9-май күнү Ат-Башы районунун Ача-Кайыңды айылынын тургундары бийликке нааразы болуп айыл өкмөттүн алдында жыйын өткөрүштү.
Чогулгандар район аймагында киргизилген өзгөчө абал режимин алууну талап кылышты. Ошондой эле чогулгандар коронавируска жапырт анализ тапшырууга каршы чыгышты.
“Кечээ анализ алабыз деп дарыгерлер келишти. Биз элдин баарынан алат экен деп коркуп, "анализ бербейбиз, анализ берсек эле оору аныкталды деп чыгара беришет экен" деп каршы болдук. Андан сырткары жыйналышта жол тосуу, өзгөчө абал режими боюнча нааразылыгыбызды билдирдик. Себеби жер айдоо сыяктуу талаа иштери калып кетти”,-деди аталган айылдын тургуну Мира Абылгазиева.
Ат-Башы районунун акими Нурбек Сатаров эл арасында түшүндүрүү иштери жүргөнүн, жазгы айдап-себүү иштерине карантин тоскоол болбогонун айтты.
Кыргызстанда баскыч-баскычы менен чектөөлөр жеңилдеп, 11-майдан тартып ири шаарлардагы жана Нарындагы, Ат-Башыдагы өзгөчө абал режими алынары, өлкө боюнча өзгөчө кырдаал сактала берери кабарланган.
Соль-Илецкиден Кыргызстанга кайтып келген мигранттар обсервациядагы медицина талаптарына баш ийбей жатат. Бул тууралуу 10-майда саламаттык сактоо министринин орун басары Нурболот Үсөнбаев Коронавируска каршы Республикалык штабдын брифингинде айтты.
“Обсервацияда жүрүү эрежелерин бузуп, качып кетүүгө аракет кылгандар бар. Милицияга кайрылууга аргасыз болдук. Алар өз туугандарын, ата-энелерин, тааныштарын кандай тобокелчиликке жана коркунучка түртүп жатканын түшүнбөй жатышат”, - деди Үсөнбаев.
Кыргыз өкмөтү 5-майда Орусиянын Соль-Илецк шаарынан ондогон эмгек мигрантын Казакстан аркылуу мекенине алып келген жана алар Чүй облусунун аймагындагы обсервацияга жайгаштырылган.
10-майда Кыргызстанда коронавирус жуктурган 71 адам аныкталган. Алардын 55и Соль-Илецкиден келген мигранттар.
COVID-19: президент, өкмөт башчы жана спикер кырдаалды талкуулашты
Президент Сооронбай Жээнбеков 10-майда премьер-министр Мухаммедкалый Абылгазиев менен Жогорку Кеңештин спикери Дастанбек Жумабековду кабыл алып, өлкөдөгү кырдаалды талкуулашты.
Жээнбеков коронавирустун жайылышына жол бербөө иштерин күчөтүлгөн тартипте улантуу керектигин айтты.
Президенттик аппараттын басма сөз кызматы кабарлагандай, алар коронавируска каршы күрөштүн абалы, ишкердикти жандантуу чаралары жана милдеттер тууралуу сүйлөштү.
Кыргыз бийлиги 11-майда өлкөдөгү өзгөчө абал режими алынарын, бирок өзгөчө кырдаал режими улана берерин билдирген.
Дүйнөдө коронавирус жуккандар 4 миллиондон ашты
АКШдагы Жон Хопкинс университетинин маалымат базасы көрсөткөндөй, 10-майга карата дүйнөдө коронавирус жуккандардын саны 4 миллиондон ашты.
Алардын 280 миңдейи жашоо менен кош айтышса, дээрлик 1 миллион 375 миңден көбү сакайды.
Оору эң көп жуккандар АКШда, ал жакта вирусту жугузгандар 1 миллион 300 миң адамдан ашты. Илдет кеңири жайылган он мамлекеттин катарында Испания, Италия, Британия, Орусия, Франция, Германия, Түркия, Бразилия жана Иран бар.
Борбор Азия чөлкөмү боюнча 10-майга карата маалымат:
- Казакстанда 5036 киши ооруп, 1766 киши сакайды, 31 адам көз жумду.
- Өзбекстанда 2387 адамда табылып, 1846 бейтап айыгып кетти, 10 киши жашоо менен кош айтышты.
- Тажикстанда 612 кишиден COVID-19 аныкталды, алардын 20сы каза тапты.
- Түркмөн бийлиги мамлекетте бул оору жоктугун айтып келет.
- Кыргызстанда алгачкы учур 18-мартта катталган. Андан бери коронавирус 1002 адамдан табылды, алардын 12си кайтыш болду, 675 бейтап айыгып чыкты. Ооруканаларда 315 киши бул илдет менен күрөшүп жатат.