеменин айнектери талкаланып, жакын жерде токтоп турган автоунаалар өрттөндү. Өрт төрт кабаттуу дагы бир имараттын акыркы кабаттарында да чыкты.
Дарницк районунда эл жашабаган имараттар жана кампаларга, Святошинск районунда курулушу бүтө элек объектиге зыян келтирилип, кампалар күйүп кетти.
Киев облусунун Бровары районунда Орусиянын чабуулунан бир киши каза таап, дагы бири жараат алганын облустук аскердик администрациясынын башчысы Тимур Ткаченко билдирди.
Анын айтымында, өнөр жай объектисине зыян келтирилген. Украинанын Өзгөчө кырдаалдар кызматы жети киши жабыркаганы тууралуу маалымат таратты. Күйүүчү май ишканасынын эки объектинде, кампа жана жер тамдарда өрт чыкты, автоунаалар өрттөнүп кетти.
Орусиянын армиясы 19-августта Украинанын Житомир шаарына реактивдүү учкучсуз учактар менен чабуул койду. Соккулардын бири Житомир облустук полиция башкармалыгынын имаратына тийди.
Бул тууралуу облустук администрациянын башчысы Виталий Бунечко Телеграмга жазды.
Кийинчерээк Украинанын Улуттук полициясы соккуда эки кызматкер өлгөнүн, 40ка жакын киши жабыркаганын кабарлады.
Соккунун кесепеттери тууралуу сүрөт-видеолор интернетке жарыяланды.
19-августта эртең менен орус армиясы Херсондун Корабельный районунда маршруттук унааны дрондор менен аткылады. Херсон облусунун башчысы Александр Прокудин андан төрт киши каза таап, бешөө жараат алганын билдирди.
Херсондун башка райондору да бутага алынып, дагы эки киши каза тапкан.
Херсон күн сайын Орусиянын аткылоосуна кабылып келет. Телеграм каналдар шаардын көчөлөрүндө FPV-дрондор карапайым тургундарды ары-бери ойнотуп, "аңчылык" кылып жатканы тууралуу видеолорду таратышкан.
17-августка караган түнү Орусиянын армиясы Украинага 128 учкучсуз учуучу аппаратты учурган. Алардын 106сы атып түшүрүлгөн же кармалганын Украинанын Аба күчтөрү билдирди.
14 жерде дрон тийген учур катталган, дагы эки жерде атып түшүрүлгөн аппараттардын сыныктары кулаган.
Днепропетровск облусунда орус армиясынын чабуулдарынын натыйжасында беш адам жабыркаганын облустук аскердик администрациясынын башчысы Александр Ганжа билдирди. Никополь районунда 51 жаштагы аял жаракат алган. Калган төрт адам Павлоград шаарынын тургундары. Ал жерде жеке турак үй, чарбалык курулуш жана автоунаа өрттөнгөн.
Херсон облустук аскердик администрациясынын маалыматына ылайык, Херсон шаарынын Днепр районунда дрон жеке турак үйгө тийип, бир жаран жабыркаган. Ага жарылуудан улам жаракат алуу, контузия жана баш мээси көгөргөн деген диагноз коюлган.
Полтава облусунун Кременчуг районунда эки өнөр жай ишканасы өрттөнгөн. Украинанын Өзгөчө кырдаалдар боюнча мамлекеттик кызматы билдиргендей, объектилердин бириндеги өрт ыкчам түрдө өчүрүлгөн. Ал эми экинчисинде кайрадан сокку болушу мүмкүн деген коркунучтан улам өрттү өчүрүү иштери дароо башталган эмес, бирок кийинчерээк өрт толугу менен жоюлган. Мындан тышкары, орусиялык аскерлер Миргород районундагы ишканага да сокку урган.
Одесса облустук аскердик администрациясынын башчысы Олег Кипер түн ичинде Орусиянын армиясы кайрадан порт инфраструктурасын бутага алганын билдирди. Анын айтымында, Того мамлекетинин желеги алдында жүргөн жарандык кеме жабыркаган. Төрт адам жаракат алып, алардын үчөө ооруканага жеткирилген. Жабыркагандардын бири оор абалда экени айтылууда.
Орусиянын Коргоо министрлиги болсо Одесса портунда күзөт катери жана күйүүчү май сакталган резервуарлар, Измаил портунда аскердик багыттагы терминал жана кампалар бутага алынганын билдирди.