Орусияда мунайзат жана кокс өндүрүү көлөмү июль айында өткөн жылдын ушул мезгилине салыштырмалуу 19,3 пайызга азайды. Ошол эле учурда быйылкы июнь айына салыштырганда өндүрүш 5,6 пайызга өскөн. Бул тууралуу Ростаттын 26-августта жарыяланган маалыматында айтылат.
Мекеме "Орусиянын социалдык-экономикалык абалы" тууралуу (январь–июль 2026) баяндамасын жарыялады. Андагы маалыматка ылайык, жыл башынан июлга чейинки аралыкта өндүрүш көлөмү 2025-жылдын ушул мезгилине салыштырмалуу 9,2 пайызга кыскарган. Жылдык көрсөткүч боюнча эң чоң төмөндөө июнь айында катталып, ал 21,7 пайызды түзгөн.
Бийликтин чечимине ылайык, Росстат мунайзат өндүрүүнүн абсолюттук көлөмүн жарыялабайт. Анын ордуна "кокс жана мунайзат өндүрүү" тармагы боюнча жалпыланган индекс гана берилет.
Орусияда күйүүчү май өндүрүшүнүн кыскарышы украиналык учкучсуз учактардын мунай иштетүүчү заводдорго чабуулдарынын көбөйүшү менен байланыштуу. Акыркы айларда чабуулдардын саны кыйла өстү. Натыйжада өлкөнүн бир катар аймактарында күйүүчү май тартыштыгы жаралып, Орусия чет өлкөлөрдөн кара май сатып алууга да аргасыз болду.
Reuters агенттиги шаршемби күнү тармактагы үч булакка таянып, Нижегород облусундагы НОРСИ мунай иштетүүчү заводу ишин токтотконун жазды. Бул ишкана мунайды кайра иштетүүнүн көлөмү боюнча өлкөдө төртүнчү, ал эми бензин өндүрүү боюнча экинчи орунда турат. Заводдун ээси -"Лукойл" компаниясы Reuters агенттигинин комментарий берүү өтүнүчүнө жооп берген эмес.
Облустук бийлик 26-августта украиналык дрондун соккусунан улам өнөр жай объектисине зыян келтирилгенин билдирген. Ал кайсы объект экенин тактаган эмес.
Reuters агенттигинин маалыматына таянсак, "Лукойлдун" мунай иштетүүчү бардык заводу токтоп турат. Пермдеги мунай иштетүүчү завод 21-августтагы дрон чабуулунан кийин, Волгограддагы завод 31-июлдан тартып ишин токтоткон.
Ошол эле учурда Орусия чийки мунайды экспорттоону улантууда.
27-августка караган түнү украиналык дрондор Орусиянын Ozon маркетплейсинин Оренбург жана Уфа шаарларындагы кампаларына сокку урду.
Компаниянын маалыматына караганда, жумушчулар эвакуацияланган, жабыркагандар жок.
Оренбургдагы кампа ишин калыбына келтиргенин, Уфадагы азыраак зыян келтирилгендиктен убактылуу жабылганын билдирди.
"Азырынча Уфада сатуучулардан жеткирүүлөрдү кабыл албай жатабыз. Жолдо келаткандарды башка объектилерге которобуз", – деп жазылган компания тараткан маалыматта.
Украиналык Exilenova+ жана Supernova+ мониторинг каналдары Башкырстандын Благовещенск шаарында Ozon'дун кампасы күйүп жатканын кабарлады. Бул маалымат расмий ырастала элек.
Дрон чабуулуна Стерлитамак да кабылды. Телеграмдагы ASTRA каналы түндө жергиликтүү жашоочулар жарылуулардын добушун укканын жазды.
Орусиянын Коргоо министрлиги түндө өлкө аймагынан 267 учкучсуз учак атып түшүрүлгөнүн маалымдады.
27-августка караган түнү Орусия Украинага баллистикалык ракеталар жана жүздөгөн дрондор менен койду. Украинанын Аскер-аба күчтөрүнүн маалыматына караганда, өлкө 258 учкучсуз аппарат, ошондой эле “Искандер-М”/KN-23 жана “Оникс” ракеталары менен аткыланды. Абадан коргонуу күчтөрү жети баллистикалык ракетаны жана 225 дронду атып түшүргөнүн билдиришти.
Краматорск шаарында орус аскерлери турак жай кварталдарына жети авиабомба таштады. Көп кабаттуу 16 үй жана жарандык инфраструктуралык бир катар объектилер жабыркап, өрт чыкты. Эки адам жараат алды.
Харьков шаарында дрон соода борборуна тийип, 40 жаштагы эркек киши каза болду. Баштапкы маалымат боюнча, дагы эки адам жабыркады.
Запорожье облусунун Григоровка айылында дрон чабуулунан 78 жаштагы аял мерт болду. Ал эми Херсон шаарында велосипед менен бара жаткан эркек киши дрон соккусунан каза тапты.
Одесса облусунда жети саатка созулган чабуул маалында 16 кабаттуу турак жай, эки билим берүү мекемеси, жеке үй, ошондой эле инфраструктуралык объектилер жана элеватордун аймагы жабыркады. Киевде гимназиянын имараты жана турак жайлардын жанындагы аймактар зыян тартты. Кривой Рог шаарында өнөр жай ишканасына урулган соккудан эки киши жаракат алды.
Орусия жарандык объектилерди бутага алганын мойнуна албай келет. Өлкөнүн Коргоо министрлиги чабуулдар аскердик-өнөр жай, металлургия, мунай иштетүү жана логистикалык объектилерге багытталганын билдирди.
Ал эми Орусиянын өзүндө жүздөгөн дрон атып түшүрүлгөнү, Щебекинодо бир адам каза болгону кабарланды.
Дрон жеке үйлөрдүн бирине тийип, бир аял жаракат алды. Бир нече ишканага да зыян келтирилди.
Орусиянын Коргоо министрлиги түн ичинде өлкөнүн 13 аймагында, аннексияланган Крымда, Азов жана Кара деңиздердин үстүндө украин тараптан учурулган 267 дрон жок кылынганын билдирди.
Ozon компаниясы Оренбург жана Уфа шаарларындагы логистикалык борборлору дрон чабуулуна кабылганын маалымдады. Компаниянын билдиришинче, кызматкерлер эвакуацияланган, жабыркагандар жок. Оренбургдагы кампа ишин кайра жандандырса, Уфадагы логистикалык комплекс аз өлчөмдө зыян тартып, убактылуу жабык бойдон калууда.
АКШнын Борбордук чалгын башкармалыгынын (ЦРУ, CIA) директору Жон Рэтклиффтин Москвага сапары тууралуу Кремлдин басма сөз катчысы Дмитрий Песков комментарий берди.
Песков The Washington Post басылмасына Рэтклифф "атайын кызматтар ортосунда байланыш түзүү" максатында келгенин айтты. Андан башка маалымат берген жок.
Дмитрий Песков ТАСС агенттигине Рэтклиффтин Орусиянын президенти Владимир Путин менен жолугушуусу пландалбаганын билдирди.
The Washington Post андан мурда эле шейшемби күнү Песков америкалык аскердик учактардын Москванын Внуково аэропортуна конгону тууралуу Кремлде маалымат жок экенин айтканын эске салды.
25-августта CBS жана Axios басылмалары өз булактарына таянып, Рэтклиффтин Москвага алдын ала жарыяланбаган сапары тууралуу жазышкан. Axios басылмасынын журналисти Барак Равид АКШ бийлиги Рэтклиффтин сапары учурунда Орусиянын аймагына соккуларды токтото турууну суранганын жазган.
The Wall Street Journal басылмасынын баамында, Рэтклиффтин сапарына бир нече жагдай себеп болушу ыктымал: Орусияда мүмкүн болгон мобилизация, Украинанын орус аймагына чабуулдарынын күчөшү, Иран менен байланышкан согуштук кырдаал же Москванын НАТОго мүчө мамлекеттерге каршы быктымал чагымчыл аракеттери.
Кремлдин кабарчысы Александр Юнашев Рэтклиффтин сапарына байланыштуу Орусия президентинин иш жадыбалы өзгөртүлгөнүн боолгоду. Ал шейшембиге белгиленген чоң иш-чара АКШнын чалгын башчысынын сапарынын алдында башка күнгө жылганын белгиледи.
Американын Борбордук чалгын башкармалыгынын башчысы Москвага акыркы жолу 2021-жылдын ноябрында барган. Ал кезде мекемени Уильям Бернс жетектеп турган.