Жогорку Кеңештин 18-июндагы жыйынында депутат Элвира Сурабалдиеванын “75чилердин каты” боюнча сотко күбө катары катышканы боюнча маселе көтөрүлдү.
Алгач депутат Дастан Жумабеков бул процессте депутатка карата кысым байкалганын белгилеп, аны мамлекеттик күзөт кайтарууга алышы керектигин сунуштады.
Төрага Марлен Маматалиев бул жагдай боюнча түшүндүрмө берип, “75чилердин каты” парламентке кантип түшкөнүн айтып берди. Бул окуя боюнча төрага юристтерден жана депутаттардын катышуусунда жумушчу топ түзүп, териштирүү жүргөнүн маалымдады. Төраганын айтымында, териштирүүнүн жыйынтыгы тергөөгө берилип, ал материалдар учурда сотто каралып жатат.
“Кат келип-келе электе аны күтүп алган. Себеби, ал жердеги кызматкерге тапшырма берилген. Аны каттоого албай, кармап тур деп айтат. Дареги туура эмес жазылганы үчүн аны кайтарып, оңдоп кайра алып келишкенде тапшырма берилгендей эле аны каттоого албай кармап турат. Эки сааттан кийин кайра тапшырма келет “болду, айтылды, төраганын атына каттатасың” дейт. Ошол жерде тиешелүү бөлүм башчылар жана кызматкерлер төраганын атына каттайт. […] Кийин ал кат мурдагы төрага Тургунбек уулунун кабылдамасына барып, анын жардамчысынын колуна тиет. Ал баарын Шакиев менен макулдашып, кийин жоопкерчиликтен качам дегенби, мен көрбөй калдым деп ойлойт дегенби, айтор, “менин орун басарыма алып бар, ал комитетке түшүрсүн” деген тапшырма берет”, - деди Маматалиев.
Кийин ал орун басары жагдайды тактап убакыт созулуп кеткенин, ошентип “сценарий бузулганын” кошумчалады.
Маматалиев каттын парламентке келиши боюнча сотто көрсөтмө берген кызматкерлер кыйыр күбөлөр экенин, түз күбө болгондор процесс жабык болгон учурда маалымат бергенин билдирди.
Төрага “75тин каты” боюнча уюштуруучулардын ойлогону ишке ашса, мамлекетти жоготуп алуу коркунучу жаралмак” деген пикирин кошту.
Жогорку Кеңеште Камчыбек Ташиев жетектеп турган учурдагы Улуттук коопсуздук мамлекеттик комитетинин ишмердигин текшерүү үчүн депутаттык комиссия түзүү сунушталды.
Мындай демилгени депутат Нурбек Сыдыгалиев 18-июнда айтып чыкты. Ал депутаттык комиссия УКМКнын ишмердигин карап, саясий баа бериши керектигин кошумчалады:
“Көп иштер бар. Жогорку Кеңештин жетинчи чакырылышындагы жыйынга курал-жарак алып келген окуя болгон. Аны ким алып келген. Ушул сыяктуу көп иш бар. Ошол нерселерди карап, саясий баа берилиши керек”, - деди Сыдыгалиев.
Бул демилгени депутат Дастан Бекешов да колдорун билдирип, коррупцияга каршы күрөштүн алкагында УКМКнын ишкерлерден алган мүлктөрүнүн мыйзамдуулугун да карап чыгуу керектигин билдирди. Ал бул жаатта абдан көп арызданган адамдар, УКМК аркылуу өткөн мүлктөрдүн кимдердин колуна өткөнүн карап чыгуу зарыл экенин кошумчалды.
18-июнда Бишкектин Биринчи май райондук сотундагы процесске “75чилердин каты” деп айтылган иш боюнча процесске айыпталуучулардын бири Эмилбек Узакбаев келген жок. Судья анын ден соолугу боюнча тергөө абагынын дарыгеринин аныктамасын окуп, кан басымы жогору жана деми кысылып, алсырап жатканын белгиледи.
Узакбаевдин адвокаты Акынбек Ногоев да анын ооруп жатканын ырастады.
“Бул жерде эч кандай оюн жок. Анын ооруп жатканы чын, кечээ өзүм барып көрүп кеткем. Ошондуктан сот отурумун башка күнгө жылдырып берүүңүздөрдү суранам”, - деди Ногоев.
Судья айыпталуучунун сот процессине катышуусу милдеттүү экенин белгилеп, сот отурумун 22-июнга жылдырды.
Жогорку Кеңештин мурдагы төрагасы Нурланбек Тургунбек уулу сотко катышуу үчүн келди. Ал “75чилердин каты” тергөөнүн видеосун көрбөгөнүн айтты.
"Мен көргөн жокмун. Эгер көрсөм айтмакмын. Мен азыр социалдык тармактарга кирбейм", - деп айтты ал.
Шерине