Кыргызстанда быйыл март айынан бери өпкөнүн кагынуусунан (пневмония) 54 адам кайтыш болду. Бул тууралуу 29-июнда онлайн брифингде саламаттык сактоо министри Сабиржан Абдикаримов билдирди.
Министрдин айтымында, алардын 48и Бишкекте, алтоо республиканын башка аймактарындагы ооруканаларда көз жумган.
Абдикаримовдун белгилешинче, мындай диагноз менен ооруканага жаткырылгандардын өлүмү июнь айынан тартып каттала баштады.
Маалыматка караганда, бул аралыкта ооруканаларга "пайда болуу себеби аныкталбаган пневмония" деген диагноз менен 1145 адам жаткырылган. Алардын 564ү айыгып кетти. 525и азыркы учурда саламаттык сактоо мекемелеринде жатышат, алардын ичинен 408и Бишкекте, 117си аймактарда.
Өкмөт соңку күндөрү "Тез жардам" кызматына кайрылгандар аябай көбөйгөнүн айтууда.
Кыргызстандын башкы өпкө дарыгери, коронавирус бейтаптарын дарылоочу илимий консультативдик кеңештин төрагасы Талантбек Сооронбаев азыр өлкөдө сасык тумоо эмес, COVID-19 пандемиясы гана өкүм сүрүп жатканын айткан.
Бишкектин "Тез жардам" кызматынын маалыматына караганда, мурда жайкысын дээрлик учурабаган пневмония соңку бир суткада эле 73 адамдан аныкталды.
Жалпысынан 18-марттан 29-июнга чейин өлкөдө коронавирус деген диагноз 5017 адамга коюлду, алардын ичинен 50 бейтап кайтыш болду, 2294ү айыгып кетти.
Анализ ыкмалары так болбой жаткандыктан Кыргызстанда пневмония илдетин жуктурду деген бейтаптардын баарында азыр коронавирус экенин көз каранды эмес адистер буга чейин айтып келишкен.
Бишкек шаарында өпкөсүнөн кагынып (пневмония) "Тез жардамга" кайрылгандардын саны көбөйүүдө. Жайында дээрлик катталбаган пневмония бир күндө 73 адамдан аныкталганын 29-июнда “Азаттык” радиосуна Бишкектеги Ыкчам медицина борборунун (“Тез жардам”) жетекчиси Искендер Шаяхметов билдирди.
Анын айтымында, бул оору 24-июнда 57, ал эми 25-июнда 48 адамдан аныкталган.
Шаяхметов буга чейин билдиргендей, жай мезгилинде мындай диагноз менен кайрылгандар такыр катталчу эмес, башка убактарда бир күндө ашып кетсе үч учур болчу.
Кыргызстанда соңку күндөрү коронавируска чалдыккандардын саны кескин көбөйдү. Социалдык түйүндөрдө өпкөсүнөн кагынып, бирок анализи коронавирустан таза чыгып жаткан бейтаптар да көп экенин кабарлагандар арбыды.
Көз каранды эмес адистер Кыргызстанда колдонулуучу анализдөө ыкмалары коронавирусту так аныктай албай жатканын белгилөөдө.
29-июндан тартып пневмония болгондор да коронавирус үчүн даярдалган ооруканаларга жаткырылмай болгонун Саламаттык сактоо министрлиги билдирди.
Жалпысынан 18-марттан 29-июнга чейин өлкөдө коронавирус 5017 адамдан табылды, алардын ичинен 50 бейтап кайтыш болду, 2294 бейтап айыгып кетти.
Өкмөт коронавируска байланыштуу айрым ооруканалардан кошумча орундарды даярдап жатат.
Кыргызстанда соңку бир сутка ичинде коронавирустан үч бейтап каза болду. Бул тууралуу 29-июнда онлайн брифингде саламаттык сактоо министринин орун басары Нурболот Үсөнбаев билдирди:
"54 жаштагы аял бейтап Бишкектеги Республикалык клиникалык инфекциялык ооруканада, 67 жаштагы эркек бейтап Ош шаардык клиникалык ооруканасында жана 61 жаштагы эркек бейтап Ош гуманитардык университетинин клиникасында кайтыш болду".
Бир сутка ичинде коронавирус 269 адамдан жаңы аныкталды. Алардын эң көбү Бишкек шаарында - 138. Чүй облусунда 43, Жалал-Абад облусунда 26, Ош шаарында 23, Ысык-Көл облусунда 16, Талас облусунда тогуз, Ош облусунда алты, Нарын жана Баткен облустарында төрттөн адам.
Коронавирус илдетинен дарыланып жаткан 52 бейтап айыгып, акыркы сутка ичинде үйүнө чыкты.
Жалпысынан 18-марттан 29-июнга чейин өлкөдө коронавирус 5017 адамдан табылды, алардын ичинен 50 бейтап кайтыш болду, 2294 бейтап айыгып кетти.
Республикалык штабдын жыйынында премьер-министр Кубатбек Боронов Саламаттык сактоо министрлигинин маалыматына таянып, өлкөдөгү медициналык мекемелерде орундар жетиштүү, дүрбөлөң түшүүгө негиз жок экенин маалымдады. Бул тууралуу өкмөттүн басма сөз кызматы билдирди.
Саламаттык сактоо министрлигинин маалыматы боюнча, 28-июнга карата өлкөдөгү медициналык мекемелерде даярдалган 1976 орундун 1047сине бейтаптар жаткырылды. Калган 929 орун бош турат.
“Учурда ооруканаларда орундар жетиштүү. Бирок акыркы учурда бейтаптар көбөйүп жатканына байланыштуу орундар тез эле толуп калышы мүмкүн. Ошондуктан жаңы орундарды даярдоо боюнча бир катар чаралар кабыл алынды”, - деди Боронов.
Бороновдун маалыматына ылайык, Таш-Дөбө айылындагы (Воронцовка) ооруканага 120, мурдагы "Ганси" авиабазасында 600 орун даяр. “Ак-Кеме” мейманканасында жана № 1 шаардык ооруканада да орундар даярдалууда.
Боронов өпкөсү сезгенип ооругандар жөнүндө да маалымат берди. Учурда алардын саны 289 адамды түзөт. Алар үчүн жалпысынан 553 керебет-орун даярдалды.
2-3 күндөн бери социалдык тармактарда ооруканалар бейтаптарга толуп калганын, Тез жардам кызматы оорулууларды кайда алып барарын билбей жатканын жазып жатышат.
27-июнда Бишкек шаарынын тургуну Баймурат Эрназаров өпкөсү сезгенип, ооруп калган иниси Улуттук госпиталдын пульмонология бөлүмүнүн короосунда жан бергенин медиа каражаттарына билдирген.