Линктер

ЧУКУЛ КАБАР!
23-Апрель, 2024-жыл, шейшемби, Бишкек убактысы 03:41

Айданбек Акматов менен Али Шабдан 20-декабрга чейин камалды


Айданбек Акматов.
Айданбек Акматов.

Журналист жана саясат талдоочу Айданбек Акматов менен жарандык активист Али Шабдан 20-декабрга чейин камалды. 24-октябрда Бишкектин Биринчи май райондук соту чыгарды. Ушул эле күнү "Бүткүл жаштар" партиясынын лидери Чыңгыз Капаровго ушундай чечим чыккан.

Айданбек Акматов 1997-2017-жылдары "Азаттык" радиосунун кабарчысы жана саясий баяндамачысы болуп иштеген. 2021-жылы парламенттик шайлоодо бир мандаттуу №3 Кадамжай округунан талапкер болгон. Ал Кемпир-Абадды Өзбекстанга өткөрүүгө жол бербөөгө чакырган саясатчыларда жана активисттерде бийликти басып алуу ниети болбогонун мурдараак "Азаттыкка" билдирген.

Али Шабдан коомдук-саясий окуяларга көз карашын эркин билдирип келаткан жарандык активист. Ал кармалышын мыйзамсыз жана түшүнүксүз экенин айтууда.

23-октябрда Бишкекте жыйырмадан ашуун оппозициялык саясатчы менен активисттердин үй-жайында тинтүү жүргүзүлүп, милицияга чакырылган жана 48 саатка камакка алынган. Алардын ишине байкоо салып жатканын акыйкатчы Атыр Абдрахматова билдирген. Кармалгандар акыркы күндөрү "Кемпир-Абад суу сактагычынын жерин Өзбекстанга берилишине каршы" болуп келатышкан.

Ички иштер министрлиги (ИИМ) аларга Кылмыш жаза кодексинин 36-278-беренеси (“Массалык башаламандыктарды уюштурууга даярдануу”) менен козголгон кылмыш иштин алкагында тергөө жүргүзүлүп жатканын маалымдаган.

24-октябрда Бишкекте жүздөгөн жарандар жүрүшкө чыгып, камалгандарды бошотуу талабы менен президент Садыр Жапаровго кайрылуу жолдошту. Ошто да ондон ашуун активисттин катышуусунда ушундай талап менен митинг өттү. Жалал-Абад жана Өзгөн шаарларында бийликтин саясатын колдогон акция уюштурулду.

Садыр Жапаров ушул күнү улуттук "Кабар" агенттигине курган маегинде камалгандардын ишине кийлигише албай турганын, чекитти сот кое турганын айтты.

Бийлик кыргыз-өзбек чек арасына байланыштуу чагымчылдар элге туура эмес маалымат берип жатканын билдирип келет. (SE)

Facebook шеринеси

XS
SM
MD
LG