Бүгүн, 22-октябрда Ош облусунун Өзгөн районундагы Кызыл-Октябрь айылдарынын тургундары Кемпир-Абад суу сактагычына байланыштуу жөө жүрүшкө чыгышты. “Азаттыктын” кабарчысы жеринен маалымдагандай, 100дөй киши колдоруна “Кемпир-Абад калсын!”, “Кемпир-Абад берилбесин!” деген жазууларды, Кыргызстандын желегин көтөрүп бара жатышат.
Алар Кемпир-Абад суу сактагычына жакын аймактагы айылдарды кыдырышарын айтышты.
21-октябрда дагы Өзгөндө ушундай жөө жүрүш өткөн болчу. Анда айрым тургундар Бишкекке чейин барарын айтышкан.
Мунун алдында президент Садыр Жапаров “Кабар” маалымат агентигине маек куруп, анда кыргыз-өзбек чек ара маселеси боюнча түшүндүрмө берген. Жапаров Кемпир-Абад суу сактагычынын айланасындагы маселелерге кеңири токтолуп, чагымчылдар элге туура эмес маалымат берип жатат деп айткан.
Президент Садыр Жапаров келишимдер Жогорку Кеңеште ачык караларын айтып, элдин 99% келишимди колдоруна ишенерин билдирди. Жөө жүрүш, митингдерди кимдер атайын уюштуруп жатканын билерин белгилеген. Бирок алардын атын атаган эмес.
10-октябрда Жогорку Кеңештин Эл аралык иштер, коргоо, коопсуздук жана миграция боюнча комитети кыргыз-өзбек чек арасы, анын ичинде Кемпир-Абад суу сактагычы боюнча эки тараптуу келишимдин долбоорун карап, көпчүлүк добуш менен жактырган.
15-октябрда Өзгөндө Кемпир-Абад суу сактагычына байланыштуу элдик курултай өтүп, суу сактагыч өзбек тарапка өтүп кетиши ыктымал деген кооптонуу айтылган. Оппозиция кыргыз-өзбек чек ара келишиминдин Кемпир-Абад суу сактагычы боюнча позициясын кескин сындап жатат. 21-октябрда Ош облусунун Өзгөн районунда Кемпир-Абад суу сактагычына байланыштуу жөө жүрүш өткөн. (TSh/AАb)
Facebook шеринеси