Ѳзгөчө кырдаалдар министрлиги (ѲКМ) президент Садыр Жапаровдун тапшырмасы менен Иранга 66 тонна азык-түлүк, 63 тонна дары-дармек гуманитардык жардам жөнөтүлгөнүн билдирди.
Ун, эт консервалары, өсүмдүк майы жана дары-дармек бар жалпы салмагы 129 тонна гуманитардык жардам оор жүк ташуучу жети автоунаага жүктөлгөн. Жүк Кыргызстандын Ирандагы элчиси Акылбек Кылычевдин катышуусунда тапшырылат.
Буга чейин расмий Бишкек Жакынкы Чыгышта чыңалуунун күчөшүнө байланыштуу тынчсыздануусун билдирип, ок атышууну токтотуп, жаңжалды эл аралык укуктун талаптарына жана Бириккен Улуттар Уюмунун (БУУ) уставына ылайык тынчтык жолу менен жөнгө салууга чакырган.
АКШ менен Израилдин Иранга каршы биргелешкен согуштук операциясы 28-февралда башталган. Иран ага жооп катары Израилди эле эмес, чөлкөмдөгү бир катар өлкөлөрдүн аймагына абадан сокку уруп жатат. (BTo)
Шерине