Орусиянын аскерлери 28-сентябрга караган түнү Харьковдун Салтов районундагы көп кабаттуу турак жайга сокку урду. Бул тууралуу шаардын мэри Игорь Терехов билдирди.
Харьков облусунун аскердик администрациясынын башчысы Олег Синегубовдун маалыматына караганда, 25 адам жаракат алды. Алардын тогузу балдар. Үч бала ооруканага жаткырылган.
Үйдүн бир подъезди толугу менен кыйрап калган. Куткаруучулар урандыларды тазалап жатышат. Шаардын Киев районунда дагы 10 жеке үй жабыркады.
"Акыркы убактарда мындай күчтүү сокку биринчи жолу болду. Бул КАБ же "Бандероль" ракетасыбы, азыр тактап жатабыз", – деди Терехов.
Киев шаарында төрт адам жабыркады. Мэр Виталий Кличконун айтымында, Подольск районунда үч киши жаракат алып, алардын арасында 17 жаштагы өспүрүм ооруканага жеткирилген.
Оболонь районунда чабуулдан кийин май куюучу жайдын аймагында өрт чыккан. Шевченков районунда дрон кеңсе имаратына тийген. Голосеев районунда учкучсуз учак май куюучу жайдын жанындагы кафеге тийген. Дарница районунда дрондун сыныктарынан ачык аймакта өрт чыккан.
Өзгөчө кырдаалдар кызматынын маалыматы боюнча, Голосеев районундагы эки кабаттуу жеке турак жайга урулган соккудан дагы бир адам жабыркаган.
Одесса облусунун аскердик администрациясынын башчысы Олег Кипер облустун түштүк бөлүгүндө эки киши жабыркаганын билдирди.
Анын айтымында, орусиялык аскерлер турак жай секторуна сокку урган. Натыйжада жети жеке үйдүн фасады, чатырлары жана айнектери талкаланып, жергиликтүү тургундардын автоунаалары жабыркаган. Ошондой эле түн ичинде бош турган кампага чабуул жасалган.
Орусиянын Коргоо министрлиги Киевде "Укртелекомдун" маалыматтарды иштетүү борбору, "ДримЛайн" компаниясынын маалымат борбору жана күйүүчү май инфраструктурасы бутага алынганын билдирди. Ошондой эле Киев облусунда Васильков аэродромунун объектилери, Одессада "Новая почтанын" логистикалык борбору, Черноморск портунда жүк ташуучу кеме, Измаил портунда "Дунайсудосервис" заводунун инфраструктурасы жана Одесса портуна багыт алган кеме бутага алынганы айтылды.
Украинанын Аба күчтөрүнүн маалыматына ылайык, Орусия Украинага каршы 165 сокку уруучу учкучсуз учак учурган. Алардын 112си атып түшүрүлгөн.
Украинанын президенти Владимир Зеленский 27-сентябрда Киевде Орусиянын дрон соккусунан эки бала бакча, эки мектеп, турак үй, унаа оңдоочу жай, бир нече кампа жана байланыш объектилери жабыркаганын билдирди.
Анын маалыматына караганда, Сауд Арабиясынын элчиси резиденция катары пайдаланган үйгө да сокку урулган.
Зеленскийдин айтымында, Орусиянын соккуларынан каза болгондор бар, ондогон киши жараат алды.
Президент Орусия сүйлөшүүлөргө даярданбай жатканын "Шахеддердин" чабуулдары айгинелеп жатканын айтты. АКШда "тозоктой санкциялар" жөнүндөгү мыйзам кабыл алынганын белгилеп, жаңы чектөөлөр даярдалып жатканын кошумчалады.
"Жаңы санкциялык пакеттер даярдалууда. Анын ичинде каржы булактарына, Орусиянын курал-жарагын өндүрүү үчүн керектелген компоненттерди жана жабдууларды жеткирүү схемаларына, ошондой эле айрым ишканаларга жана адамдарга, биринчи кезекте Орусиянын баллистикалык куралдарын өндүрүүгө тартылгандарга каршы чаралар болот", - деп жазды Зеленский.
27-сентябрга караган түнү Орусиянын аскерлери Украинага 170 дрон менен чабуул койгон.
27-сентябрга караган түнү Орусиянын аскерлери Украинанын бир катар аймактарына, анын ичинде башкалаа Киевге жана Киев облусуна, ошондой эле Одесса шаарына жана Одесса облусуна дрондор менен чабуул койду. Каза болгондор бар.
Украинанын Өзгөчө кырдаалдар боюнча мамлекеттик кызматынын маалыматына караганда, Киевдин Соломенский районунда дрондордун чабуулунан бир адам каза болгон. Унаа оңдоочу жайда жана бир имаратта өрт чыккан.
Киевдин мэри Виталий Кличконун билдиришинче, Шевченко районунда орус аскерлеринин соккусунан аял жана эки бала жабыркаган. Украинанын президенти Владимир Зеленский кийинчерээк 27-сентябрга караган түнү орус аскерлери Киевдеги маалыматтарды борборлоруна эки жолу сокку урганын, алардын биринчисинин натыйжасында үч адам, анын ичинде эки бала жаракат алганын билдирди.
Орусиянын Коргоо министрлиги Киевде Vodafone мобилдик операторунун маалымат иштөө борбору жабыркаганын билдирген. Министрликтин билдиришинче, бул борбор Украинанын Куралдуу күчтөрүнө мобилдик байланыш жана жогорку ылдамдыктагы интернет кызматтарын көрсөтүп келген. Акыркы убакта орус аскерлери Киевдеги маалыматтарды иштетүүчү борборлорго бир нече жолу сокку урган.
Киев облусунда Zammler Group компаниясына таандык кампа өрттөнгөнүн Орусиянын Коргоо министрлиги билдирди. Компания бул маалыматты тастыктады. Соккудан жабыркагандар болгон эмес.
Орусиянын дрондору Одесса облусундагы Килия портуна да сокку урган. Райондук администрация билдиргендей, порттук жана жарандык инфраструктура жабыркаган, адамдар жаракат алган эмес. Орусиянын Коргоо министрлиги да сокку болгонун ырастады. Одесса шаарында орус аскерлеринин соккуларынан бир адам каза болуп, үчөө жаракат алган.
Фронт линиясы өткөн Запорожье облусунда орус аскерлеринин аткылоосунан Камышуваха кыштагында жана Новотаврийск айылында үч адам каза болду. Жер үй жана жеңил унаа жабыркаган. Дагы төрт адам жаракат алганын жергиликтүү бийлик билдирди.
Украинанын Куралдуу күчтөрүнүн Аба күчтөрүнүн маалыматына ылайык, жалпысынан түн ичинде Орусия Украина аймагына 170 дрон учурган, алардын 147си атып түшүрүлгөн.
Бул маалыматтарды көз карандысыз булактардан тактоо мүмкүн эмес.
Украинанын президенти Владимир Зеленский АКШ президенти Дональд Трамп Киевге Patriot абадан коргонуу системалары үчүн ракеталарды өндүрүү лицензиясын берүү боюнча акыркы чечимди кабыл алганын билдирди.
Зеленский бул тууралуу 25-сентябрда журналисттер менен болгон онлайн жолугушууда айтып, Нью-Йоркто БУУнун Башкы ассамблеясынын сессиясынын алкагындагы жолугушууда Трамп өзү бул чечимди ырастаганын белгиледи.
«Президент Трамп акыркы жолугушууда мага: “Ооба, мен акыркы чечимди кабыл алдым. Украина Patriot ракеталарын өндүрүү лицензиясын алат”, деп айтты», - деди Зеленский.
Бул маселе быйыл июль айында эле көтөрүлгөн. Анда АКШ Украинага Patriot системалары үчүн ракета чыгарууга лицензия берүү процессин баштаганы кабарланган. Бирок кийинчерээк Трамп Вашингтондун негизги максаты курал жеткирүү эмес, согушту токтотуу экенин айтып, лицензия берүү маселеси кайрадан белгисиз болуп калган.
Сентябрдын башында АКШнын мамлекеттик катчысы Марко Рубио лицензия берүү боюнча сүйлөшүүлөр кайра уланганын ырастаган. Ошол эле учурда ал мындай чечим жактырылса да Украинадагы азыркы ракета тартыштыгын дароо чечпей турганын белгилеген. Рубионун айтымында, мындай татаал куралды өндүрө турган завод куруу жана өндүрүштү жолго коюу бир нече жылга созулушу мүмкүн.
Зеленский буга чейин лицензия алынган күндө дагы Украинада өндүрүштү толук ишке киргизүү үчүн болжол менен бир жарым жыл талап кылынарын айткан.
Украиналык маалымат каражаттары президенттин кеңсесиндеги булактарга таянып Киев Patriot системалары үчүн PAC-2 жана PAC-3 үлгүсүндөгү ракеталарды чыгаруу мүмкүнчүлүгүн талкуулап жатканын жазышкан. PAC-3 Patriot комплексиндеги эң заманбап ракеталардын бири жана Орусия колдонуп жаткан баллистикалык ракеталарды атып түшүрө алган саналуу куралдардын катарына кирет.
Patriot системалары Украина шаарларын жана энергетикалык инфраструктурасын коргоодо негизги ролду ойнойт. Зеленскийдин айтымында, Орусия ар бир ири чабуул маалында 30дан 40ка чейин баллистикалык ракета колдонот. Мындай жапырт соккулар ай сайын үчтөн бешке чейин кайталанып турат.
Украина жетекчилиги бир нече жолу өлкөдө Patriot ракеталары жетишсиз болуп жатканын билдирген. Август айында Зеленский алдыдагы кыш мезгилинде коргонууну камсыздоо үчүн АКШнын Patriot ракеталарынын запасынын кеминде 5 пайызы керек экенин айткан. Анын баамында, Украинага карай учурулган бардык орусиялык баллистикалык ракеталарды атып түшүрүү үчүн америкалык запастын болжол менен 10 пайызы талап кылынат.
Эгер лицензия берүү боюнча келишим толук күчүнө кирсе, Украина биринчи жолу өз аймагында Patriot ракеталарын өндүрүү мүмкүнчүлүгүнө ээ болуп, абадан коргонуусу кыйла кеңейтет. Бул өзгөчө акыркы айларда күчөгөн орусиялык ракета чабуулдарынын шартында Киев үчүн стратегиялык мааниге ээ чечим катары бааланууда.