4-октябрдын таңында Германиянын канцлери Фридрих Мерц Украинага келди. Акыркы күндөрү Орусиянын дрон чабуулдары күчөгөн Киевге Мерц 2025-жылдан бери биринчи жолу барды.
"Бүгүн Киевге келдим, анткени жакынкы апталарда Украина биздин колдоого муктаж болот. Эгер Орусияны токтотпосок, анын согуш машинасы эртеби-кечпи бизге каршы бурулат", — деди Мерц Киевдеги темир жол бекетине келгенден кийин. Мерц "украиналыктарды террор менен сындырууга болбостугун" кошумчалады.
Немис канцлери Украина президенти Владимир Зеленский менен жолугат. Канцлер Киевде Украинага жаңы жардам пакетин жарыялайт. Анын ичинде 1 миллиард еврого аскердик жардам жана энергетика тармагын калыбына келтирүүгө 350 миллион евро каралган.
Мындан тышкары, дрондордун, дрондорду кармоочу аппараттардын, ошондой эле алыска учуучу куралдардын түрлөрүн биргелешип өндүрүү маселеси талкууланат.
Бул аралыкта Орусия Киевди кайрадан дрондор менен аткылады. 4-октябрга караган түнү шаарда аба чабуулу тууралуу эскертүү алты жолу берилди. Киевдин мэри Виталий Кличконун маалыматына караганда, Днепр районунда дрон сыныктары үйдүн чатырына түшкөн. Жабыркагандар жок.
Жекшембинин таңында Киевдеги Түндүк көпүрөгө дагы дрон менен сокку урулду. Кличко көпүрөдөгү жол кыртышы жабыркаганын билдирди. Кийин интернетте дрон тийген жерде пайда болгон чуңкурдун сүрөттөрү тарады.
Украинанын президенти Владимир Зеленский көпүрөгө реактивдүү дрон тийген учур тартылган видеону жарыялады. Видеодон ошол учурда көпүрөдө унаалар жүрүп баратканы көрүнөт.
Акыркы күндөрү Орусиянын аскерлери Киевдеги маанилүү эки автотранспорттук көпүрөнү - Түндүк жана Түштүк көпүрөлөрдү бутага алды. Жол кыймылынын өзгөрүүсүнөн улам, шаарда ири тыгындар жаралды.
Украинанын Аба күчтөрүнүн маалыматына караганда, 4-октябрга караган түнү Орусия Украинага кеминде 135 дрон учурган. Маалыматка ылайык, алардын көбү атып түшүрүлгөн.
Сумы облусунун аскердик администрациясынын башчысы Олег Григоровдун айтымында, Орусия Сумы шаарына башкарылуучу авиабомбаларды таштаган. Алар турак үйлөрдүн жанына түшүп, жети адам жабыркаган. Экөө оор жаракат алган.
Кийинчерээк Украинанын президенти Сумыдагы медициналык дары-дармектер сакталган кампага жасалган орусиялык чабуулдан бир адам каза болгонун билдирди.
Буга чейин жергиликтүү бийлик Ковпаков районундагы ишканалардын бирине орусиялык дрон тийгенден кийин түтүн чыкканын маалымдаган.
Днепр шаарынын борборунда да орусиялык аскерлер телекоммуникациялык компаниянын имаратына сокку урганы, андан өрт чыкканы кабарланды. Жабыркагандар тууралуу азырынча маалымат жок.
5-октябрга караган түнү орус аскерлери Украинага 205 учкучсуз учак менен сокку урду.
Украинанын Куралдуу күчтөрү алардын 172си атып түшүрүлгөнүн билдирли.
Харьков шаарында жекшемби күнү кечиндеги чабуулдан кийин куткаруучулар орус дрондору тийген турак жайлар жайгашкан жерде иштеп жатышат. Шаардын мэри Игорь Тереховдун маалыматына караганда, соккудан бир адам каза болуп, кеминде сегиз киши жаракат алган.
Украинанын Өзгөчө кырдаалдар боюнча мамлекеттик кызматынын маалыматына ылайык, орус аскерлери шаардын Индустриалдык районуна сокку урган. Натыйжада эки кабаттуу административдик имарат жана автоунаалар өрттөнгөн. Ошондой эле турак жайлар жана административдик-өндүрүштүк имараттар жабыркаган.
Түн ичинде Одесса облусу да чабуулга кабылган. Жергиликтүү бийликтин маалыматына караганда, өнөр жай объектилери, порттук инфраструктура жана дача аймагына сокку урулду.
"Чоң өрт чыкты. Коюу түтүн каптагандыктан, Одессадагы Өзгөчө кырдаалдар кызматынын радиациялык, химиялык жана биологиялык коргонуу боюнча адистери аймакты текшеришти. Өлчөөлөрдүн жыйынтыгында кооптуу заттар аныкталган жок", — деп билдирди облустук администрациянын башчысы Олег Кипер.
Алдын ала маалымат боюнча, жабыркагандар жок.
7-октябрга караган түнү Орусия Украинага 137 учкучсуз учак менен чабуул жасады. Украинанын Куралдуу күчтөрүнүн Аба күчтөрү билдиргендей, алардын 114ү атып түшүрүлгөн же радиоэлектрондук күрөш каражаттары аркылуу зыянсыздандырылган. Ошол эле учурда 17 жерде сокку урулган учурлар катталып, айрым аймактарда дрон сыныктары кулаганы маалымдалды.
Запорожье облусунда Днепр дарыясы аркылуу өткөн көпүрөлөрдүн бирине сокку урулуп, кыймыл убактылуу токтотулду. Облустук аскердик администрациянын башчысы Михаил Семикин беш адам жабыркаганын билдирди. Алардын арасында Кызыл Чырым уюмунун эки кызматкери бар.
Одесса облусунда түнкү чабуулдан кийин жеке ишканалардын биринин имараты жабыркап, өрт чыккан. Өрт өчүрүлгөнү, жабыркагандар жок экени кабарланды.
Киевдин Оболон районунда окуу жайлардын биринин чатырынан өрт чыгып, куткаруучулар аны өчүрүштү. Баштапкы маалымат боюнча жабыркагандар катталган эмес.
Мунун алдында, 6-октябрда күндүз Харьков шаарына жасалган авиациялык соккулардан алты адам каза болуп, 50дөн ашуун киши жаракат алганы маалымдалган.
Ошол эле учурда Орусияда Москва облусу да дрон чабуулга кабылды. Облустун губернатору Андрей Воробьевдин айтымында, абадан коргонуу күчтөрү жана радиоэлектрондук күрөш каражаттары Москванын аймагындагы 16 муниципалитетте жалпысынан 185 учкучсуз аппаратты жок кылган же басаңдаткан.
Солнечногорск шаардык округуна караштуу Радумля конушунда 20 жаштагы жаран каза болгон. Истра районунда 10 жеке үй, чарбалык курулуштар жана эки жеңил унаа жабыркаган. Волоколамск округундагы Покровское айылында да турак жайлар зыян тарткан.
Жергиликтүү бийликтин маалыматына караганда, Москванын чет жакасындагы бир нече калктуу конушта алты адам жаракат алды. Домодедово районуна караштуу Лобаново айылында жеке үй күйүп кетсе, Барыбино конушунда дагы бир турак жай талкаланган.
Украина тарап Москва облусуна жасалган бул масштабдуу чабуул боюнча азырынча расмий комментарий бере элек. Ал эми Москванын мэри Сергей Собянин сутка башталгандан бери борборду көздөй багыт алган 100дөн ашуун дрон атып түшүрүлгөнүн билдирген.
Орусиянын аскерлери 6-октябрга караган түнү Украинага кайрадан учкучсуз учуучу аппараттар менен жапырт чабуул жасады. Украинанын Аскердик-аба күчтөрүнүн маалыматына караганда, жалпысынан 137 дрон учурулган.
Украина тарап билдиргендей, абадан коргонуу күчтөрү алардын 114үн атып түшүргөн же радиоэлектрондук күрөш каражаттары менен зыянсыздандырган. Ошентсе да дрондордун соккулары 17 жерде катталып, дагы төрт аймактан кулаган аппараттардын сыныктары табылган.
Запорожье шаарында таңкы маалда Днепр дарыясынын үстүндөгү көпүрө бутага алынып, анын кесепетинен кыймыл убактылуу токтотулду. Акыркы маалыматтар боюнча, кеминде беш киши жаракат алды. Алардын арасында Кызыл Чырым уюмунда иштеген эки кызматкер да бар.
Днепропетровск облусунда түн ичинде дээрлик 20 дрон чабуулу катталды. Никополь районунда эки адам жаракат алып, турак үй менен автоунаага зыян келтирилгени маалымдалды. Ошондой эле бир катар калктуу конуштар жана жамааттар чабуулга кабылган.
Одесса шаарында инфраструктуралык объекттер бутага алынган. Жергиликтүү бийлик жабыркагандар жок экенин билдиргени менен, жеке ишканалардын биринин имаратына зыян келтирилген.
Киевде да жардыруу угулду. Оболонь районунда дрондун сыныктары окуу жайлардын биринин чатырына түшүп, өрт чыккан. Жабыркагандар тууралуу маалымат түшкөн жок.
Украинанын Аскердик-аба күчтөрү дрондор Орусиянын аймагынан, Донецк облусунун оккупацияланган бөлүктөрүнөн, Крымдан жана Азов деңизинен учурулганын билдирди. Чабуул эртең мененки саат сегизден кийин да уланган.