Кыргызстан электр тармагына сырттан кезектеги насыя алганы жатат. Дүйнөлүк банк менен кыргыз өкмөтү ортосундагы “Электр энергетика секторун модернизациялоо жана туруктуу өнүктүрүү” долбоорун каржылоо жөнүндөгү келишимди ратификациялоо маселеси бүгүн 1-февралда Жогорку Кеңеште каралып жатат.
Бул келишимге ылайык, энергетика министри Таалайбек Ибраевдин айтымында, Кыргызстан 50 миллион доллар алат:
“Мунун 25 миллиону грант, 25 миллиону насыя. Буга “акылдуу эсептегичтен” 600дү сатып алууга пландаштырдык, мындан тышкары айылдарда көчөгө коюла труган трансформаторлордон 1 миң даана жана эки электр устунунун ортосундагы төрт зымды алмаштыруучу 350 километр өз алдынча изоляциялануучу зым сатылып алынат”.
Келишимге эки тарап 2022-жылдын 5-октябрында Бишкек шаарында кол койгон.
Бүгүнкү жыйында белгилүү болгондой, Кыргызстан эгемендик жылдары электр тармагын реформалоо үчүн сырттан жалпысынан 137 миллиард 87 миллион сомдук (болжол менен 2 миллиард долларга жакын) насыя алган.
2022-жылдын соңуна карай Кыргызстанда мамлекеттик карыздын көлөмү 5 миллиард 218 миллион долларды түзгөн. Бул сумманын 4 миллиард 191 миллиону тышкы карыз. Анын басымдуу бөлүгү же 1 миллиард 757 миллион доллары Кытайдын Экспорттук-импорттук банкына (Эксимбанк) туура келет.
Энергетика тармагына Кытайдан алынган ири насыяны (Бишкек ЖЭБин реконструкциялоого) өздөштүрүүдө жемкорлукка жол берилгени 2018-жылы аныкталып, бир катар жетекчилерге сот өкүмү чыккан. (RK)
Facebook шеринеси