Соңку күнү Москвада COVID-19 себеп болгон 41 өлүм расмий катталып, илдеттен каза болгон адамдардын саны эки миңден ашты.
Оору жаңыдан тогуз миң кишиде аныкталып, өлкөдө вирус жуккандардын саны 353 миңден ашты.
Орусия илдеттин жайылышы боюнча АКШ менен Бразилиядан кийинки эле орунда турат. Бразилияда ооруга чалдыккандардын саны 349 миң кишиден ашып, 22 миңден ашуун адам илдеттен көз жумду.
Москвадагы коронавирус боюнча маалымат борборунун башчысы Александр Мясников башка өлкөлөргө салыштырмалуу Орусияда коронавирустан өлгөндөрдүн төмөнкү көрсөткүчүн «орус керемети» деп атаган. Дарыгер бул «орус кереметинин» сыры ачылса, «дүйнө COVID-19га каршы дары табат» деп федералдык телеканалга айткан.
Буга чейин бир катар адистер менен дарыгерлер Орусияда каза болгондордун анык саны жашырылып жатканын айтып келишкен. Молекулярдык биолог Ирина Якутенко эч кандай «орус керемети» жок, өкмөт эсепти өзүнө ыңгайлаштырып жүргүзүп жатат деп эсептейт.
«Кээ бир өлкөлөрдө COVID аныкталган адам эмнеден каза болбосун, өлүмдүн себебин COVID-19 деп көрсөтүп жатышат, - деди ал. - Ушундай эле экинчи ыкма бар. Мисалы, бир адамда COVID-19 аныкталып, анан ал көп жылдык өнөкөт оорусунан же организми вирусту көтөрө албай инфаркттан каза тапса, өлүмдүн себебин инфаркт деп каттап коюп жатышат. Албетте, экинчи ыкманы колдонгондо, COVID-19дан өлүм аз катталат. Ошон үчүн азыр биз акыркы айларда каза болгондор боюнча жалпы маалымат чыкмайынча бир чечим чыгарууга шашылбашыбыз керек».
Кээ бир өлкөлөрдө COVID аныкталган адам эмнеден каза болбосун, өлүмдүн себебин COVID-19 деп көрсөтүп жатышат.
Ал арада Москвадагы Эпидемиология жана микробиология боюнча Улуттук изилдөөчү борбордун окумуштуулары коронавируска каршы вакцина ойлоп таап, өздөрү эмдөөдөн өткөнүн үч күн мурда айтып чыгышты.
«Алар өздөрүн коргоодон эмес, биринчи кезекте пандемия маалында илимий иштерин улантыш үчүн эмдөөдөн өтүштү», - дейт Николай Гамалей атындагы борбордун директору Александр Гинцбург.
Гинцбург жаңы вакцинаны канча кызматкер колдонгонун ачык айткан эмес. Бирок Саламаттык сактоо министрлиги калкты эмдөө июль айында башталарын ишенимдүү кабарлаган.
Орусиянын Илимдер академиясынын академиги, Вакцина боюнча Улуттук изилдөө университетинин илимий жетекчиси Виталий Зверев өтө шашылыш иштелип чыгып, клиникалык сыноодон өткөрүлө элек дарыны адамдарга колдонуу өтө коркунучтуу кесепеттерге алып келиши мүмкүн деп чочулаганын жашырган жок:
«Буга чейин мындай прецеденттер болгон. Полиомиелитке каршы иштелип чыккан вакцина башка ооруларды козгоп, эмдөө дароо токтотулган. Денге безгегине каршы жасалган вакцинадан жүздөгөн адамдар өлгөн. Ротавируска каршы вакцина да балдарда ичеги-карын ооруларын жараткан. Бул олуттуу нерсе. Бир топ убакытта гана аныкталчу кесепеттери болот. Организмге зыяндуулугу жок дегенде жарым жыл бою жаныбарларда изилдениши керек. Андан кийин ал жаныбарлардын органдарын ачып, кандай өзгөрүүлөр болгонун аныкташ керек. Ошондон кийин гана адамдарга колдоно баштаса болот».
Саламаттык сактоо министрлиги Орусияда коронавирустун жугуу темпи басаңдаганын билдирди. Оору көп катталган күндөрү вирус 10-11 миң кишиде аныкталып жаткан.
Орусия президент Владимир Путин да жалпысынан өлкөдө абал турукташканын айтып, бирок коронавирустун жайылышынын экинчи толкунуна даяр турууга чакырды.
Ал эми илдеттен айыгып, кызматына кайткан премьер-министр Михаил Мишустин орусиялыктарга чет өлкөлөрдө эс алуу менен саякаттоону токтотуп турууну сунуш кылды.
Испаниянын Мадрид жана Барселона шаарларында 25-майдан тартып жоро-жолдош, тууган-урук менен жолугушууларга тыюу салган эреже жоюлду. Барлар менен ресторандардын жайкы террасалары кайра ачылды. Ортодогу эки метр аралыкты сактоо шарты менен пляждарга барууга уруксат берилди.
Италияда спорт залдар менен бассейндер иштей баштады. Бир катар аймактарда көңүл ачуучу жайлардын, мейманканалардын жана машинелерди ижарага бере турган жайлардын иши жанданды.
Чехияда башталгыч класстар үчүн мектептер кайра ачылды, көчөдө сөзсүз беткап кийиш керек деген талап жоюлду. Германия менен Грекияда ресторан, кафе жана башка кызмат көрсөтүүчү жайларды ачууга уруксат берди.
Украинанын ири шаарларындагы метро кайра иштей баштады.
Европанын бир топ өлкөлөрүндө соңку күндөрү коронавирус жуккан жана бул илдеттен каза болгон адамдар азайып жатат.
Шенген аймагындагы бир катар мамлекеттер 15-июндан тартып ички чек араларын ачышат. Европа Биримдигинин сырткы чек аралары да 15-июнга чейин жабылган, мындай чектөөнүн мөөнөтү дагы узартылабы же жокпу, азырынча белгисиз.
Дүйнө жүзүндө коронавирус жуккандар 5,5 миллион адамга жетип калды, өпкөнү сезгенткен илдеттен 345 миңден көп киши көз жумду.
Соңку бир сутка ичинде эки өлүм катталганын Саламаттык сактоо министрлиги 25-майда кабарлады.
24-майда Жогорку Кеңештин мурдагы төрагасы, белгилүү коомдук жана саясий ишмер Мукар Чолпонбаев Бишкектеги жугуштуу илдеттер ооруканасында 70 жашында көз жумду. Ошол эле күнү Республикалык штаб коронавирус жуккан бейтап эки тараптуу пневмония, дем алуу жетишсиздиги жана башка бир катар өнөкөт оорулар өрчүп кеткенден көз жумганын кабарлады.
Мукар Чолпонбаев ооруканага 5-майда жаткырылган. 12-майда жандандыруу бөлүмүнө которулуп, жасалма дем алдыруучу аппаратка туташтырылган.
Коронавирус Чолпонбаевдин аялына да жуккан. Ал өткөн аптада ооруканадан айыгып чыккан.
Соңку суткада каза болгон экинчи адам – 67 жаштагы эркек бейтап. Ал Чүй облусуна караштуу Жайыл аймактык ооруканасында жаткан. Маркум тууралуу башка маалымат берилген жок.
Кыргызстанда коронавирус жуккандан кийин абалы начарлап, каза болгондордун саны 16га жетти.
Чехиянын Саламаттык сактоо министрлиги өлкөдө коронавирус илдети 8932 кишиден табылганын билдирди. Анын ичинен 6063ү айыгып чыгып, 315 бейтап вирустан каза болду.
Чехияда 19-майдан тартып кеңсенин ичинде медициналык беткапты тагынуу милдеттүү болбой калган. Адамдардын ортосундагы эки метр аралык сакталышы керек. Ал эми 25-майдан баштап сыртта беткапсыз эле жүрүүгө уруксат берилди. Бирок жабык жайларда, коомдук транспортто беткап тагынуу зарыл.
Андан тышкары мейманканалар, бассейн, тамактануу жайлары иштей баштады. 18-майда аба каттамдары жанданып, Прага – Амстердам, Прага – Франкфурт жана Прага – Париж каттамдары жүргүзүлө баштаган.