Украина менен Орусиянын делегацияларынын сүйлөшүүсү украин-беларус чек арасында, Припять дарыясына жакын жерде өтөт. Бул тууралуу 27-февралда Украинанын президенти Владимир Зеленский "Фейсбук", "Телеграм" аркылуу билдирди. Ал мындай мындай чечим Беларусту узак жылдан бери башкарып келе жаткан Александр Лукашенко менен телефон сүйлөшүүсүнөн кийин кабыл алынганын айтты.
"Александр Лукашенко украин делегациясынын сапары, сүйлөшүүлөрү жана артка кайтып келиши маалында Беларустун аймагында жайгашкан бардык учактар, тик учактар жана ракеталардын жерде калышын камсыздоо жоопкерчилигин өзүнө алды", - деп билдирди Зеленский.
Буга чейин Кремль тынчтык сүйлөшүүлөрүн Беларустун баш калаасы Минскиде өткөрүүнү сунуштаган. Бирок Зеленский Беларустун аймагынан Украинага агрессия жасалганын жүйө кылып, сүйлөшүүлөрдү Беларуста эмес, Европанын башка шаарларында өткөрүүнү сунуштаган.
Президент Владимир Путин Орусиянын өзөктүк күчтөрүн өзгөчө режимдеги нөөмөткө өткөрүү буйругун берди. Ал мындай чечимин 27-февралда Орусиянын жогорку расмий жетекчилери менен жолугушуусунда жарыялады.
"Силер көргөндөй, Батыш мамлекеттери биздин өлкөгө каршы экономика тармагында достукка жатпаган аракеттерге гана баруу менен чектелген жок. Мен баары билген мыйзамсыз санкцияларды айтып жатам. Бирок НАТО өлкөлөрүндөгү жогорку кызматтагы адамдар биздин мамлекетке каршы агрессивдүү сөздөргө жол берип жатат. Мындан улам коргоо министрине жана башкы штабдын жетекчисине орус армиясынын ооздуктоочу күчтөрүн аскердик нөөмөт өтөөнүн өзгөчө режимине өткөрүүгө буйрук берем", - деди Путин.
Мындай чечим Орусиянын өзөктүк куралдары да күжүрмөн даярдыкка келтирилет дегенди билдирет. Себеби Орусиянын Коргоо министрлигиндеги түшүндүрмөгө ылайык, стратегиялык ооздуктоочу күчтөр армиянын негизги кубаты деп саналат жана ар кыл курал-жарактарды, анын ичинде ядролук куралды колдонуу менен Орусияга каршы агрессияны токтотууга жана согушта каршылашты талкалоого багытталган. Азырынча "өзгөчө режимдеги нөөмөт" эмнени билдирерин орус бийлиги тактай элек.
АКШнын Бириккен Улуттар Уюмундагы элчиси Линда Томас-Гринфилд орус президентинин бул буйругун "кабыл алынгыс" деп мүнөздөдү.
"Бул президент Путин бул согушту такыр кабыл алынгыс түрдө күчөтүүнү улантып жатканын туюндурат жана биз анын аракеттерин болушунча катаал чаралар менен ооздуктоону улантышыбыз зарыл", - деди Линда Томас-Гринфилд.
Дүйнө: Украинаны колдогон, Орусияны айыптаган акциялар (сүрөт баян)
