Орусиянын Белгород облусунда 9-августка караган түнү украиналык дрондордун чабуулунан үч киши каза тапканын аймактын губернаторунун милдетин аткаруучу Александр Шуваев билдирди. Анын маалыматына караганда, 25 киши жабыркады, бири төрт жаштагы бала. Төрттөн ашык көп кабаттуу үй, административдик имарат, социалдык жана коммерциялык объектилер, жер там жана автоунааларга зыян келтирилди.Кийинчерээк ыкчам штаб беш киши өлгөнүн тактады.
Astra басылмасы болсо ФСБнын облустук башкармалыгына жакын жердеги үч көп кабаттуу үйгө зыян келтирилгенин жазды.
Белгород ЖЭБинен 600 метр аралыкта жайгашкан дагы бир үй зыян тарткан. Шаардык "Автоград" соода борбору жарым-жартылай бузулган.
Новороссийскиде дрондун калдыктары Верхнебаканск кыштагындагы эки ишкана менен жер тамга тийген. Чарбалык курулуш өрттөнгөн. Өрт өчүрүлгөн, жабыр тарткандар жок.
Дрондордун чабуулу тууралуу Башкырстандын бийлиги да билдирди. Башкыр республикалык Өзгөчө кырдаалдар боюнча мамлекеттик комитеттин маалыматына ылайык, дрондор Уфадагы ишканаларды бутага алган (кайсы ишканалар экени такталган жок). Учкучсуз учуучу аппараттардын бири шаардын Дёмский районунда курулуп жаткан үйгө тийген. Кранга урунуп, андан соң курулуштун чатырына кулап түшкөн, натыйжада өрт чыккан. Бийликтин маалыматы боюнча, каза болгондор жана жабыркагандар жок.
Уфадагы мунайды кайра иштетүүчү ишканалар комплекси акыркы аптада бир нече ирет соккуга кабылган. 1-2-августта учкучсуз учактар "Башнефть-УНПЗ" жана "Башнефть-Уфанефтехим" мунай заводдору чабуулга кабылган. 5-августта дрондор "Башнефть-Новойлду" бутага алган. Бул үч завод тең Уфадагы мунайды кайра иштетүүчү ишканалар комплексине кирет. Анын кубаттуулугу жылына 23,5 миллион тонна чийки мунайды иштетүүгө жөндөмдүү.
Орусиянын Коргоо министрлиги түн ичинде абадан коргонуу системалары 19 аймакта, анын ичинде аннексияланган Крымда, Азов жана Кара деңиз акваторияларында 160тан ашуун дронду кармап же жок кылганын жарыялады.
Шерине