Улуттук коопсуздук мамлекеттик комитетинин басма сөз кызматы 5-июлда курал-жарактарды ок-дарысы менен кошо сатууга аракет кылган милициянын майору М.Р.Н. кармалганын билдирди.
Атайын кызматтын маалыматына ылайык, кармалган милиция кызматкери ИИМде иштей баштаган жылдан тарта алынган тапанчаларды, мылтыктарды жана ок-дарыларды мыйзамсыз сатып келгени аныкталган.
Анын үйүн тинтүү учурунда ар кандай калибрдеги төрт мылтык, тогуз даана граната, 200 даана 9мм калибрлүү ок-дары, 97 даана 5,45 калибрлүү АК-74 огу, снайпердин 141 даана жана 72 даана помпо огу табылган.
Ал Кылмыш-жаза кодексинин 337-беренесинин 3-бөлүгү (“Кызмат абалын кыянаттык менен пайдалануу”) жана 267-беренесинин 4-бөлүгүнүн 2-пункту (“Куралды мыйзамсыз жүгүртүү”) боюнча козголгон кылмыш ишинин алкагында кармалып, УКМКнын тергөө абагына киргизилди.
Атайын кызмат анын аты-жөнүн толук жарыялаган жок. ИИМ жана кармалган кызматкердин жакындары, адвокаттары комментарий бере элек.
