Энергетика министрлиги электр жарыгын өчүрүүнүн графигин жарыялады. Ага ылайык, жарык ар кайсы аймактарда эки сааттан өчүрүлүп турат.
Кыргызстандыктар ар кайсы аймактарда жарык маал-маалы менен өчүп жатканын социалдык тармактарда жазууда. Айрымдары өзгөчө ири шаарлар Бишкек, Ошто электр энергиясынын ар кайсы убакта өчүрүлгөнү жүдөтүп жатканын белгилешкен.
Жогорку Кеңештин депутаты Дастан Бекешев парламенттин 18-январдагы жыйынында элге ыңгайлуу болуш үчүн жарыкты өчүрүүнүн графигин берүүнү сураган.
Кыргызстанда өткөн аптада быйылкы кыш башталгандан бери эң суук күндөр болду. 11-январда аба ырайы кескин өзгөрүп, бир нече күн бою өрөөндөрдө абанын күндүзгү температурасы -20 градустун тегерегинде, тоолордо -30га чейин жетти.
Энергетика министрлиги Кыргызстанда электр энергиясын керектөө өлкө тарыхында биринчи жолу суткасына 76,4 миллион киловатт саатка жеткенин маалымдаган.
Министр Таалайбек Ибраев 19-январда Жогорку Кеңештин жыйынында аба ырайы жылыганга чейин жарык өчүрүлөрүн депутаттардын суроолоруна жооп берип жатып билдирди. (КЕ)
Facebook шеринеси