Линктер

ЧУКУЛ КАБАР!
31-октябрь, 2020 ишемби, Бишкек убактысы 02:27

СОVID-19: Вирус жугузуп алгандар Бишкекте көп


Кыргызстандагы убактылуу ооруканалардын бири. Июль, 2020-жыл.

Корутунду

«Азаттык» радиосу коронавирус пандемиясына байланыштуу Кыргызстандагы жана дүйнөдөгү маалыматтарды тынымсыз жарыялап, андан коргонуу жолдору тууралуу да материалдарды даярдап келе жатат.

30-октябрь, жума, саат 11:00гө карата маалымат:

Бир сутка ичинде COVID-19 UO7.1 жана пневмония UO7.2 дагы 3 кишинин өмүрүн алды. Каза болгондордун экөө Баткен облусунун, бирөө Жалал-Абад облусунун тургуну. Вирус 596 кишиден лабораториялык жол менен расмий аныкталды.

Саламаттык сактоо министрлигинин жаңы эсеби боюнча коронавирус пандемиясы башталган март айынан бери илдеттин курмандыктары 1142ге жетти.

Ушуну менен пандемия башталгандан бери инфекцияны жугузуп алгандардын жалпы саны 58 394. Ооруканадан айыгып чыккандардын саны - 49 522. Учурда 3 359 бейтап стационарларда, 3 814 киши үй шартында дарыланууда.

30-октябрда дагы 7 медициналык кызматкерге коронавирус жуккан учур катталды. Ошону менен пандемия башталгандан бери илдетти жугузуп алгандардын жалпы саны 3 612ге жетти, алардын ичинен 3 316 медкызматкер айыгып чыкты. Каза болгон медкызматкерлердин саны 80ден ашты.

Бул сандар улам жаңыланып турат. Дүйнөдөгү кырдаалды бул шилтемеден билсеңиз болот.

11:24

COVID-19га байланыштуу кырдаал Орусияда да оор болуп турат. Бул жолу Алтай, Омск, Кемеров аймактарында илдетке кабылгандар көп болуп, ооруканаларда орун жетпей, ал эми өлүкканаларда сөөктөр батпай калганы тууралуу кабарлар тарап жатат.

Өткөн аптада маалымат каражаттарында Новокузнецк шаарындагы моргдо тартылган деген видео таркаган. Анда ондогон сөөктөр жерде жатканын көрүүгө болот. Ушундай эле видео «Вконтакте» сайтындагы «Кострома» деген баракчага да жайгаштырылды. Анда да чакан бөлмөдө эч кандай эрежелер сакталбастан кара мүшөктөргө салынган адам сөөктөрүн көрүүгө болот.

28-октябрга карата Орусияда бир жарым миллиондой адамдан коронавирус табылган, 27 миң киши бул илдеттен көз жумду. Кырдаал оор болгонун Кремль да мойнуна алды.

Орус президентинин басма сөз катчысы Дмитрий Песков: «Маселе чындыгында олуттуу. Эпидемиологиялык соккуга өзгөчө аймактар туш болууда», - деп айтты.

Кошмо Штаттар дагы эле коронавирус катуу жайылган мамлекеттердин сап башында турат. Жон Хопкинс университетинин маалыматына ылайык, октябрь айында эле Америкада миңдей киши көз жуумп, 73 миң адам коронавируска чалдыккан. Экинчи орунда Индия турат. Бул мамлекетте жалпысынан сегиз миллиондой адамдан вирус табылган.

Латын Америкасында да COVID-19 менен ооругандар азая элек. Мексикада пандемия башталгандан бери бул илдеттен каза болгондор 90 миң кишиге чукулдады. Аргентинада бул көрсөткүч 30 миңдин тегерегинде. Дүйнөдө коронавируска чалдыккандардын жалпы саны 44 миллиондон ашты, ал эми бул илдеттен 1,1 миллиондон көп адам көз жумду.

11:22

Кыргызстанда коронавирус жуктуруп алып, ооруканага түшкөндөрдүн арасында 90 киши өтө оор абалда жатат. Дагы 877 бейтап оор, 2314ү орточо, калгандары канааттандырарлык абалда деп бааланууда. COVID-19 илдетине каршы республикалык штаб 30-октябрда ушундай маалымат таратты.

Пандемия башталгандан бери инфекцияны жугузуп алгандардын расмий катталган жалпы саны 58394 адамга жетти. Ооруканадан айыгып чыккандар - 49 522 киши. Каза болгондор 1142ге жетти. 18-августка чейин вирустан жалпысынан 1498 кишинин өмүрү кыйылганы расмий айтылган. Бийлик каза болгондордун статистикасы кайра каралып чыкканын, 437 кишинин өлүмүнө башка оорулар себеп болгонун, сегиз учур эки жолу катталып калганын жарыялаган болчу.

Учурда 3359 бейтап стационарда, башкалары үй шартында дарыланууда.

30-октябрга карата бир сутка ичинде коронавирус жана пневмония үч кишинин өмүрүн алып, 596 адам ооруну жуктуруп алганы аныкталды.

Ооруну жаңы жугузуп алгандардын аймактардагы эсеби:

Бишкек шаары - 136;

Баткен облусу - 112;

Жалал-Абад облусу - 91;

Чүй облусу - 89;

Ош облусу – 64;

Талас облусу – 39;

Ысык-Көл облусу – 35;

Ош шаары – 23;

Нарын облусу – 7.

Кытайдын Ухань калаасынан тараган коронавирус 188 мамлекетке жайылып, 45 миллиондон ашуун адамга жукту. Кыргызстанда ооруга чалдыккандар алгач 18-мартта аныкталган.

16:29 29.10.2020

Францияда 29-октябрдан тарта экинчи жолу толук карантин киргизилди. Барлар, ресторандар жана бир катар ишканалар коронавирус күч алганына байланыштуу жабылды.

Франциянын президенти Эммануэл Макрондун айтымында, күнүнө он миңдеген адамдан вирус табылып жатканына байланыштуу саламаттык сактоо системасына күч келүүдө. Жазындагыдай эле бул жолу өлкө тургундарына жүйөлүү себепсиз үйдөн чыгууга болбойт. Болгону азык-түлүк алганы чыкканга, ооруканаларга барууга жана бир саат спорт көнүгүүлөрүн сыртта жасоого уруксат берилет. Анткен менен жазындагыга салыштырмалуу айрым жеңилдиктер бар.

Француз президентинин бул билдирүүсүнөн бир нече саат мурда Германиянын канцлери Ангела Меркел өлкөсүндө төрт жумалык карантин киргизилерин жарыялаган болчу. Жаңы чектөөлөргө ылайык Германия жарым-жартылай жабылат. Ал эми 2-ноябрдан тарта бардык тамактануучу, көңүл ачуучу жана спорт жайлары да ишин токтотот. Дүкөндөрдө гигиена эрежелери катаалдашат.

Кошмо Штаттары коронавирус катуу жайылган мамлекеттердин сап башында кала берүүдө. Жон Хопкинс университетинин маалыматына ылайык, октябрь айында эле Америкада миңдей киши көз жумуп, 73 миң адам коронавируска чалдыккан. Экинчи орунда Индия турат. Бул мамлекетте сегиз миллиондой адамдан вирус аныкталган.

Дүйнөдө коронавируска чалдыккандардын саны 44 миллиондон ашты, ал эми бул илдеттен 1.1 миллиондон көп адам көз жумду.

11:19 29.10.2020

Коронавируска каршы республикалык ыкчам штабдын бүгүнкү, 29-октябрдагы маалыматына караганда, кечээтен бери бул илдеттен бир адам каза болду. Көз жумган бейтап Баткен облусунун тургуну болчу.

Жалпысынан көз жумгандардын саны 1 139 адамга жетти. 18-августка чейин вирустан жалпысынан 1498 кишинин өмүрү кыйылганы расмий айтылган. Бийлик каза болгондордун статистикасы кайра каралып чыкканын, 437 кишинин өлүмүнө башка оорулар себеп болгонун, сегиз учур эки жолу катталып калганын жарыялаган.

Соңку бир күн ичинде вирус дагы 522 адамдан табылды. Алардын эң көбү Бишкек шаарында жана Баткен, Жалал-Абад, Ош, Чүй облустарында.

Оору жуккандардын жалпы саны, ошентип, 57 798 кишиге жетти.

Бир күндө 460 адам айыгып чыкты. Азыр ооруканада 3 444 адам жатат, дагы 3 580 бейтап үйдөн дарыланууда.

Коронавирус жуккан медицина кызматкерлеринин жалпы саны 3 605ке жетти, алардын 3 309у айыгып чыкты. Соңку күндө бул оору үч дарыгерден табылды.

Кыргызстанда март айынын этегинде башталган эпидемия июль айында курчуп, көп киши каза болгон. Сентябрдын башында каза болгондор катталбай калган. Оорунун экинчи толкуну октябрда башталды.

Дагы жүктөңүз

Пикирлерди көрүңүз (353)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.

XS
SM
MD
LG