Линктер

ЧУКУЛ КАБАР!
23-Февраль, 2024-жыл, жума, Бишкек убактысы 23:29

ИИМ соцтармактарда чагымчыл маалымат таратууга тыюу салынганын эскертти


Иллюстрациялык сүрөт.
Иллюстрациялык сүрөт.

Ички иштер министрлиги (ИИМ) социалдык тармактарда чагымчыл маалыматтарды жарыялоого тыюу салынганын эскертүүдө.

ИИМдин басма сөз кызматы бүгүн, 16-ноябрда тараткан маалыматта өлкөнү туруксуздаштыруу максатында чагымчыл жана башка материалдарды тараткандар мыйзам боюнча кылмыш жоопкерчилигине тартылары да айтылган.

"Социалдык тармактарда расалык, этностук¸ улуттук, диний аймактар аралык кастыкты (араздашууга) козутууга үндөгөн чагымчыл материалдарды бөлүшпөөгө чакырат. Ички иштер министрлиги жана анын бөлүктөрү мындай чагымчыл материалдарды тараткандарды аныктоо чараларын көрүп жатат. Акыркы күндөрү социалдык тармактарда улуттар аралык кастыкты козутууга түрткөн билдирмелер активдүү жарыяланууда. Учурда өлкөдө коомдук-саясий абал туруктуу. Күч түзүмдөрү коомдук тартипти жана жарандардын коопсуздугун камсыз кылуу, кылмыштуулук менен күрөшүү боюнча иштерди жогорку деңгээлде жүргүзүп жатат", - деп жазылган маалыматта.

Министрлик аймактар жана улуттар аралык кастыкты козутуу аракети Кылмыш-жаза кодексинин 330-беренеси ("Расалык, этностук, улуттук, диний же региондор аралык кастыкты (араздашууну) козутуу") менен кылмыш жоопкерчилигине тартыларын эскертип, мындай жагдайлар аныкталса, мыйзам чегинде чаралар көрүлөрүн билдирди.

Октябрдын аягында Кемпир-Абад суу сактагычынын жерин Өзбекстанга берүүгө каршы пикирин ачык билдирген, соцтармактарга жазып жүргөн саясатчы, активист жана блогерлер (жалпы 26 адам) жапырт кармалган. Алардын экөө үй камагына, калгандары эки айга №1 тергөө абактарына камалышкан. Дээрлик баарына "Массалык башаламандык уюштуруу" беренеси менен кылмыш иши козголгон.

15-ноябрда Жогорку Кеңештин Эл аралык иштер, коргоо, коопсуздук жана миграция боюнча комитети Өзбекстан менен Кыргызстандын чек арасын тактоо жана Кемпир-Абад суу сактагычынын суусун биргелешип башкаруу тууралуу кыргыз-өзбек өкмөттөр аралык макулдашуусу жөнүндө мыйзам долбоорун карап жаткан учурда бир катар активисттер парламенттин алдында нааразылык акциясына чыгышкан.

Эки адамды: укук коргоочу Азиза Абдирасулова менен Сапар Аргымбаевди милиция кармап кетип, бир нече сааттан кийин кое берген.

Соцтармактын айрым колдонуучулары Фейсбуктагы баракчасына жазган посттору үчүн милицияга түшүндүрмө берип чыкканын жазышууда.(ZKo)

Facebook шеринеси

XS
SM
MD
LG