Өзгөчө кырдаалдар министрлиги (ӨКМ) 23-24-май күндөрү жаап өткөн жана күтүлүп жаткан жаан-чачынга байланыштуу Кыргызстандын тоолуу райондорунда, ашууларда кар көчкү түшүүсү ыктымал экенин эскертүүдө. Маалыматка караганда, Каракол-Эңилчек жолунун 74-86 чакырымдарында Чоң-Ашуу ашуусу, Барскоон - Ак-Шыйрак унаа жолунун 52-68 чакырымдарында, Сөөк ашуусунда кар көчкү түшүүcү жана кар күрткүсү күтүлөт, жолдор тайгак болуп муз тоңот.
ӨКМ узак жолго чыккан айдоочуларды транспорттун ортосундагы 500 метр аралыкты сактоого чакырды.
Соңку күндөрдөгү жаан-чаачындан улам айрым аймактарда сел жүрүп, үйлөрдү каптап жатат.
Аксы районунда 20-майда катуу жааган жаандан кийинки селден жана шамалдан беш айыл зыян тартты. Жайыттагы малды сел агызып кеткен. Жалпы 430 үйдүн электр жарыгы өчүп, жекшембиде калыбына келтирилди.
Мунун алдында Жалал-Абад облусунун Базар-Коргон районунда катуу жаан жаап, Карача айылында сел жүргөн. Суу арыктан ашып, үйдүн короосун каптаган. (КЕ)
