Украиналык мониторинг жүргүзүүчү Exilenova+ жана Supernova+ Telegram-каналдары Орусиянын Рязан облусундагы "Яндекс ДЦ" борборуна жана Башкырстандагы "Газпром нефтехим Салават" мунай иштетүүчү заводуна чабуул болгонун билдиришти.
Astra басылмасынын маалыматына караганда, өрт "Саста" станок куруучу заводунун аймагында чыккан. Бул аймакта Яндекстин дата-борбору да жайгашкан. Яндекс компаниясы Yandex Cloud платформа аймактарынын биринде электр энергиясы үзгүлтүккө учураганын жана анын кесепеттерин жоюу иштери жүрүп жатканын билдирди.
Кийинчерээк компания Сасоводогу дата-борбордо "инфратүзүмгө таасир эткен окуя" болгонун ырастаган.
"Учурда кырдаал көзөмөлдө. Жабыркагандар жок. Команда окуянын кесепеттерин жоюу жана жабыркаган сервистердин ишин калыбына келтирүү боюнча иштеп жатат", - деп билдирген компания РБК басылмасына.
Чабуулдан кийин Яндекстин айрым сервистеринин иши үзгүлтүккө учураган. "Дождь" телеканалы Рунеттеги айрым башка сайттар, анын ичинде автопостинг үчүн Postmypost платформасы жана "Комсомольская правда" басылмасынын аймактык версиясы да жеткиликсиз болуп калганын байкаган.
Ал эми Башкырстандагы өрттүн видеолорун изилдеген Astra өрт "Газпром нефтехим Салават" мунай иштетүүчү заводунун аймагында чыккан болушу мүмкүн деген жыйынтыкка келген. Бул Орусиядагы ири мунай иштетүүчү жана мунай-химиялык комплекстердин бири. Буга чейин ишкана украиналык чабуулдарга бир нече жолу кабылып, анын айынан ишин убактылуу токтоткон. Ишкана Украина менен чек арадан болжол менен 1400 чакырым алыстыкта жайгашкан.
Exilenova+ жергиликтүү тургундарга шилтеме жасап, Стерлитамак шаарында да жардыруулардын үнү угулганын билдирди.
Орусиянын Коргоо министрлиги өлкөнүн Белгород, Брянск, Волгоград, Воронеж, Курск, Липецк, Орёл, Оренбург, Пенза, Ростов, Рязан, Самара, Саратов, Смоленск, Тамбов, Тула жана Ульянов облустарынын, Москва аймагынын, Башкырстандын, аннексияланган Крымдын, Татарстандын аймагында жана Кара деңиздин үстүндө жалпысынан 399 украиналык дрон атып түшүрүлгөнүн маалымдады.
Орусиянын соңку чабуулдарынан Украинада кечээтен бери кеминде 54 адам каза болуп, 74 адам жараат алды. Курмандыктардын көбү Донецк облусундагы Краматорск шаарында жана Чернигов облусундагы Прилуки шаарында.
Донецк облустук прокуратурасынын маалыматына караганда, Краматорскидеги чабуулдан каза болгондордун саны 30 адамга, жараат алгандар 18 адамга жетти. Мекеменин билдиришинче, орус аскерлери 8-октябрда жергиликтүү убакыт боюнча саат 10:00 чамасында шаарга УМПБ Д-30СН пландоочу бомбасы менен сокку урду.
Чабуул маалында жүргүнчү ташуучу эки автобус соккунун очогунда калган.
Чернигов облусундагы Прилуки шаарында 7-октябрда көп кабаттуу үйгө урулган соккудан кийин издөө-куткаруу иштери түнү бою уланды. Украинанын Өзгөчө кырдаалдар боюнча мамлекеттик кызматынын маалыматына караганда, 8-октябрдын таңына карата 22 адамдын каза болгону аныкталды. Алардын арасында беш бала бар. Дагы 54 адам жараат алган, анын ичинде жети бала бар.
Куткаруучулар урандылардын алдынан 15 адамды, арасында бир баланы аман алып чыгышкан. Учурда кыйраган конструкцияларды тазалоо иштери уланууда.
Киевде да дрон чабуулу катталды. Шаардын Соломенский районунда учкучсуз аппарат төрт кабаттуу дүкөнгө тийип, өрт чыккан. Киев мэри Виталий Кличконун маалыматы боюнча, кеминде эки адам каза болуп, дагы эки киши жараат алды.
Мындан тышкары, дрондор Киев облусуна да чабуул жасап, Буча районундагы логистикалык объектилердин биринде өрт чыккан.
Украинанын делегациясы 9-10-октябрда АКШга барып, президент Дональд Трамптын атайын өкүлдөрү Жаред Кушнер жана Стив Уиткофф менен жолугушуу өткөрөт. Бул тууралуу Украинанын президенти Владимир Зеленский журналисттерге билдирди.
Украина тараптан сүйлөшүүлөргө президенттик кеңсенин жетекчиси Кирилл Буданов, кеңсе жетекчисинин орун басары Сергей Кислица, парламенттеги «Элдин кызматчысы» фракциясынын башчысы Давид Арахамия жана Тышкы чалгын кызматынын төрагасы Рустем Умеров катышат. Зеленскийдин айтымында, сүйлөшүүлөргө Европа өлкөлөрүнүн өкүлдөрү да кошулушу мүмкүн.
Маалыматтарга караганда, жолугушууда согушту токтотууга багытталган жана жаңжалдын бардык негизги маселелерин камтыган жаңы сунуш талкууланат.
Ошол эле учурда Зеленский АКШнын мамлекеттик катчысы Марко Рубионун Украинадагы согуш туңгуюкка кептелди деген билдирүүсүн сынга алды. Украин лидери дипломатиялык туңгуюк жок экенин айтып, Орусияга каршы экономикалык санкцияларды күчөтүүгө чакырды.
Зеленский ошондой эле АКШны Украинага Starlink байланыш системасын Орусиянын аймагында колдонууга уруксат берүүгө үндөдү. Анын айтымында, бул украин күчтөрүнүн абадагы мүмкүнчүлүгүн кеңейтип, Москваны сүйлөшүү үстөлүнө келүүгө мажбурлашы мүмкүн.
9-октябрга караган түнү Орусия Украинага жалпысынан 136 сокку уруучу учкучсуз аппарат менен чабуул койду. Украинанын Куралдуу күчтөрүнүн Аскер-аба күчтөрү билдиргендей, алардын 93ү реактивдүү дрон болгон.
Дрондор Орусиянын аймагындагы эки багыттан, ошондой эле Орусия көзөмөлдөгөн Донецк жана Крымдагы Гвардейское аймагынан учурулган.
Украин аскерлеринин баштапкы маалыматына караганда, саат 08:00гө карата абадан коргонуу күчтөрү 114 дронду атып түшүргөн же радиоэлектрондук каражаттар аркылуу жарактан чыгарган. Алардын арасында Shahed үлгүсүндөгү дрондор, ошондой эле “Гербера” тибиндеги аппараттар жана башка учкучсуз каражаттар болгон.
Анткен менен орус аскерлеринин чабуулунан Украинанын айрым аймактарында жабыркагандар бар экени кабарланууда.
9-октябрга караган түнү орус аскерлери Украинанын Запорожье шаарына башкарылуучу авиациялык бомба менен сокку урду. Бул тууралуу Запорожье облустук аскердик администрациясынын башчысынын милдетин аткаруучу Михаил Семикин билдирди.
Анын маалыматына караганда, бомба көп кабаттуу турак үйдүн жанына түшкөн. Чабуулдун кесепетинен бир эркек киши каза болгон.
Запорожье облустук аскердик администрациясы дагы беш адам жараат алганын тактады.
Куткаруу кызматтары жеринде иштеп жатат. Имараттарга келтирилген зыяндын көлөмү жана жабыркагандардын абалы такталууда.