Өзгөчө кырдаалдар министрлиги бүгүн, 26-февралда түндүк-түштүк альтернативдүү автожолунда (Балыкчы - Казарман - Жалал-Абад) көчкү басып калган Кытайдын бир жаранынын сөөгү табылганын кабарлады.
Бүгүн, 26-февралда 24 жаштагы кыргызстандык Адилет Көккөзовдун сөөгү табылганы айтылган.
"Бүгүн издөө жана унаа жолду тазалоо иш-чараларынын натыйжасында саат 15:30 чамасында бир кытай (аты-жөнү такталууда) жаранынын сөөгү табылган. Учурда эки кытай жаранын издөө жана тазалоо иш-чаралары жүргүзүлүүдө", - деп жазылган ӨКМдин билдирүүсүндө.
14-февраль күнү Түндүк-Түштүк альтернативдүү автоунаа жолунунун 332 жана 338-чакырымдарында (Көк-Арт ашуусу) кар көчкү түшүп, жол куруу ишин жүргүзүп жаткан "Чайна Роуд" ишканасынын төрт кызматкерин автоунаалары менен басып калган. (BCh)