Тайланддын Бангкок шаарында өтүп жаткан футзал боюнча 2024-жылдагы Азия Кубогунда Кыргызстандын улуттук курама командасы Түштүк Кореянын спортчулары менен тең чыкты. 22-апрелде болгон оюн 5:5 эсебинде жыйынтыкталды.
Ошентип, Кыргызстан С тайпасында 5 упай топтоп, экинчи орун менен чейрек финалга чыкты. Эми 24-апрелде Иран курамасы менен ойнойт.
Кыргызстан С тайпасына Жапония, Тажикстан жана Түштүк Корея менен бөлүнгөн.
Кыргызстандык футзалчылар 18-апрелде Азиянын учурдагы чемпиону Жапонияны 3:2 эсебинде утуп алган. 20-апрелде Тажикстандын спортчулары менен 2:2 эсебинде тең чыккан.
Футзалдан Азия Кубогу 1999-жылдан бери өткөрүлүп келет. 2010-жылга чейин жыл сайын болсо, 2010-жылдан тартып, эки жылда бир жолу Кубоктун ээси аныкталат. Быйылкы мелдеш Бангкок шаарында 18-апрелден 28-апрелге чейин болот. Ага 16 команда катышууда. Тайпалык оюндардан кийин плей-оффко 8 команда чыкты. (BTo)
