Грузияга караштуу жикчил Түштүк Осетияда президенттик шайлоодо ат салышкан беш талапкердин бири да 50% дык босого ченден өтө алышкан жок.
Аймактын Боршайкомунун башчысы 11-апрелде билдиргендей, бюллетендердин 95% саналып бүткөндөн кийин, добуш бергендердин 33,5% азыркы де-факто президент Анатолий Бибиловду колдогону маалым болду.
Ал эми анын башкы атаандашы, "Ныхас" партиясынын лидери Алан Гаглоев добуштардын 36,9% алды.
Эми расмий жыйынтык чыгарылгандан 15 күндөн кийин шайлоонун экинчи айлампасы өтүшү керек.
АКШ, Евробиримдик жана Грузия 10-апрелде өткөн добуш берүүнү мыйзамсыз деп атап, анын жыйынтыгын тааныбай турганын билдиришкен.
Орусия Грузия менен 2008-жылы болгон согуштан кийин Түштүк Осетия жана Абхазиянын көз карандысыздыгын тааныган. Тблиси эки аймакты тең Грузиянын бөлүгү катары эсептейт. Эки жикчил аймакта тең миңдеген орус аскерлери жайгашкан.
