Линктер

ЧУКУЛ КАБАР!
22-Апрель, 2024-жыл, дүйшөмбү, Бишкек убактысы 00:42

Шакиев парламентте мурдагы президент Бакиев тууралуу суроого жооп берди


Нурланбек Шакиев.
Нурланбек Шакиев.

Жогорку Кеңештин депутаты Дастан Бекешев төрагалык кызматка Нурлан Шакиевдин талапкерлиги каралып жаткан учурда анын мурдагы президент Курманбек Бакиевге көз карашы тууралуу суроо узатты.

"Бакиевдер боюнча сиздин көз карашыңыз кандай? 2019-жылы NewTV телеканалы Бакиевдин 70 жылдык мааракесин куттуктап, жакшы сөздөрдү айткан. Таарыныч болбосун, бирок мен сизден ушуну сурайын деп жаткам" , — деди Бекешев.

Нурлан Шакиев мурдагы президенттерге, анын ичинде Бакиевге карата коомчулук кандай пикирде болсо, анын пикири да ошондой экенин билдирди.

"Мен жеке адам катары, жаран катары айта турган болсом, мурда иштеп кеткен бардык президенттерге, анын ичинде Бакиевдерге карата көз карашым коомдон кескин айырмаланбайт. Коомдогу көз караш кандай болсо, меники да ошондой" , — деди Шакиев.

Бул жооп түшүнүксүз болуп калганын айткан Бекешев "Сиз эл мененсизби" деп кайра сурады. Шакиев "албетте" деп жооп берди.

Жогорку Кеңештеги "Элдик" депутаттар тобу, "Ишеним", "Ата-Журт Кыргызстан" жана "Альянс" фракциялары парламенттин төрагалыгына талапкерлигин көрсөткөн Шакиев 80 депутаттын "макул" деген добушуна ээ болуп, төрага болуп шайланды. Добуш берүү жабык өттү. Шайлоого жалпысынан 87 депутат катышып, үч шайлоо кагазы жараксыз болуп чыкты.

Буга чейинки төрага Талант Мамытов кызматынан өз каалоосу менен кетип жатканын бүгүн, 5-октябрда парламенттин жалпы отурумунда билдирген.

Мындай чечимге парламенттеги акыркы айрым окуялар себеп болгонун учкай кыйытты.

Нурланбек Шакиев 2010-жылдагы Апрель окуясынан кийин бийликтен куулган президент Курманбек Бакиевдин басма сөз катчысы болуп эки жылдай иштеген, ага кеңешчи да болгон.

2010-жылдын декабрында маданият жана маалымат министри болуп дайындалып, бул кызматта бир жыл иштеген. Мындан тышкары бир нече гезит, телеканалдарды жетектеген. Жогорку Кеңештин VII чакырылышына Аксы шайлоо округунан шайланып келген. (КЕ)

Facebook шеринеси

XS
SM
MD
LG